Dwarka : પૂજ્ય મોરારીબાપુના નેતૃત્વમાં ભારત સ્વસ્તિક યાત્રાના બીજા ચરણનો આજે દ્વારકાથી ભવ્ય પ્રારંભ થયો હતો. દ્વારકા રેલવે સ્ટેશન ખાતેથી શંકરાચાર્ય સ્વામી સદાનંદ સરસ્વતીજી મહારાજની ઉપસ્થિતિમાં યાત્રાને ધ્વજ પ્રસ્થાન કરાવવામાં આવ્યું હતું.
ભારતની આધ્યાત્મિક અને સાંસ્કૃતિક વિરાસતને એક તાંતણે જોડવાના ઉદ્દેશ સાથે યોજાઈ રહેલી આ યાત્રા 14થી 22 નવેમ્બર દરમિયાન દ્વારકાથી જગન્નાથપુરી સુધી પહોંચશે. અગાઉ યાત્રાનો પ્રથમ ચરણ કન્યાકુમારીથી કેદારનાથ સુધી સફળતાપૂર્વક પૂર્ણ થયો હતો.
આ પ્રસંગે મોરારીબાપુએ જણાવ્યું હતું કે ભારત સ્વસ્તિક યાત્રાનો વિચાર વ્યક્તિગત નહીં, પરંતુ દૈવી વિચાર અને શિવસંકલ્પ છે. ભગવાન મહાદેવ અને શંકરાચાર્યોના આશીર્વાદથી આ યાત્રા આગળ વધી રહી છે. તેમણે વધુમાં જાહેરાત કરી હતી કે દ્વારકામાં 16થી 24 ઓક્ટોબર 2027 દરમિયાન નવ દિવસની રામકથાનું આયોજન કરવામાં આવશે. આ કથાના યજમાન પ્રથમ વખત દ્વારકાના પૂજ્ય પૂજારીજી બનશે.
શંકરાચાર્ય સ્વામી સદાનંદ સરસ્વતીજીએ યાત્રાને સર્વજનના કલ્યાણ, સૌહાર્દ અને ભારતની આધ્યાત્મિક એકતાનો પ્રયાસ ગણાવ્યો હતો. તેમણે જણાવ્યું હતું કે ધાર્મિક યાત્રાઓનો હેતુ માત્ર દર્શન કરવાનો નહીં, પરંતુ વધુ સારા મનુષ્ય બની સમાજના કલ્યાણ માટે કાર્ય કરવાનો હોવો જોઈએ.
યાત્રાના બીજા ચરણમાં આશરે 1,000 શ્રદ્ધાળુઓ બે વિશેષ ટ્રેનો ‘કૈલાશ ભારત ગૌરવ’ અને ‘ચિત્રકૂટ ભારત ગૌરવ’ દ્વારા જોડાયા છે. આ યાત્રા દરમિયાન સોમનાથ, ડાકોર, ઉજ્જૈન, નાગપુર, ચાંપા, માયાપુર અને કોલકાતાની મુલાકાત બાદ 22 નવેમ્બરે જગન્નાથપુરી ખાતે પૂર્ણ થશે.
સંતકૃપા સનાતન સંસ્થાન દ્વારા આયોજિત આ યાત્રા કુલ 13 રાજ્યો અને જમ્મુ-કાશ્મીરને આવરી લે છે. યાત્રાનો મુખ્ય ઉદ્દેશ ભારતની વિવિધ આધ્યાત્મિક પરંપરાઓ, સંસ્કૃતિઓ અને પ્રદેશોને એકતાના સૂત્રમાં જોડવાનો છે.
યાત્રા દરમિયાન યોજાતી રામકથા અને અન્ય કાર્યક્રમોમાં સૌને પ્રવેશ ખુલ્લો રાખવામાં આવ્યો છે. શ્રદ્ધાળુઓ માટે દરેક સ્થળે શાકાહારી સામૂહિક ભોજન એટલે કે ભંડારાની વ્યવસ્થા પણ કરવામાં આવી છે.
