હિતેન કુમાર અને રવિ ગોહિલની અનોખી ઓનસ્ક્રીન કેમેસ્ટ્રી જોવા મળશે, 20 નવેમ્બરે સિનેમાઘરોમાં રિલીઝ થશે ફિલ્મ
ગુજરાતી ફિલ્મ ઇન્ડસ્ટ્રીની આગામી ફેમિલી એન્ટરટેઇનર ફિલ્મ ‘રફ એન્ડ ટફ કન્યા’નું ધમાકેદાર ટાઇટલ સોંગ રિલીઝ કરવામાં આવ્યું છે. લોકપ્રિય ગુજરાતી ગાયક જિગરદાન ગઢવી (જિગ્રા)ના અવાજમાં રજૂ થયેલું આ ગીત સસરા અને જમાઈ વચ્ચેની મજેદાર ટક્કર પર આધારિત છે. ગીતમાં રમૂજ, એટિટ્યૂડ અને જોરદાર એનર્જીનો સંગમ જોવા મળે છે.
સામાન્ય રીતે ગુજરાતી ફિલ્મોમાં પ્રેમી યુગલોની કેમેસ્ટ્રી પર આધારિત ગીતો જોવા મળે છે, પરંતુ આ ગીતમાં સસરા અને જમાઈ વચ્ચેની નોકઝોકને અનોખા અંદાજમાં રજૂ કરવામાં આવી છે. એક તરફ રફ સસરા તો બીજી તરફ ટફ જમાઈની મજેદાર ટક્કર દર્શકોને હસાવશે.
આ ગીતની ખાસિયત જિગરદાન ગઢવીનો અલગ અંદાજ છે. ‘વ્હાલમ આવો ને’ અને ‘તારી મધ મીઠી મધ મીઠી’ જેવા લોકપ્રિય ગીતો આપનાર જિગરદાન આ વખતે જોશીલા અને મસ્તીભર્યા અવાજમાં જોવા મળી રહ્યા છે. ગીતનું કમ્પોઝિશન એન્ડ્રુ સેમ્યુઅલ દ્વારા કરવામાં આવ્યું છે, જ્યારે તેના શબ્દો ઉજ્જવલ દવે દ્વારા લખવામાં આવ્યા છે.
https://youtu.be/kXnQANEIuEs?si=tGXf_O3UHpgC-3T7
અભિનેતા હિતેન કુમારે ગીત અંગે જણાવ્યું હતું કે, સસરા અને જમાઈ વચ્ચેના સંબંધની મસ્તી, નોકઝોક અને રમૂજને આ ગીતમાં એકદમ અલગ અંદાજમાં રજૂ કરવામાં આવી છે. રવિ ગોહિલ સાથે ગીતનું શૂટિંગ કરવાનો અનુભવ પણ ખૂબ જ મજેદાર રહ્યો હતો. તેમની ડાન્સિંગ એનર્જી અને બંનેની ઓનસ્ક્રીન કેમેસ્ટ્રી ગીતને વધુ રસપ્રદ બનાવે છે.
બિરલા સ્ટુડિયોઝ દ્વારા પ્રસ્તુત અને બિગ બોક્સ સિરીઝ પ્રોડક્શન દ્વારા નિર્મિત આ ફિલ્મનું દિગ્દર્શન યશ વૈષ્ણવ દ્વારા કરવામાં આવ્યું છે. ફિલ્મની વાર્તા બે અનોખા ગુજરાતી પરિવારોની આસપાસ ફરે છે. જેમાં શિવ પંડિતની ભૂમિકામાં હિતેન કુમાર પોતાની દીકરી છવીના લગ્નને લઈને ચિંતિત પિતા તરીકે જોવા મળશે. ખાસ વાત એ છે કે છવીએ પોતાના જીવનસાથીની પસંદગી જાતે કરી છે, જેને કારણે પરિવારમાં મજેદાર પરિસ્થિતિઓ સર્જાય છે.
ફિલ્મમાં હિતેન કુમાર, રવિ ગોહિલ, યુક્તિ રંડેરિયા અને નીલમ પંચાલ મુખ્ય ભૂમિકામાં જોવા મળશે. ‘રફ એન્ડ ટફ કન્યા’ 20 નવેમ્બર, 2026ના રોજ સિનેમાઘરોમાં રિલીઝ થવાની છે.
