World Largest Airport: આજના સમયમાં એક રાજ્ય કે દેશમાંથી બીજા રાજ્ય અથવા દેશમાં ઝડપથી પહોંચવાનો સૌથી સરળ માર્ગ હવાઈ મુસાફરી છે. દુનિયાભરમાં હજારો એરપોર્ટ છે, પરંતુ શું તમે જાણો છો કે વિશ્વનું સૌથી મોટું એરપોર્ટ કયું છે? આ એરપોર્ટ એટલું વિશાળ છે કે ઉપરથી જોતા તે એક નાના શહેર જેવું લાગે છે. તેના વિશાળ કદને કારણે તેને એવિએશન જાયન્ટ (Aviation Giant)તરીકે પણ ઓળખવામાં આવે છે.
દુનિયાનું સૌથી મોટું એરપોર્ટ ક્યાં આવેલું છે?
જે એરપોર્ટની વાત થઈ રહી છે તે સાઉદી અરેબિયાના ઈસ્ટર્ન પ્રોવિન્સમાં દમ્મામ (Dammam) નજીક આવેલું કિંગ ફહદ ઇન્ટરનેશનલ એરપોર્ટ (King Fahd International Airport) છે. આ એરપોર્ટનો કુલ વિસ્તાર અંદાજે 776 ચોરસ કિલોમીટર છે, જેના કારણે જમીનના ક્ષેત્રફળના આધારે તે દુનિયાનું સૌથી મોટું એરપોર્ટ ગણાય છે. આ એરપોર્ટ વર્ષ 1999માં વ્યાવસાયિક કામગીરી માટે શરૂ કરવામાં આવ્યું હતું.
બહેરિન દેશ કરતાં પણ મોટું
આ એરપોર્ટ એટલું વિશાળ છે કે 727 ચોરસ કિલોમીટર વિસ્તાર ધરાવતો બહેરિન દેશ પણ તેમાં સમાઈ જાય. આટલું જ નહીં, ભારતની આર્થિક રાજધાની મુંબઈ (603 ચોરસ કિમી)ને પણ આ એરપોર્ટના પરિસરમાં સમાવી શકાય અને તેમ છતાં ઘણી જગ્યા બચી જાય. તેના વિશાળ કદને કારણે ગિનેસ વર્લ્ડ રેકોર્ડ્સમાં પણ તેનો સમાવેશ થયો છે.
કદમાં સૌથી મોટું, પરંતુ મુસાફરોની સંખ્યા ઓછી
રસપ્રદ વાત એ છે કે દુનિયાનું સૌથી મોટું એરપોર્ટ હોવા છતાં મુસાફરોની અવરજવર મામલે તે ટોચના વ્યસ્ત એરપોર્ટોમાં સામેલ નથી. 776 ચોરસ કિલોમીટર વિસ્તારમાંથી માત્ર નાનો ભાગ જ ટર્મિનલ, રનવે અને નિયમિત એરપોર્ટ સેવાઓ માટે ઉપયોગમાં લેવાય છે. બાકીનો વિસ્તાર ભવિષ્યના વિસ્તરણ અને સુરક્ષા માટે ખાલી રાખવામાં આવ્યો છે.
આટલું વિશાળ એરપોર્ટ કેમ બનાવવામાં આવ્યું?
સામાન્ય રીતે એરપોર્ટો જરૂરિયાત મુજબ તબક્કાવાર વિકસાવવામાં આવે છે, પરંતુ કિંગ ફહદ ઇન્ટરનેશનલ એરપોર્ટની યોજના શરૂઆતથી જ લાંબા ગાળાના ભવિષ્યને ધ્યાનમાં રાખીને બનાવવામાં આવી હતી. એટલા માટે જ તેના માટે 776 ચોરસ કિલોમીટર જમીન અનામત રાખવામાં આવી, જેથી ભવિષ્યમાં નવા રનવે, વિશાળ કાર્ગો હબ, નવા ટર્મિનલ અને એવિએશન લોજિસ્ટિક્સ સુવિધાઓ સરળતાથી વિકસાવી શકાય.
ઉપરથી જોતા એક નાના શહેર જેવું લાગે છે
આ એરપોર્ટને જો વિમાનમાંથી અથવા સેટેલાઇટ તસવીરોમાં જોવામાં આવે તો તે રણપ્રદેશની વચ્ચે વસેલા એક નાના શહેર જેવું દેખાય છે. ક્ષેત્રફળની દ્રષ્ટિએ દુનિયાનું બીજું સૌથી મોટું એરપોર્ટ ગણાતું અમેરિકાનું ડેનવર ઇન્ટરનેશનલ એરપોર્ટ પણ તેના સામે કદમાં નાનું લાગે છે. વિશ્વનું સૌથી મોટું એરપોર્ટ હોવા છતાં અહીં મુસાફરોની ભીડ બહુ ઓછી જોવા મળે છે. તેના અનોખા કદ અને ભવિષ્યને ધ્યાનમાં રાખીને કરાયેલા આયોજનને કારણે તે આજે પણ વિશ્વભરના એવિએશન પ્રેમીઓ માટે આકર્ષણનું કેન્દ્ર બન્યું છે.
