ભગવાન શ્રી રાધા માધવજીને અન્નકૂટ અર્પણ કરાયો, સુવર્ણ રથ પર નગરયાત્રા અને ભવ્ય દીપોત્સવ આરતી યોજાઈ
Ahmedabad : કાર્તિક દીપોત્સવની ઉજવણીના ભાગરૂપે ભાડજ સ્થિત હરે કૃષ્ણ મંદિરમાં મંગળવાર, 10 નવેમ્બર 2026ના રોજ ભવ્ય ગોવર્ધન પૂજા અને અન્નકૂટ મહોત્સવનું આયોજન કરવામાં આવ્યું હતું. ભગવાન શ્રીકૃષ્ણે ગોવર્ધન પર્વત ધારણ કરીને વૃંદાવનવાસીઓનું ઇન્દ્રના કોપથી રક્ષણ કર્યું હતું, તે દિવ્ય લીલાની સ્મૃતિમાં ભક્તોએ ઉત્સાહપૂર્વક મહોત્સવમાં ભાગ લીધો હતો.
આ પ્રસંગે હરે કૃષ્ણ મંદિર, ભાડજના અધ્યક્ષ સ્વામી શ્રી જગનમોહન કૃષ્ણ દાસે ગોવર્ધન લીલાનું આધ્યાત્મિક મહત્ત્વ સમજાવ્યું હતું. તેમણે જણાવ્યું હતું કે ભગવાન શ્રીકૃષ્ણે ઇન્દ્રયજ્ઞને બદલે ગોવર્ધન પર્વતની પૂજા કરવાનું સૂચન કર્યું હતું. આથી ક્રોધિત થયેલા ઇન્દ્રએ વૃંદાવન પર ભારે વરસાદ વરસાવ્યો હતો. ત્યારે ભગવાન શ્રીકૃષ્ણે પોતાની ડાબા હાથની નાની આંગળી પર ગોવર્ધન પર્વતને સાત દિવસ સુધી ધારણ કરીને તમામ વૃંદાવનવાસીઓને આશ્રય આપ્યો હતો.
તેમણે વધુમાં જણાવ્યું હતું કે આ દિવ્ય લીલા દ્વારા ભગવાને સંપૂર્ણ શરણાગતિ અને ભક્તિનું મહત્ત્વ સમજાવ્યું હતું. શ્રીમદ્ ભાગવતના દશમ સ્કંધમાં વર્ણવાયેલી આ ગોવર્ધન લીલાની સ્મૃતિમાં દર વર્ષની જેમ આ વર્ષે પણ મંદિરમાં અન્નકૂટ મહોત્સવ યોજાયો હતો.
મહોત્સવ દરમિયાન ગોવર્ધન પર્વતની સુંદર પ્રતિકૃતિ તૈયાર કરવામાં આવી હતી. ભગવાન શ્રી રાધા માધવજી અને શ્રી ગોવર્ધનજીને 1008થી વધુ પ્રકારની કેક, કૂકીઝ, મીઠાઈઓ અને વિવિધ વાનગીઓ અર્પણ કરવામાં આવી હતી. ખાસ વાત એ હતી કે આ તમામ કેક અને કૂકીઝ મંદિરની બેકરીમાં ભક્તો દ્વારા તૈયાર કરવામાં આવી હતી અને તે સંપૂર્ણપણે શાકાહારી હતી.
આ ઉપરાંત ભગવાન શ્રી શ્રી રાધા માધવજીની સુવર્ણ રથ પર ભવ્ય નગરયાત્રા પણ યોજાઈ હતી. હરિનામ સંકીર્તન સાથે નીકળેલી આ નગરયાત્રા ભક્તો માટે આકર્ષણનું કેન્દ્ર બની હતી. ત્યારબાદ ભગવાનને અન્નકૂટ અર્પણ કરવામાં આવ્યો હતો અને ગોવર્ધન પર્વતની ભવ્ય મહાઆરતી કરવામાં આવી હતી. આ દરમિયાન ભક્તોએ ગોવર્ધન પર્વતની મહિમા વર્ણવતા આઠ શ્લોકો ધરાવતા શ્રી ગોવર્ધનાષ્ટકમનું ગાન કર્યું હતું.
કાર્યક્રમમાં ગૌપૂજાનું પણ આયોજન કરવામાં આવ્યું હતું. ગાયોને રેશમી વસ્ત્રોથી શણગારવામાં આવી હતી અને પરંપરાગત રીતે ગોળ તથા કેળાં અર્પણ કરવામાં આવ્યાં હતાં. ત્યારબાદ ગાયોને આગળ રાખીને ભક્તોએ ગોવર્ધન પર્વતની પરિક્રમા કરી હતી.
મહોત્સવના અંતે ભગવાનને અર્પણ કરવામાં આવેલી કેક સહિતની વિવિધ વાનગીઓ ભક્તોને પ્રસાદરૂપે વિતરણ કરવામાં આવી હતી. જ્યારે કાર્તિક માસના દીપોત્સવ મહોત્સવના ભાગરૂપે ભગવાનની ભવ્ય દીપોત્સવ આરતી સાથે સમગ્ર કાર્યક્રમની પૂર્ણાહુતિ કરવામાં આવી હતી.
