માતા બનવું દરેક મહિલાના જીવનનો એક ખાસ અનુભવ હોય છે. પરંતુ શું તમે ક્યારેય વિચાર્યું છે કે એક મહિલા પોતાના સમગ્ર જીવનમાં વધુમાં વધું કેટલાં બાળકોને જન્મ આપી શકે? આવો જાણીએ વિજ્ઞાન શું કહે છે અને કઈ મહિલાએ દુનિયામાં સૌથી વધુ બાળકોને જન્મ આપવાનો રેકોર્ડ બનાવ્યો છે.
માતા બનવું એક સુંદર અનુભવ છે. જોકે, આ દરમિયાન મહિલાના શરીરમાં અનેક પ્રકારના ફેરફારો થાય છે. મહિલાનું શરીર બાળકને જન્મ આપવા માટે જ બનેલું હોય છે. મહિલાઓમાં પ્રજનનક્ષમ ઉંમરની શરૂઆત સામાન્ય રીતે 12-13 વર્ષની આસપાસ થાય છે અને તે લગભગ 45-50 વર્ષ સુધી રહી શકે છે.
આ રીતે જોઈએ તો એક મહિલા લગભગ 35-40 વર્ષ સુધી બાળકને જન્મ આપવાની ક્ષમતા ધરાવી શકે છે. મહિલાના શરીરમાં સામાન્ય રીતે દર મહિને એક એગ (Egg) તૈયાર થાય છે. જો ગર્ભધારણ થાય તો લગભગ 9 મહિના બાદ બાળકનો જન્મ થાય છે. આ ગણતરી પ્રમાણે જોવામાં આવે તો દર વર્ષે એક બાળકનો જન્મ થઈ શકે છે અને 35-40 બાળકો સુધી શક્ય લાગે છે. જોકે, સામાન્ય રીતે આ લગભગ અશક્ય છે.
તેની પાછળ અનેક કારણો છે. ગર્ભાવસ્થા દરમિયાન અને પ્રસૂતિ બાદ મહિલાના શરીરને પૂરતા આરામની જરૂર હોય છે. ઘણી વખત સ્તનપાન કરાવવાને કારણે પણ થોડા સમય સુધી ફરીથી ગર્ભધારણ થતું નથી. આ ઉપરાંત વારંવાર ગર્ભાવસ્થા અને પ્રસૂતિને કારણે સ્વાસ્થ્ય સમસ્યાઓ, થાક, પોષણની ઉણપ જેવી સમસ્યાઓ પણ થઈ શકે છે.
Guinness World Records અનુસાર, વિશ્વના ઇતિહાસમાં સૌથી વધુ બાળકોની માતા તરીકે રશિયાની વેલેન્ટિના વાસિલ્યેવાનું નામ નોંધાયેલું છે. 18મી સદીમાં તેમણે કુલ 69 બાળકોને જન્મ આપ્યો હતો.
આ માટે તેઓ કુલ 27 વખત ગર્ભવતી થઈ હતી. તેમાં તેણે 16 વખત જોડિયા બાળકોને જન્મ આપ્યો, 7 વખત ત્રણ બાળકો એટલે કે ટ્રિપ્લેટ્સને જન્મ આપ્યો અને 4 વખત ચાર બાળકો એટલે કે ક્વાડ્રુપ્લેટ્સને જન્મ આપ્યો. કહેવાય છે કે તેમના 69માંથી 67 બાળકો બાળપણથી આગળ જીવિત રહ્યા હતા. આ રેકોર્ડ શક્ય બનવાનું મુખ્ય કારણ એ હતું કે તેમના ઘણા બાળકો એક સાથે એટલે કે મલ્ટિપલ બર્થમાં જન્મ્યા હતા. એક પછી એક 69 બાળકોને જન્મ આપવો અત્યંત મુશ્કેલ છે.
36 વર્ષની ઉંમરે 44 બાળકોને જન્મ
આધુનિક સમયની વાત કરીએ તો યુગાન્ડાની મરિયમ નબાતાંજીએ 36 વર્ષની ઉંમર સુધીમાં 44 બાળકોને જન્મ આપ્યો હોવાનું જણાવાય છે. આજના સમયમાં IVF અને કેટલીક દવાઓની મદદથી જોડિયા કે ત્રણ બાળકોનો જન્મ થવાની શક્યતા વધી શકે છે. જોકે, ડૉક્ટરો સામાન્ય રીતે બે-ત્રણથી વધુ એમ્બ્રિયો મૂકવાની સલાહ આપતા નથી, કારણ કે તેનાથી માતા અને બાળકો બંને માટે જોખમ વધી શકે છે. નવ બાળકો એટલે કે નોનપ્લેટ્સના જન્મનો રેકોર્ડ પણ છે, પરંતુ આ પ્રકારની પ્રેગ્નન્સીમાં બાળકોનું જીવિત રહેવું ખૂબ જ મુશ્કેલ હોય છે.
સામાન્ય મહિલા કેટલાં બાળકોને જન્મ આપી શકે?
ડૉક્ટરોના મતે, કોઈ સામાન્ય સ્વસ્થ મહિલા માટે બાળકોની ચોક્કસ મહત્તમ સંખ્યા નક્કી કરી શકાતી નથી. મહિલાની ઉંમર, સ્વાસ્થ્ય, ગર્ભાવસ્થા વચ્ચેનું અંતર, પોષણ અને અગાઉની પ્રસૂતિ સહિત અનેક બાબતો તેના પર આધાર રાખે છે.
69 બાળકોનો આંકડો અત્યંત દુર્લભ અને ઐતિહાસિક રેકોર્ડ છે. આજના સમયમાં મોટાભાગના પરિવારો સામાન્ય રીતે 1થી 3 બાળકો સુધી જ સીમિત રહે છે, જેથી દરેક બાળકને યોગ્ય સંભાળ અને સારું ભવિષ્ય આપી શકાય.
