Mumbai : મુંબઈની ધારાવી વસાહતના પુનર્વિકાસ પ્રોજેક્ટને મહત્વપૂર્ણ ગતિ મળી છે. અદાણી એન્ટરપ્રાઇઝિસ લિમિટેડના ડિરેક્ટર પ્રણવ અદાણીના હસ્તે સોમવારે માટુંગાની 22 એકર રેલવે સાઇટ પર ભૂમિપૂજન કરવામાં આવ્યું હતું. આ સાથે ધારાવીના રહેવાસીઓના પુનર્વસન માટે બાંધકામની શરૂઆત થઈ છે.
ધારાવી એશિયાની સૌથી મોટી વસાહતોમાંની એક છે, જ્યાં 10 લાખથી વધુ લોકો વસવાટ કરે છે. આ પ્રોજેક્ટ હેઠળ પાત્ર રહેવાસીઓને હાલના વિસ્તારમાં જ 350 ચોરસ ફૂટનાં મકાનો આપવાની યોજના છે. આ કામગીરી માટે અદાણી નવભારત ડેવલપર્સ પ્રાઇવેટ લિમિટેડ નામની સ્પેશિયલ પર્પઝ વેહિકલ કંપનીની રચના કરવામાં આવી છે.
10 ટાવરમાં 10,432 ઘરનું નિર્માણ
માટુંગા ખાતે કુલ 10 ટાવર બનાવવામાં આવશે, જેમાં 10,432 રહેણાંક ઘરો ઉપરાંત 1,379 વ્યાવસાયિક અને ઔદ્યોગિક એકમોનો સમાવેશ થશે. પ્રણવ અદાણીએ જણાવ્યું હતું કે દરેક પરિવારને સુરક્ષિત ઘર અને પોતાના ભવિષ્યનું આયોજન કરવાની તક મળવી જોઈએ. આ પ્રોજેક્ટનો હેતુ પરિવારોને વધુ સારી જીવનશૈલી અને બાળકો માટે ઉજ્જવળ ભવિષ્ય પૂરું પાડવાનો છે.
ત્રણ તબક્કામાં પૂર્ણ થશે બાંધકામ
પ્રોજેક્ટના 10 ટાવર મહારાષ્ટ્ર સરકારના ધારાવી પુનર્વિકાસ પ્રોજેક્ટ/ઝૂંપડપટ્ટી પુનર્વસન સત્તામંડળ (DRP/SRA)ને ત્રણ તબક્કામાં સોંપવામાં આવશે.
- પ્રથમ પાંચ ટાવર માર્ચ 2029 સુધીમાં સોંપવાનું આયોજન છે.
- ત્યારબાદના બે ટાવર ઑગસ્ટ 2029 સુધીમાં સોંપવામાં આવશે.
- બાકીના ત્રણ ટાવર ઑગસ્ટ 2030 સુધીમાં પૂર્ણ કરીને સોંપવાનું આયોજન છે.
આધુનિક સુવિધાઓથી સજ્જ હશે ટાવર
દરેક ટાવરમાં 37થી 39 માળ હશે. રહેવાસીઓની સુવિધા માટે 10થી 12 પેસેન્જર લિફ્ટ અને બે ફાયર લિફ્ટની વ્યવસ્થા કરવામાં આવશે. આ ઉપરાંત વ્યાવસાયિક અને ઔદ્યોગિક એકમો માટે વધારાની બે લિફ્ટ રાખવામાં આવશે.
પ્રોજેક્ટમાં કિન્ડરગાર્ટન, કોમ્યુનિટી હોલ, પોડિયમ ગાર્ડન્સ, બેસવાની જગ્યાઓ, સોસાયટીની ઓફિસ અને પૂજાનાં સ્થળો જેવી સુવિધાઓનો સમાવેશ થશે. ઇમારતોની જાળવણી માટે દરેક પુનર્વસન બિલ્ડિંગમાં 10 ટકા વ્યાવસાયિક જગ્યા અનામત રાખવામાં આવશે. બાંધકામ પૂર્ણ થયા બાદ પ્રથમ 10 વર્ષ સુધી વિકાસકાર દ્વારા ઇમારતો અને સહિયારી માળખાગત સુવિધાઓની જાળવણી કરવામાં આવશે.
ધારાવી એક્સપિરિયન્સ સેન્ટરનું પણ ઉદ્ઘાટન
મહાત્મા ગાંધીની 157મી જન્મજયંતિ નિમિત્તે ગાંધી જયંતીના દિવસે મહારાષ્ટ્રના મુખ્યમંત્રી દેવેન્દ્ર ફડણવીસે ધારાવી એક્સપિરિયન્સ સેન્ટરનું ઉદ્ઘાટન કર્યું હતું. આ પ્રસંગે ધારાવીને સમર્પિત ગીતનું અનાવરણ અને વિસ્તારના લોકો, સંસ્કૃતિ તથા ઇતિહાસ પર આધારિત કોફી-ટેબલ બુકનું વિમોચન પણ કરવામાં આવ્યું હતું.
22,500 ચોરસ ફૂટમાં ફેલાયેલા આ સેન્ટરમાં નમૂનારૂપ ઘરો, 3D વોકથ્રુ અને ઇન્ટરેક્ટિવ ડિસ્પ્લે દ્વારા પ્રસ્તાવિત પુનર્વિકાસની ઝલક રજૂ કરવામાં આવે છે. તેમાં રહેઠાણ, કાર્યસ્થળો, પરિવહન, જાહેર સુવિધાઓ અને ખુલ્લી જગ્યાઓની માહિતીનો સમાવેશ થાય છે.
આંતરરાષ્ટ્રીય નિષ્ણાતોની મદદ લેવાશે
પ્રોજેક્ટના આયોજન અને ડિઝાઇન માટે અમેરિકાની સસાકી, બ્રિટનની બ્યુરો હેપોલ્ડ, મુંબઈની સ્ટુડિયોપીઓડી, જાણીતા આર્કિટેક્ટ હાફિઝ કોન્ટ્રાક્ટર, P&T, ARC સ્ટુડિયો અને સિંગાપોરના શહેરી આયોજન નિષ્ણાતોની કુશળતાનો ઉપયોગ કરવામાં આવ્યો છે.
આ પ્રસંગે મહારાષ્ટ્ર સરકારના શહેરી વિકાસ વિભાગના અધિક મુખ્ય સચિવ અસીમ કુમાર ગુપ્તા અને DRP/SRAના મુખ્ય કાર્યકારી અધિકારી ડૉ. મહેન્દ્ર કલ્યાણકર સહિતના અધિકારીઓ ઉપસ્થિત રહ્યા હતા.
ડૉ. મહેન્દ્ર કલ્યાણકરે જણાવ્યું હતું કે ધારાવીના પરિવારો માટે આ મહત્વપૂર્ણ પગલું છે. પ્રોજેક્ટનો ઉદ્દેશ્ય રહેવાસીઓને બહેતર જીવનધોરણ અને જરૂરી માળખાગત સુવિધાઓ ઉપલબ્ધ કરાવવાનો છે. કંપનીના CEO અનિલ સરદાનાએ પણ બાંધકામ સમયસર પૂર્ણ કરવા અને લાંબા ગાળાની જાળવણી પર ભાર મૂક્યો હતો.
15 મિનિટમાં મળશે આવશ્યક સેવાઓ
ધારાવીના વ્યાપક પુનર્વિકાસ હેઠળ દુકાનો, શાળાઓ, આરોગ્યસંભાળ કેન્દ્રો, પૂજાનાં સ્થળો, ઉદ્યાનો, જાહેર પરિવહન અને અન્ય સામાજિક સુવિધાઓ સાથે મિશ્ર-ઉપયોગવાળી ટાઉનશીપ વિકસાવવાની યોજના છે. આયોજન મુજબ રહેવાસીઓને આવશ્યક સેવાઓ 15 મિનિટના અંતરમાં ઉપલબ્ધ થાય તે રીતે સુવિધાઓ ઊભી કરવામાં આવશે.
આ પ્રોજેક્ટ પૂર્ણ થયા બાદ ધારાવીના રહેવાસીઓને આધુનિક રહેઠાણ અને સુધારેલી માળખાગત સુવિધાઓ પૂરી પાડવાની દિશામાં મહત્વપૂર્ણ પરિવર્તન થવાની અપેક્ષા છે.
