અમદાવાદ : કેલોરેક્સ ફ્યુચર સ્કૂલ, ઘાટલોડિયા ખાતે 80મો સ્વાતંત્ર્ય દિવસ દેશભક્તિના ભારે ઉમંગ અને ઉત્સાહ સાથે ઉજવવામાં આવ્યો હતો. આ ખાસ દિવસ પર વિદ્યાર્થીઓ, શિક્ષકો, વાલીઓ અને આખા શાળા પરિવારે સાથે મળીને તિરંગાને સલામી આપી હતી અને આપણા દેશના આઝાદીના વીરોને આદરપૂર્વક શ્રદ્ધાંજલિ આપી હતી.
આ ઉજવણીમાં ઘાટલોડિયા પોલીસ સ્ટેશનના PSI સુશ્રી અંકિતા શાહ મુખ્ય અતિથિ તરીકે હાજર રહ્યા હતા. તેમની સાથે કેલોરેક્સ ગ્રુપના ડિરેક્ટર ઑફ એકેડેમિક્સ સુશ્રી આરતી મિશ્રા પણ ઉપસ્થિત રહ્યા હતા. કાર્યક્રમની શરૂઆત રાષ્ટ્રધ્વજ ફરકાવીને કરવામાં આવી હતી, ત્યારબાદ સૌએ સાથે મળીને ‘વંદે માતરમ્’, ધ્વજગીત અને રાષ્ટ્રગાન ગાયું હતું.
શાળાના કાઉન્સિલ મેમ્બર્સે શિસ્તબદ્ધ માર્ચ પાસ્ટ કરી હતી, જેમાં બાળકોમાં નેતૃત્વ અને જવાબદારીની સુંદર ઝલક જોવા મળી હતી. આ પ્રસંગે મુખ્ય અતિથિ સુશ્રી અંકિતા શાહ અને સુશ્રી આરતી મિશ્રાએ બાળકોને પ્રેરણા આપતી સુંદર વાતો કહી હતી. સાથે જ ધોરણ 10-Cના હેડ બોય દેવેન્દ્ર શર્માએ પણ પોતાના વિચારો રજૂ કર્યા હતા.
પ્રિ-પ્રાઇમરી તેમજ ધોરણ 1 અને 2ના નાના-નાના ભૂલકાંઓએ દેશભક્તિના ગીતો પર એવી સુંદર રજૂઆત કરી કે સૌના દિલ જીતી લીધા. આ સિવાય, ધોરણ 9ના વિદ્યાર્થીઓએ સેલ્ફ-ડિફેન્સના કૌશલ્ય બતાવ્યા હતા અને સુંદર સાંસ્કૃતિક કાર્યક્રમ પણ રજૂ કર્યો હતો.
શાળામાં યોજાયેલી વિવિધ સ્પર્ધાઓએ ઉજવણીનો રંગ બમણો કર્યો હતો. આર્ટ એન્ડ ક્રાફ્ટ સ્પર્ધામાં 52 વિદ્યાર્થીઓએ પોતાની કળા અને સર્જનાત્મકતા બતાવી હતી, તો ધોરણ 6થી 8ના 20 બાળકોએ દેશભક્તિના સુંદર પોસ્ટર્સ બનાવ્યા હતા. આ સિવાય, ધોરણ 3થી 8ના 32 બાળકોએ રાખડી બનાવીને આ ઉત્સવને વધુ ખાસ બનાવ્યો હતો.
કાર્યક્રમના અંતે પર્યાવરણના જતન માટે એક સુંદર પહેલ કરવામાં આવી હતી, જેમાં વાલીઓ અને બાળકોને 150થી વધુ તુલસીના છોડ ભેટ આપ્યા હતા અને સૌને પ્રકૃતિની સંભાળ રાખવા માટે પ્રોત્સાહિત કરાયા હતા.
