દર મહિનાની પહેલી તારીખે કોમર્શિયલ અને ઘરેલું ગેસ સિલિન્ડરની કિંમતોની સમીક્ષા કરવામાં આવે છે, પરંતુ આ વખતે 1 મે 2026થી માત્ર કિંમતોમાં જ નહીં, પણ બુકિંગ અને ડિલિવરી પ્રક્રિયામાં પણ કેટલાક મહત્વપૂર્ણ ફેરફારો થવાની શક્યતા છે. સરકારી તેલ કંપનીઓ જેવી કે Indian Oil Corporation, Bharat Petroleum અને Hindustan Petroleum તેમની ડિલિવરી સિસ્ટમને વધુ પારદર્શક અને સુરક્ષિત બનાવવા માટે નવા નિયમો લાગુ કરવાની તૈયારીમાં છે. આ ફેરફારોનો મુખ્ય હેતુ ગેસની કાળાબજારી રોકવી અને યોગ્ય ગ્રાહક સુધી સબસિડી અને સિલિન્ડર પહોંચાડવાનો છે.
ડિલિવરી ઓથેન્ટિકેશન કોડ (DAC) ફરજિયાત
1 મે પછી ‘ડિલિવરી ઓથેન્ટિકેશન કોડ (DAC)’ વધુ મહત્વનો બની શકે છે. અત્યાર સુધી કેટલાક વિસ્તારોમાં OTP વગર પણ ડિલિવરી થઈ જતી હતી, પરંતુ હવે તેને ફરજિયાત બનાવવામાં આવી શકે છે. તેનો અર્થ એ છે કે ડિલિવરી બોય તમારા ઘરે સિલિન્ડર લાવશે ત્યારે તમારા રજિસ્ટર્ડ મોબાઇલ નંબર પર એક કોડ આવશે. તે કોડ મશીનમાં દાખલ કર્યા પછી જ ડિલિવરી પૂર્ણ માનવામાં આવશે. જો તમારો મોબાઇલ નંબર ગેસ એજન્સી પાસે અપડેટેડ નથી, તો તમને સિલિન્ડર મેળવવામાં મુશ્કેલી પડી શકે છે. તેથી ગ્રાહકોને સમયસર પોતાનો નંબર અને સરનામું અપડેટ કરવાની સલાહ આપવામાં આવી રહી છે.
કિંમતોમાં ફેરફારની શક્યતા
1 મેના રોજ ગેસ સિલિન્ડરની કિંમતોમાં પણ ફેરફાર થઈ શકે છે. વૈશ્વિક બજારમાં કાચા તેલ અને આંતરરાષ્ટ્રીય ગેસના ભાવમાં ઉતાર-ચઢાવને ધ્યાનમાં રાખીને દર મહિને નવા રેટ નક્કી કરવામાં આવે છે. છેલ્લા કેટલાક અઠવાડિયાઓમાં ઊર્જા ક્ષેત્રમાં અસ્થિરતા જોવા મળતા નિષ્ણાતો માને છે કે કોમર્શિયલ સિલિન્ડરના ભાવમાં થોડો વધારો અથવા ઘટાડો થઈ શકે છે. ઘરેલુ ગેસ સિલિન્ડર અંગે સરકારનો વલણ હાલમાં રાહત આપનારું છે, પરંતુ સત્તાવાર જાહેરાત 1 મેની સવારે જ થશે.
KYC અને એડ્રેસ વેરિફિકેશન કડક બનશે
રિપોર્ટ્સ મુજબ, જે ગ્રાહકોની KYC લાંબા સમયથી પેન્ડિંગ છે, તેમના માટે નિયમો વધુ કડક બની શકે છે. તેલ કંપનીઓ એવા કનેક્શનોની તપાસ કરી રહી છે જે લાંબા સમયથી નિષ્ક્રિય છે અથવા એક જ નામે અનેક કનેક્શન ચાલી રહ્યા છે. 1 મેથી આવી ચકાસણી વધુ સખત થઈ શકે છે. તે સિવાય, જે લોકો ઘર બદલે છે પરંતુ સરનામું અપડેટ નથી કરતા, તેમને બુકિંગ વખતે મુશ્કેલીઓ આવી શકે છે. સરકાર ‘One Nation, One Gas Connection’ જેવી પારદર્શિતા લાવવાનો પ્રયાસ કરી રહી છે જેથી સબસિડી યોગ્ય લોકોને મળે.
ડિજિટલ બુકિંગને પ્રોત્સાહન
1 મેથી ડિજિટલ પેમેન્ટ અને બુકિંગને વધુ પ્રોત્સાહન મળશે. કંપનીઓ ઇચ્છે છે કે ગ્રાહકો એજન્સી પર જવાની બદલે મોબાઇલ એપ, વોટ્સએપ અથવા ઓનલાઈન પોર્ટલ દ્વારા બુકિંગ અને પેમેન્ટ કરે. કેટલાક કેસમાં ઓનલાઈન પેમેન્ટ કરનાર ગ્રાહકોને રિવોર્ડ્સ અથવા ઝડપી ડિલિવરી જેવી સુવિધા પણ મળી શકે છે. આથી સમયની બચત થશે અને કેશલેસ ટ્રાન્ઝેક્શનને પણ વેગ મળશે.
