દ્વારકાથી શરૂ થનારી યાત્રા સોમનાથ, ડાકોર સહિતનાં વિવિધ ધાર્મિક અને સાંસ્કૃતિક સ્થળોને આવરી લેશે
New Delhi : પૂજ્ય શ્રી મોરારી બાપુના નેતૃત્વમાં આયોજિત ‘ભારત સ્વસ્તિક યાત્રા’નો બીજો તબક્કો 14 નવેમ્બરથી શરૂ થવા જઈ રહ્યો છે. દ્વારકાથી પ્રારંભ થનારી આ યાત્રાનું 22 નવેમ્બરના રોજ જગન્નાથપુરી ખાતે સમાપન થશે. ભારતની વિવિધ આધ્યાત્મિક, સાંસ્કૃતિક અને ઐતિહાસિક વિરાસતને એકતાના સૂત્રમાં જોડવાના ઉદ્દેશથી આ યાત્રાનું આયોજન કરવામાં આવ્યું છે.
ઉલ્લેખનીય છે કે, યાત્રાનો પ્રથમ તબક્કો 10થી 23 ઓક્ટોબર દરમિયાન કન્યાકુમારીથી કેદારનાથ સુધી યોજાયો હતો. આ દરમિયાન કલાડી, શૃંગેરી, હમ્પી, તુલજાપુર, ઓમકારેશ્વર, ઝાંસી, મથુરા, કુરુક્ષેત્ર, અટારી-વાઘા અને જમ્મુ સહિતનાં મહત્ત્વપૂર્ણ સ્થળોની મુલાકાત લેવામાં આવી હતી.
હવે બીજા તબક્કામાં દ્વારકાથી શરૂ થનારી આ યાત્રા સોમનાથ, ડાકોર, ઉજ્જૈન, નાગપુર, છત્તીસગઢના ચંપારણ, માયાપુર અને કોલકાતા થઈને જગન્નાથપુરી પહોંચશે. બંને તબક્કા મળીને ભારતનાં 13 રાજ્યો અને કેન્દ્રશાસિત પ્રદેશ જમ્મુ-કાશ્મીરને આવરી લેશે.
આ યાત્રા ભારતની વિવિધતામાં એકતાની ભાવનાને ઉજાગર કરે છે. ભારતના રાષ્ટ્રગીત ‘જન ગણ મન’માં ઉલ્લેખિત વિવિધ પ્રદેશો, નદીઓ અને ભૌગોલિક વિસ્તારોને સાંસ્કૃતિક એકતાના પ્રતીક તરીકે જોડવાનો પણ પ્રયાસ કરવામાં આવ્યો છે.
યાત્રાના આધ્યાત્મિક મહત્ત્વ અંગે મોરારી બાપુએ જણાવ્યું હતું કે, ઓમકાર અને સ્વસ્તિક એકબીજાના પર્યાય છે. ઓમકાર નિરાકાર અને નિર્ગુણ પરમ તત્ત્વનું પ્રતિનિધિત્વ કરે છે, જ્યારે સ્વસ્તિક સાકાર સ્વરૂપમાં મંગળ અને સમગ્ર સૃષ્ટિના કલ્યાણનું પ્રતીક છે. યજ્ઞનો મૂળ ભાવ પણ અન્યના કલ્યાણ માટે નિઃસ્વાર્થ સમર્પણ કરવાનો છે.
સંતકૃપા સનાતન સંસ્થાન દ્વારા આયોજિત આ યાત્રાનો મુખ્ય ઉદ્દેશ સનાતન ધર્મના શાશ્વત આદર્શો દ્વારા દેશની વિવિધ આધ્યાત્મિક પરંપરાઓ, પ્રદેશો અને સમુદાયોને એકસાથે જોડવાનો છે.
મિરાજ ગ્રુપના ચેરમેન અને સંતકૃપા સનાતન સંસ્થાનના મેનેજિંગ ટ્રસ્ટી મદન પાલીવાલે જણાવ્યું હતું કે, ભારત સ્વસ્તિક યાત્રા દેશના વિવિધ પ્રદેશો અને જીવનનાં અલગ-અલગ ક્ષેત્રો સાથે જોડાયેલા લોકોને એક મંચ પર લાવી ભારતની શાશ્વત એકતાની ભાવનાને સાકાર કરવાનો પ્રયાસ છે.
આ યાત્રા આદિ શંકરાચાર્યની આધ્યાત્મિક વિરાસતથી પણ પ્રેરિત છે. પૂજ્ય મોરારી બાપુની રામકથાના મુખ્ય આધાર એવા સત્ય, પ્રેમ અને કરુણાના સંદેશને દેશના વિવિધ પ્રદેશો સુધી પહોંચાડીને આધ્યાત્મિકતા, સંવાદ અને સહિયારી સાંસ્કૃતિક વિરાસત દ્વારા રાષ્ટ્રીય એકતાને મજબૂત બનાવવાનો પ્રયાસ કરવામાં આવી રહ્યો છે.
