અમદાવાદ: શિક્ષક દિન નિમિત્તે વિદ્યાર્થીઓને શિક્ષકના પવિત્ર વ્યવસાયની જવાબદારી અને મહત્ત્વનો પ્રત્યક્ષ અનુભવ થાય તથા તેમનામાં નેતૃત્વ, આત્મવિશ્વાસ અને જવાબદારીની ભાવના કેળવાય તેવા હેતુથી સ્ટેટસ સ્ટડી સેન્ટર – વેજલપુર ( અમદાવાદ ) દ્વારા અનોખી રીતે શિક્ષક દિનની ઉજવણી કરવામાં આવી હતી.
આ ઉજવણી અંતર્ગત સ્ટેટસ સ્ટડી સેન્ટરના દરેક ધોરણમાંથી બે વિદ્યાર્થીઓને એક દિવસ માટે શિક્ષક બનવાની તક આપવામાં આવી હતી. વિદ્યાર્થીઓએ ઉત્સાહપૂર્વક શિક્ષકની ભૂમિકા નિભાવી વર્ગખંડમાં પોતાના સહાધ્યાયીઓને શિક્ષણ આપ્યું તથા વર્ગવ્યવસ્થાનું સંચાલન કર્યું હતું. શિક્ષકની ભૂમિકા ભજવતા વિદ્યાર્થીઓમાં વિશેષ આત્મવિશ્વાસ અને ઉત્સાહ જોવા મળ્યો હતો.
આ કાર્યક્રમનું વિશેષ આકર્ષણ એ રહ્યું કે ધોરણ-૧૨ની એક વિદ્યાર્થીનીએ આચાર્ય તરીકેની જવાબદારી સંભાળી હતી. તેણે સમગ્ર શૈક્ષણિક વ્યવસ્થાનું સંચાલન કરવાની ભૂમિકા ખૂબ જ સુંદર રીતે નિભાવી હતી. જ્યારે અન્ય એક વિદ્યાર્થીએ સેવક તરીકેની જવાબદારી સંભાળી સંસ્થાની વિવિધ વ્યવસ્થાઓમાં સેવા આપી હતી.
આ પ્રવૃત્તિ માત્ર ઉજવણી પૂરતી સીમિત ન રહેતા વિદ્યાર્થીઓ માટે એક અનોખો શૈક્ષણિક અનુભવ બની હતી. શિક્ષક બનવાથી શિક્ષણ આપવાની પ્રક્રિયા, શિસ્ત, સમયપાલન, વર્ગવ્યવસ્થાપન અને જવાબદારીનું મહત્ત્વ વિદ્યાર્થીઓને પ્રત્યક્ષ રીતે સમજવા મળ્યું હતું. સાથે સાથે સહાધ્યાયીઓએ પણ શિક્ષકની મહેનત અને જવાબદારીને નજીકથી અનુભવવાનો અવસર મેળવ્યો હતો.
કાર્યક્રમની પૂર્ણાહુતિ બાદ શિક્ષક તરીકેની સેવા બજાવનાર તમામ વિદ્યાર્થીઓને તેમજ આચાર્ય અને સેવકની ભૂમિકા નિભાવનાર વિદ્યાર્થીઓને પ્રમાણપત્ર આપી સન્માનિત કરવામાં આવ્યા હતા. આ પ્રમાણપત્ર વિદ્યાર્થીઓ માટે તેમના આ અનોખા અનુભવની યાદગાર સ્મૃતિ બની રહ્યું હતું.
સ્ટેટસ સ્ટડી સેન્ટર દ્વારા કરવામાં આવેલી આ અનોખી પહેલનો મુખ્ય હેતુ વિદ્યાર્થીઓમાં માત્ર શૈક્ષણિક જ્ઞાન નહીં, પરંતુ નેતૃત્વ, જવાબદારી, શિસ્ત, સેવાભાવ અને આત્મવિશ્વાસ જેવા જીવનમૂલ્યોનું સિંચન કરવું હતો.
આ પ્રસંગે સંસ્થા દ્વારા તમામ શિક્ષકો પ્રત્યે કૃતજ્ઞતા વ્યક્ત કરી શિક્ષક દિનની શુભેચ્છાઓ પાઠવવામાં આવી હતી.
