એમેઝોને વધુ 250 કર્મચારીઓને નોકરીમાંથી કાઢી મૂક્યા છે. આ છટણી કંપનીના ‘ડિવાઇસ યુનિટ’માં કરવામાં આવી છે, જે કિન્ડલ ઈ-રીડર અને ઇકો સ્માર્ટ સ્પીકર જેવા પ્રોડક્ટ્સ બનાવે છે. આ છટણીની સૌથી વધુ અસર સોફ્ટવેર ડેવલપમેન્ટ સાથે જોડાયેલા કર્મચારીઓ પર પડી છે.
રોયટર્સના એક અહેવાલ અનુસાર, એમેઝોને અસરગ્રસ્ત કર્મચારીઓને વહેલી સવારે ઈમેલ અને ટેક્સ્ટ મેસેજ મોકલીને નોકરીમાંથી કાઢી મૂકવાની જાણકારી આપી હતી. અહેવાલમાં એમેઝોનનાં વાઇસ પ્રેસિડેન્ટ ચેરી રોબિન્સનના એક ઈમેલનો પણ ઉલ્લેખ કરવામાં આવ્યો છે. રોબિન્સને જણાવ્યું હતું કે કંપનીએ પોતાના માળખાની ઊંડાણપૂર્વક સમીક્ષા કરી છે, જેના કારણે કેટલાક હોદ્દાઓ નાબૂદ કરવાનો નિર્ણય લેવામાં આવ્યો છે.
નોકરીમાંથી છૂટા કરવાના કિસ્સામાં વહેલી સવારે ઈમેલ મોકલવો એ કોઈ નવી વાત નથી. અગાઉ મેટા અને ઓરેકલ જેવી કંપનીઓએ પણ આ જ રીતે ઈમેલ દ્વારા કર્મચારીઓને નોકરીમાંથી કાઢી મૂકવાની જાણકારી આપી હતી.
એમેઝોને એક નિવેદન જાહેર કરીને આ છટણીની પુષ્ટિ કરી છે. કંપનીના પ્રવક્તાએ જણાવ્યું હતું કે અમે કેટલાક હોદ્દાઓ નાબૂદ કરવાનો મુશ્કેલ નિર્ણય લીધો છે. જોકે, કંપનીએ સત્તાવાર રીતે કેટલા હોદ્દાઓ પર અસર થઈ છે તે જણાવ્યું નથી. પરંતુ અહેવાલ અનુસાર, 250 કર્મચારીઓને નોકરીમાંથી કાઢવામાં આવ્યા છે.
પ્રવક્તાના જણાવ્યા અનુસાર, આ છટણીથી એમેઝોનને વધુ કાર્યક્ષમ રીતે કામ કરવામાં અને પોતાના પ્રોડક્ટ રોડમેપ સાથે વધુ સારું તાલમેલ બેસાડવામાં મદદ મળશે.
AIના વધતા પ્રભાવ વચ્ચે કર્મચારીઓની છટણી
આ નિર્ણયના એક દિવસ પહેલાં જ એમેઝોને પોતાની એન્જિનિયરિંગ લીડરશિપનો સપ્ટેમ્બર મહિનાનો એક મેમો જાહેર કર્યો હતો. તેમાં AIના યુગમાં ડેવલપર્સની ભૂમિકા અંગે ચર્ચા કરવામાં આવી હતી.
મેમોમાં કહેવામાં આવ્યું હતું કે આપણે સૌએ આ પરિવર્તનને અપનાવવું પડશે અને નવી બાબતો શીખવા માટે સમય કાઢવો પડશે, નહીં તો આપણે પાછળ રહી જઈશું. તેમાં એવું પણ જણાવાયું હતું કે સોફ્ટવેર એન્જિનિયરિંગના કામમાં AI સૌથી મહત્ત્વપૂર્ણ ભૂમિકા ભજવશે.
એલેક્સાના નવા ડિવાઇસ લોન્ચ કર્યા બાદ છટણી
એમેઝોનમાં આ છટણી એવા સમયે થઈ છે, જ્યારે કંપનીએ એલેક્સા (Alexa) આધારિત પાંચ નવા ડિવાઇસ રજૂ કર્યા છે. તેમાં નવી ડિઝાઇનવાળું ‘ઇકો શો 16’ સ્માર્ટ ડિસ્પ્લે, ‘એલેક્સા ફોટો ફ્રેમ’ અને બેડસાઇડ પર રાખી શકાય તેવી ‘ઇકો ટાઇમ’ ઘડિયાળનો સમાવેશ થાય છે. આ તમામ ડિવાઇસ કંપનીના ડિવાઇસ યુનિટ દ્વારા જ તૈયાર કરવામાં આવ્યા છે.
અગાઉ પણ હજારો કર્મચારીઓની છટણી કરી ચૂક્યું છે એમેઝોન
આ મહિનાની શરૂઆતમાં જ એમેઝોને પોતાના મુખ્ય રિટેલ વિભાગમાંથી લગભગ 1,000 કર્મચારીઓને છૂટા કરવાનો નિર્ણય લીધો હતો.
કંપનીએ અગાઉ પણ મોટા પાયે છટણી કરી છે.
– જાન્યુઆરીમાં કંપનીએ 16,000 હોદ્દાઓમાં કાપ મૂકવાની જાહેરાત કરી હતી.
– ગયા વર્ષે ઑક્ટોબરમાં પણ 14,000 કર્મચારીઓને નોકરીમાંથી કાઢવામાં આવ્યા હતા.
– હવે ડિવાઇસ યુનિટમાં વધુ 250 કર્મચારીઓની છટણી કરવામાં આવી છે.
બીજી તરફ, કંપની આર્ટિફિશિયલ ઇન્ટેલિજન્સ (AI) ક્ષેત્રમાં અબજો ડોલરનું રોકાણ કરી રહી છે. માનવામાં આવે છે કે એમેઝોન આ વર્ષે એકલા AI ક્ષેત્રમાં 220 અબજ ડોલર સુધીનું રોકાણ કરી શકે છે.
ટેક કંપનીઓમાં છટણીનો સિલસિલો યથાવત
એમેઝોન એકમાત્ર એવી કંપની નથી, જે કર્મચારીઓની સંખ્યા ઘટાડી રહી છે. Layoffs.fyiના આંકડા અનુસાર, આ વર્ષે અત્યાર સુધીમાં 1.35 લાખથી વધુ ટેકનોલોજી ક્ષેત્રની નોકરીઓ સમાપ્ત થઈ ચૂકી છે.
તાજેતરમાં ડ્રોપબોક્સે જાહેરાત કરી હતી કે તે પોતાના વૈશ્વિક કર્મચારીબળમાં 9 ટકાનો ઘટાડો કરશે. બીજી તરફ, માઇક્રોસોફ્ટે લગભગ 60,000 કર્મચારીઓને સ્વૈચ્છિક રીતે નોકરી છોડવાનો વિકલ્પ આપ્યો છે. આ સંખ્યા કંપનીના કુલ કર્મચારીબળના લગભગ ચોથા ભાગ જેટલી હોવાનું જણાવાયું છે.
