મોહિત ઉલ્વા જ્યારે બેટિંગ કરવા મેદાનમાં આવ્યા ત્યારે ભારતીય ટીમે 252 રનના સ્કોર પર 8 વિકેટ ગુમાવી દીધી હતી. ટીમ ઇન્ડિયા ફરી એકવાર ફાઇનલમાં પોતાના હરીફ સામે હારતી હોય તેવું લાગી રહ્યું હતું. પરંતુ ત્યારબાદ મોહિત અને મનલ ચૌહાણની જોડીએ આક્રમક બેટિંગ કરીને હારેલી બાજી ભારતના પક્ષમાં ફેરવી દીધી હતી.
આ જીત સાથે જ ભારતીય ટીમે ઇતિહાસ રચ્યો હતો. ભારતે 9મી વખત અંડર-19 એશિયા કપનો ખિતાબ પોતાના નામે કર્યો હતો. ભારતની જીતના હીરો મોહિત ઉલ્વા રહ્યો હતો. તેણે 26 બોલમાં અણનમ 49 રનની શાનદાર ઇનિંગ રમી હતી. આ દરમિયાન તેણે 5 ચોગ્ગા અને 3 છગ્ગા ફટકાર્યા હતા. મોહિતે મનલ સાથે મળીને નવમી વિકેટ માટે માત્ર 35 બોલમાં 57 રનની ભાગીદારી કરી હતી.
કોણ છે મોહિત ઉલ્વા?
મોહિત ઉલ્વા 18 વર્ષનો ક્રિકેટર છે. તે જમણા હાથે બેટિંગ કરે છે અને જમણા હાથથી મીડિયમ પેસ બોલિંગ પણ કરે છે. સૌરાષ્ટ્રની એજ-ગ્રુપ ક્રિકેટ સિસ્ટમમાંથી આગળ વધીને તેમણે ભારતની અંડર-19 ટીમમાં પોતાનું સ્થાન બનાવ્યું છે. ‘સ્પોર્ટસ્ટાર’ના એક અહેવાલ અનુસાર, મોહિતે પોતાના ગામમાં ટેનિસ-બોલ ક્રિકેટ રમવાનું શરૂ કર્યું હતું. તેના પિતા રેલવે પ્રોટેક્શન ફોર્સ (RPF)માં નોકરી કરે છે. તેણે જ મોહિતને એક પ્રોફેશનલ ક્રિકેટ એકેડમીમાં તાલીમ લેવા માટે પ્રેરિત કર્યો હતો.
મોહિતે ‘સ્પોર્ટસ્ટાર’ને જણાવ્યું હતું કે, “મારા પિતાને હંમેશાં ક્રિકેટમાં રસ હતો. જ્યારે હું નાનો હતો ત્યારે તેમણે મારામાં કેટલીક ખાસિયતો જોઈ હતી અને તેમને લાગ્યું કે હું ક્રિકેટ રમી શકું છું.” તેમણે એ પણ સ્વીકાર્યું હતું કે શરૂઆતમાં તેણે ક્રિકેટ રમવા માટે એટલા માટે તૈયાર થયા હતો, કારણ કે તે અભ્યાસથી બચવા માગતો હતો.
મોહિત ઉલ્વાએ જામનગરની ક્રિકેટ બંગલોમાં મહેન્દ્રસિંહ ચૌહાણના માર્ગદર્શન હેઠળ તાલીમ લીધી હતી. આ એ જ કોચ છે જેમણે ભારતીય ક્રિકેટર રવિન્દ્ર જાડેજાને પણ તાલીમ આપી હતી. ચૌહાણના માર્ગદર્શન હેઠળ તાલીમની શરૂઆત 24થી 25 વોર્મ-અપ લેપ્સથી થતી હતી. ત્યારબાદ ખેલાડીઓને સ્પ્રિન્ટ અને વિવિધ ડ્રિલ્સ કરાવવામાં આવતી હતી. મોહિતે જણાવ્યું હતું કે, “જામનગરમાં મેં શીખ્યું કે ફિટનેસ સૌથી મહત્ત્વની બાબત છે, કારણ કે મહેન્દ્ર સરે તેના પર ખૂબ કામ કરાવ્યું હતું.”
ઓફ સ્પિનરથી બન્યો ફાસ્ટ બોલર
મોહિતે શરૂઆતમાં ઓફ સ્પિનર તરીકે ક્રિકેટ રમવાનું શરૂ કર્યું હતું. જોકે, કોચ મહેન્દ્રસિંહ ચૌહાણે તેમને ફાસ્ટ બોલિંગ અજમાવવાની સલાહ આપી હતી. મોહિતની શારીરિક બાંધણી પાતળી હતી અને તે સારી દોડ લગાવી શકતો હતો. આથી કોચને લાગ્યું કે તે ફાસ્ટ બોલર બની શકે છે. મોહિતે કહ્યું હતું કે, “મેં ફાસ્ટ બોલિંગ શરૂ કરી અને ધીમે-ધીમે ફાસ્ટ બોલર બની ગયો.”
જયદેવ ઉનડકટ પાસેથી શીખી ખાસ બોલિંગની કળા
મોહિતના પિતાની રાજકોટમાં બદલી થયા બાદ તેણે સૌરાષ્ટ્ર માટે એજ-ગ્રુપ ક્રિકેટ રમવાનું શરૂ કર્યું હતું. થોડાં વર્ષો પહેલાં તેણે જયદેવ ઉનડકટ સાથે સૌરાષ્ટ્ર પ્રીમિયર લીગની એક સિઝન પણ રમી હતી. એક વખત નેટ પ્રેક્ટિસ દરમિયાન મોહિતે જયદેવ ઉનડકટને સ્લોઅર બાઉન્સર નાખતા જોયા હતા. ત્યારબાદ તેમણે પણ આ પ્રકારની બોલિંગ અજમાવી હતી. મોહિતના જણાવ્યા અનુસાર, ઉનડકટે તેમને આ બોલિંગ અંગે ખાસ સલાહ આપી હતી. તેમણે કહ્યું હતું કે, “આ બોલ ક્યારેય છોડતો નહીં. જો તું તેને સારી રીતે નાખી શકતા હોવ તો સતત તેનો ઉપયોગ કરતા રહો.” આ રીતે ગામમાં ટેનિસ-બોલ ક્રિકેટથી શરૂઆત કરનાર મોહિત ઉલ્વાએ પોતાની મહેનત, કોચના માર્ગદર્શન અને સતત પ્રેક્ટિસના આધારે ભારતીય અંડર-19 ટીમમાં સ્થાન મેળવ્યું અને એશિયા કપની ફાઇનલમાં શાનદાર પ્રદર્શન કરીને દેશને ઐતિહાસિક જીત અપાવી.
