ઉત્તર પ્રદેશના એટામાંથી એક એવી ઘટના સામે આવી છે, જેણે માનવતાને શરમાવી પણ છે અને માનવતાનું ઉત્તમ ઉદાહરણ પણ પૂરું પાડ્યું છે. ઘઉંની વાવણી માટે ખેતરમાં ખેડાણ કરી રહેલા એક ખેડૂતને જમીનની નીચે દટાયેલી નવજાત બાળકી મળી આવી હતી. માસૂમ બાળકીની હાલત જોઈને ખેડૂત અને તેની પત્ની ચોંકી ગયાં હતાં. બાળકીના મોઢામાં માટી ભરાયેલી હતી અને તેનો જીવ જોખમમાં હતો. દંપતીએ સમય ગુમાવ્યા વિના બાળકીને માટીમાંથી બહાર કાઢી હોસ્પિટલ પહોંચાડી હતી. સમયસર સારવાર મળતાં બાળકીની હાલતમાં સુધારો થઈ રહ્યો હોવાનું જાણવા મળ્યું છે.
આ ઘટના રાજા કા રામપુર પોલીસ સ્ટેશન વિસ્તારના લુહારી ખેડા ગામના નગલા બંજારા વિસ્તારની છે. શનિવારે ખેડૂત જિતેન્દ્ર સિંહ પોતાના ખેતરમાં ઘઉંની વાવણીની તૈયારી કરી રહ્યા હતા. આ દરમિયાન ખેતરમાં હળ ચલાવતી વખતે અચાનક હળ અટકી ગયું હતું. ખેડૂતે રોકાઈને ધ્યાનથી તપાસ કરતાં જમીનની અંદર એક નવજાત બાળકી દેખાઈ હતી. આ દૃશ્ય જોઈને તેઓ ચોંકી ગયા હતા. તેમણે તરત જ પોતાની પત્ની રીના દેવીને બોલાવી હતી. ત્યારબાદ બંનેએ સાથે મળીને માટી હટાવી બાળકીને બહાર કાઢી હતી.
બાળકીના મોઢામાં ભરાઈ હતી માટી, દંપતી તાત્કાલિક હોસ્પિટલ દોડ્યું
નવજાત બાળકીની હાલત અત્યંત નાજુક હતી. તેના મોઢામાં માટી ભરાઈ ગઈ હતી અને તે જીવન માટે સંઘર્ષ કરી રહી હતી. ખેડૂત દંપતીએ જરાય મોડું કર્યા વિના બાળકીને અલીગંજ સામુદાયિક આરોગ્ય કેન્દ્ર (CHC) પહોંચાડી હતી. અહીં ડોક્ટરોએ બાળકીની સારવાર શરૂ કરી હતી. સમયસર હોસ્પિટલ પહોંચાડવામાં આવતાં તેને જરૂરી તબીબી સારવાર મળી શકી હતી. હાલ બાળકીની સ્થિતિમાં સુધારો થઈ રહ્યો હોવાનું જણાવવામાં આવ્યું છે.
6 દીકરાના પરિવારમાં દીકરીની કિલકારી ગુંજવાની આશા
આ ઘટનાનો સૌથી ભાવુક પાસું ખેડૂત પરિવાર સાથે જોડાયેલો છે. જિતેન્દ્ર સિંહ અને તેમની પત્ની રીના દેવીને પહેલેથી જ છ દીકરા છે. દંપતી લાંબા સમયથી દીકરીની ઇચ્છા રાખતું હતું. ખેતરમાંથી મળેલી આ નવજાત બાળકીને તેમણે પોતાની દીકરીની જેમ ઉછેરવાની ઇચ્છા વ્યક્ત કરી છે. પરિવારના આ નિર્ણયથી છ ભાઈઓને બહેન મળવાની આશા જાગી છે. જોકે, બાળકીને પરિવારને સોંપવાની અને તેની સંભાળની પ્રક્રિયા સંબંધિત વિભાગના નિયમો અનુસાર જ પૂર્ણ કરવામાં આવશે.
ગામના લોકો કરી રહ્યા છે માતા સીતાની સાથે સરખામણી
ખેતરમાં હળ ચલાવતી વખતે નવજાત બાળકી મળી આવવાની આ ઘટના સમગ્ર વિસ્તારમાં ચર્ચાનો વિષય બની છે. ગામના લોકો આ ઘટનાની સરખામણી ત્રેતાયુગમાં રાજા જનકને ખેતરમાં હળ ચલાવતી વખતે મળેલાં માતા સીતા સાથે કરી રહ્યા છે. લોકોનું કહેવું છે કે જે રીતે પૌરાણિક કથામાં માતા સીતા ખેતરમાંથી મળી આવ્યાં હતાં, તેવી જ રીતે આ ખેડૂતને પણ ખેતરમાંથી એક નાનકડી બાળકી મળી છે. આ ઘટનાને લઈને ગામમાં અનેક પ્રકારની ચર્ચાઓ થઈ રહી છે.
પોલીસ અને ચાઇલ્ડ કેર યુનિટ સક્રિય
પોલીસ સ્ટેશનના પ્રભારી રોહિત રાઠીના જણાવ્યા અનુસાર, નવજાત બાળકીને અલીગંજ સામુદાયિક આરોગ્ય કેન્દ્રમાં દાખલ કરવામાં આવી છે. આ મામલાની જાણ ચાઇલ્ડ કેર યુનિટને પણ કરવામાં આવી છે. બાળકીને માટીમાંથી બહાર કાઢીને હોસ્પિટલ પહોંચાડનાર ખેડૂત દંપતીની સમગ્ર વિસ્તારમાં પ્રશંસા થઈ રહી છે. બીજી તરફ, બાળકીને ખેતરમાં કોણ અને કયા સંજોગોમાં મૂકીને ગયું હતું તે અંગે પોલીસ તપાસ કરી રહી છે.
