અમદાવાદ: ડીપીએસ બોપલ ખાતે ‘Teachers’ Day’ ખૂબ જ આનંદ, ઉત્સાહ અને કૃતજ્ઞતાની ભાવના સાથે ઉજવવામાં આવ્યો હતો. આ ખાસ અવસરે વિદ્યાર્થીઓએ પોતાના ટીચર્સ પ્રત્યેનો અદર અને સ્નેહ અનોખી રીતે વ્યક્ત કર્યો હતો, જેના કારણે સમગ્ર શાળાના કેમ્પસમાં સુંદર અને ઉલ્લાસભર્યો માહોલ જોવા મળ્યો હતો.
કાર્યક્રમનો પ્રારંભ દેવી સરસ્વતી અને ડૉ. સર્વપલ્લી રાધાકૃષ્ણનને પુષ્પાંજલિ અર્પણ કરીને થયો હતો, જે શાળાની જ્ઞાન-સમૃદ્ધિ અને શિક્ષણ જગત પ્રત્યેની અનહદ શ્રદ્ધા અને આદરને દર્શાવે છે. ત્યારબાદ વિદ્યાર્થીઓ દ્વારા રજૂ કરાયેલ ‘ગુરુ વંદના’ નૃત્ય સૌનું મન મોહી લીધું હતું.
DPS Bopal ના પ્રિન્સિપાલ સુશ્રી સબીના સાહનીએ શિક્ષણ જગત પ્રત્યે હૃદયપૂર્વક કૃતજ્ઞતા વ્યક્ત કરી હતી. તેમણે યુવા પેઢીને પ્રોત્સાહિત કરવાની, તેમનામાં જિજ્ઞાસા કેળવવાની અને દરેક વિદ્યાર્થીને આત્મવિશ્વાસ તેમજ ઉદ્દેશ્ય સાથે આગળ વધવા માટે સશક્ત બનાવવાની શિક્ષકોની અડગ પ્રતિબદ્ધતાને બિરદાવી હતી.
આ કાર્યક્રમમાં ઉત્કૃષ્ટ કામગીરી કરનાર શિક્ષકોનું વિશેષ સન્માન કરવામાં આવ્યું હતું. જેમાં 23 શિક્ષકોને ‘Kalorex Core Values Awards’ એનાયત કરવામાં આવ્યા હતા અને બોર્ડની પરીક્ષામાં શાનદાર પરિણામ લાવવામાં મહત્વની ભૂમિકા ભજવનાર 29 શિક્ષકોનું પણ વિશેષ સન્માન કરાયું હતું. આ ઉપરાંત, ‘Differentiated Instructions and Innovations in Teaching-Learning Practices’ થીમ પર આધારિત ‘એક્સેલન્ટ ટીચર્સ પ્રોગ્રામ’ (ETP) અંતર્ગત પણ ઉત્કૃષ્ટ કામગીરી બદલ શિક્ષકોને ખાસ એવોર્ડથી સન્માનિત કરવામાં આવ્યા હતા.
આ ઉજવણી દરમિયાન વિદ્યાર્થીઓએ શિક્ષકો માટે સુંદર ગીતો ગાયા હતા અને નાની નાની પ્રસ્તુતિઓ આપી હતી. શાળાના હેડ બોય અને હેડ ગર્લે પણ પોતાના વક્તવ્યમાં જીવન ઘડતરમાં શિક્ષકોના અત્યંત મહત્વપૂર્ણ યોગદાન વિશે સુંદર વાત કરી હતી. આ આખા દિવસનું સૌથી મોટું આકર્ષણ એ હતું કે વિદ્યાર્થીઓએ પોતે ‘Teacher ‘ બનીને ક્લાસરૂમમાં જઈને ભણાવવાનો અનોખો અનુભવ કર્યો હતો. આ અનુભવથી તેમને સમજાયું કે teacher બનવું અને વિદ્યાર્થીઓને ભણાવવું એ કેટલું જવાબદારીભર્યું કામ છે. અંતમાં, શિક્ષકોના સન્માન માટે ‘Flavours of Gratitude’ નામના ખાસ લંચનું આયોજન કરવામાં આવ્યું હતું અને વાઈસ હેડ બોય તથા વાઈસ હેડ ગર્લે ઉપસ્થિત સૌનો આભાર માન્યો હતો. આખો દિવસ અસંખ્ય ખુશીઓ અને સુંદર યાદગાર ક્ષણોથી છલકાઈ રહ્યો હતો.
