સીએટલ, અમેરિકા: ભારતના 80મા સ્વતંત્રતા દિવસની ઉજવણી નિમિત્તે અમેરિકાના સીએટલ સ્થિત કોન્સ્યુલેટ જનરલ ઑફ ઇન્ડિયા દ્વારા દેશભક્તિ અને રાષ્ટ્રીય ગૌરવથી સભર વિશેષ કાર્યક્રમનું આયોજન કરવામાં આવ્યું હતું. આ કાર્યક્રમ દરમિયાન યોજાયેલી ‘રાષ્ટ્રધ્વજ ક્વિઝ’ સ્પર્ધામાં ગુજરાતના ભાવનગરના સિદ્ધાર્થ અજયભાઈ શેઠે વિજેતા બની ગૌરવપૂર્ણ સિદ્ધિ હાંસલ કરી હતી.
આ નોંધપાત્ર સિદ્ધિ બદલ ભારતીય ક્રિકેટ જગતના દિગ્ગજ, પદ્મભૂષણથી સન્માનિત અને ‘લિટલ માસ્ટર’ તરીકે જાણીતા સુનીલ ગાવસ્કરના હસ્તે સિદ્ધાર્થ શેઠનું વિશેષ સન્માન કરવામાં આવ્યું હતું. ક્રિકેટના મહાન ખેલાડીના હસ્તે મળેલું આ સન્માન સિદ્ધાર્થ માટે ગૌરવપૂર્ણ ક્ષણ બની રહ્યું હતું.
આ પ્રસંગે સીએટલના કોન્સ્યુલ જનરલ ઑફ ઇન્ડિયા પ્રકાશ ગુપ્તા સહિત સ્થાનિક મેયર, સાંસદો, વિવિધ ક્ષેત્રોના અગ્રણીઓ, ઉદ્યોગપતિઓ, CEO તેમજ ભારતીય સમુદાયના અનેક મહાનુભાવો ઉપસ્થિત રહ્યા હતા.
અમેરિકાની ધરતી પર આયોજિત આ કાર્યક્રમમાં ભારતીય રાષ્ટ્રીય ગૌરવ, દેશભક્તિ અને સાંસ્કૃતિક વારસાની ઉજવણી કરવામાં આવી હતી. આ દરમિયાન ભાવનગરના સિદ્ધાર્થ શેઠે ‘રાષ્ટ્રધ્વજ ક્વિઝ’માં વિજેતા બની ગુજરાત અને ભાવનગરનું નામ ગૌરવભેર રોશન કર્યું હતું.
સુનીલ ગાવસ્કર જેવા ક્રિકેટ જગતના દિગ્ગજના હસ્તે મળેલું સન્માન અને ભારતીય રાષ્ટ્રીય પર્વના આંતરરાષ્ટ્રીય મંચ પર મળેલી આ ઓળખ સિદ્ધાર્થ શેઠ માટે યાદગાર સિદ્ધિ બની છે.
