કર્ણાટકના માંડ્યા જિલ્લામાંથી એક ચોંકાવનારો કિસ્સો સામે આવ્યો છે. અહીં એક મહિલાને મૃત માની લેવામાં આવી હતી, પરંતુ તે સાત વર્ષ બાદ જીવતી મળી આવી છે. મહિલાની હત્યાના આરોપમાં એક યુવકે બે વર્ષથી વધુ સમય જેલમાં વિતાવવો પડ્યો હતો. આ મામલો સામે આવ્યા બાદ હવે સમગ્ર કેસની ફરીથી તપાસ કરવાના આદેશ આપવામાં આવ્યા છે.
શું હતો સમગ્ર મામલો?
આ ઘટના 3 જુલાઈ, 2019ની છે. માંડ્યાના પાંડવપુરા વિસ્તારની રહેવાસી મંજૂ તેના પરિવાર દ્વારા પોતાની મરજી વિરુદ્ધ લગ્ન નક્કી કરવામાં આવતાં નારાજ હતી. આથી તે ઘર છોડીને જતી રહી હતી. બસ સ્ટેન્ડ પર પોતાના પ્રેમી પાસે જતાં પહેલાં ઘરે ફોન કરવા માટે તેણે રાજેશ નામના યુવક પાસેથી મોબાઇલ માગ્યો હતો. મંજૂ ઘરે પરત ન ફરતાં તેના પિતા નાગરાજુએ ગુમ થયાની ફરિયાદ નોંધાવી હતી. પોલીસ તપાસમાં જાણવા મળ્યું કે મંજૂએ છેલ્લો ફોન રાજેશના મોબાઇલ નંબર પરથી કર્યો હતો. જોકે, વર્ષ 2021માં આ કેસને વણઉકેલાયેલો માનીને બંધ કરી દેવામાં આવ્યો હતો. પરંતુ 11 ઓગસ્ટ, 2021ના રોજ નાગરાજુએ અન્ય બે વ્યક્તિઓનાં નિવેદનોના આધારે નવી ફરિયાદ નોંધાવી હતી. તેણે આરોપ લગાવ્યો હતો કે રાજેશે મંજૂનું અપહરણ કરીને તેની હત્યા કરી હતી અને મૃતદેહ કાવેરી નદીમાં ફેંકી દીધો હતો.
મૃતદેહ મળ્યા વિના જ ચાર્જશીટ દાખલ કરી
આ ફરિયાદના આધારે પોલીસે હત્યાનો ગુનો નોંધ્યો હતો. તે સમયના તપાસ અધિકારી અને ઇન્સ્પેક્ટર પ્રભાકરે કોઈ મૃતદેહ કે નક્કર પુરાવા વિના રાજેશની ધરપકડ કરી હતી. સાક્ષીઓનાં નિવેદનો અને કથિત કબૂલાતના આધારે ચાર્જશીટ પણ દાખલ કરવામાં આવી હતી. આ ખોટા કેસમાં રાજેશે લગભગ અઢી વર્ષ જેલમાં વિતાવ્યાં હતાં. ત્યારબાદ તેને જામીન મળ્યા હતા.
રાજેશે પોતે જ મંજૂની શોધખોળ કરી
જેલમાંથી જામીન પર બહાર આવ્યા બાદ પણ રાજેશે પોતાની નિર્દોષતા સાબિત કરવાની લડાઈ ચાલુ રાખી હતી. તેની કાનૂની ટીમે પોતાના સ્તરે તપાસ શરૂ કરી હતી. આ દરમિયાન માંડ્યાના નાગમંગળ વિસ્તાર નજીક મંજૂ મળી આવી હતી. તે ત્યાં પોતાના પતિ સાથે રહેતી હતી. વકીલોની જાણકારીના આધારે પોલીસે મંજૂને શોધી કાઢી હતી અને તેને મહિલા આશ્રય કેન્દ્રમાં રાખવામાં આવી હતી. મંજૂએ પોતાના નિવેદનમાં સ્પષ્ટ કર્યું હતું કે તે રાજેશને ઓળખતી પણ નથી. તેને આ ખોટા કેસ વિશે કોઈ જાણકારી પણ નહોતી. તેણે કહ્યું કે રાજેશ સંપૂર્ણપણે નિર્દોષ છે અને તે કોર્ટમાં પણ આ જ નિવેદન આપવા તૈયાર છે.
પોલીસ તંત્રમાં ખળભળાટ, ફરી તપાસના આદેશ
આ ચોંકાવનારા ખુલાસા બાદ રાજેશના પરિવારે ખોટી ફરિયાદ નોંધાવનારા મંજૂના પિતા અને પુરાવા ઊભા કરીને એક નિર્દોષ વ્યક્તિની જિંદગી બરબાદ કરનારા તત્કાલીન પોલીસ ઇન્સ્પેક્ટર સામે કડક કાર્યવાહીની માગ કરી છે. માંડ્યાનાં પોલીસ અધિક્ષક શોભા રાણીએ આ ગંભીર બેદરકારીનો સ્વીકાર કર્યો છે. જોકે, મૃતદેહ મળ્યો ન હોવા છતાં ચાર્જશીટ દાખલ કરવામાં આવી હોવાના સવાલ પર તેમણે કોઈ સ્પષ્ટ જવાબ આપ્યો નહોતો. આ સમગ્ર મામલાની ગંભીરતાને ધ્યાનમાં રાખીને તેમણે પોલીસ ઉપાધિક્ષકને તપાસમાં થયેલી બેદરકારી અંગે વિગતવાર તપાસ કરીને રિપોર્ટ સોંપવાનો આદેશ આપ્યો છે.
