અમદાવાદ : વિદ્યાર્થીઓમાં વિજ્ઞાન અને ટેક્નોલોજી પ્રત્યે જિજ્ઞાસા તથા વૈજ્ઞાનિક વિચારસરણીને પ્રોત્સાહન આપવા માટે ગુજરાત સાયન્સ સિટી દ્વારા **ગુજરાત કાઉન્સિલ ઓન સાયન્સ એન્ડ ટેક્નોલોજી (GUJCOST)**ના સહયોગથી ‘Science Safar 2026: Expository Visit to Science City for School Students’ કાર્યક્રમનું આયોજન કરવામાં આવી રહ્યું છે.
આ પહેલનો મુખ્ય ઉદ્દેશ્ય શાળાના વિદ્યાર્થીઓને વિજ્ઞાન અને ટેક્નોલોજીનું પ્રાયોગિક, અનુભવ આધારિત અને રસપ્રદ શિક્ષણ પૂરું પાડવાનો છે. ખાસ કરીને ગ્રામ્ય અને અંતરિયાળ વિસ્તારોની શાળાઓના વિદ્યાર્થીઓને પણ વિજ્ઞાનને વર્ગખંડની બહાર પ્રત્યક્ષ અનુભવ સાથે સમજવાની તક મળે તે માટે આ કાર્યક્રમ તૈયાર કરવામાં આવ્યો છે.
‘સાયન્સ સફર 2026’ના પ્રથમ તબક્કામાં ગાંધીનગર જિલ્લાના 82 શાળાઓના આશરે 4,100 વિદ્યાર્થીઓ ગુજરાત સાયન્સ સિટીની મુલાકાત લઈ રહ્યા છે. મુલાકાત દરમિયાન વિદ્યાર્થીઓ સાયન્સ સિટીની વિવિધ વિજ્ઞાન અને ટેક્નોલોજી આધારિત ગેલેરીઓ તથા પ્રદર્શનોનો અનુભવ કરશે.
ઇન્ટરેક્ટિવ એક્ઝિબિટ્સ, વૈજ્ઞાનિક નિદર્શનો અને અનુભવ આધારિત પ્રવૃત્તિઓ દ્વારા વિદ્યાર્થીઓને વિવિધ વૈજ્ઞાનિક સિદ્ધાંતોને સરળ અને રસપ્રદ રીતે સમજવાની તક મળશે. આ સાથે પાઠ્યપુસ્તકોમાં શીખેલા વૈજ્ઞાનિક ખ્યાલોને તેમના પ્રાયોગિક ઉપયોગ સાથે જોડવાનો પણ પ્રયાસ કરવામાં આવશે. કાર્યક્રમ અંતર્ગત વિદ્યાર્થીઓને ગુજરાત સાયન્સ સિટી અને GUJCOSTના માર્ગદર્શન હેઠળ વિવિધ STEM આધારિત શૈક્ષણિક પ્રવૃત્તિઓ સાથે પણ જોડવામાં આવી રહ્યા છે. Science, Technology, Engineering અને Mathematics જેવા ક્ષેત્રોને પ્રાયોગિક અને અનુભવ આધારિત રીતે સમજવાની તક મળવાથી વિદ્યાર્થીઓમાં જિજ્ઞાસા, અવલોકનશક્તિ, પ્રશ્ન પૂછવાની વૃત્તિ અને વૈજ્ઞાનિક વિચારસરણી વિકસાવવામાં મદદ મળશે.
વિદ્યાર્થીઓની મુલાકાતને સરળ અને સુગમ બનાવવા માટે GSRTC દ્વારા પરિવહનની સુવિધા પણ ઉપલબ્ધ કરાવવામાં આવી રહી છે. ‘સાયન્સ સફર 2026’નું આયોજન શૈક્ષણિક વર્ષ 2026-27 દરમિયાન ફેબ્રુઆરી 2027 સુધી કરવામાં આવ્યું છે. આ પહેલને વધુ વ્યાપક બનાવતા સમગ્ર ગુજરાતના વિવિધ જિલ્લાઓમાંથી વધુમાં વધુ શાળાઓ અને વિદ્યાર્થીઓને સાયન્સ સિટીની મુલાકાતનો લાભ મળે તે માટે આયોજન કરવામાં આવી રહ્યું છે. આ પહેલ દ્વારા વિદ્યાર્થીઓને વિજ્ઞાનને માત્ર પાઠ્યપુસ્તકના વિષય તરીકે નહીં, પરંતુ જોવા, સમજવા, પ્રશ્નો પૂછવા અને પ્રયોગ દ્વારા શીખવાના જીવંત અનુભવ તરીકે સમજવાની તક મળશે.
