વોશિંગ્ટન: ગુજરાતના મુખ્યમંત્રી ભૂપેન્દ્ર પટેલે વોશિંગ્ટન ખાતે વર્લ્ડ બેંકના ઉચ્ચ અધિકારીઓ સાથે રાઉન્ડ ટેબલ બેઠક યોજી હતી. બેઠક દરમિયાન મુખ્યમંત્રીએ ગુજરાતના આર્થિક વિકાસ, નાણાકીય વ્યવસ્થાપન તેમજ સરકારી સેવાઓમાં આર્ટિફિશિયલ ઇન્ટેલિજન્સ (AI)ના ઉપયોગ અંગે રાજ્યનું વિઝન રજૂ કર્યું હતું.
મુખ્યમંત્રી ભૂપેન્દ્ર પટેલે જણાવ્યું હતું કે ગુજરાત સતત નવી ટેક્નોલોજી અને નવીનતાને અપનાવીને વિકાસની દિશામાં આગળ વધી રહ્યું છે. સરકારી સેવાઓને વધુ અસરકારક, પારદર્શક અને નાગરિકલક્ષી બનાવવા માટે AI જેવી આધુનિક ટેક્નોલોજીના ઉપયોગ પર પણ રાજ્ય સરકાર ભાર આપી રહી છે.
બેઠક દરમિયાન મુખ્યમંત્રીએ દેશના અગ્રણી ફિનટેક હબ તરીકે ઉભરી રહેલી GIFT Cityનો પણ ઉલ્લેખ કર્યો હતો. તેમણે GIFT Cityને દેશના ફાયનાન્સિયલ સેક્ટરને વૈશ્વિક સ્તરે વધુ મજબૂત બનાવવાના વડાપ્રધાન નરેન્દ્ર મોદીના વિઝનને સાકાર કરતું મહત્વપૂર્ણ માધ્યમ ગણાવ્યું હતું.
મુખ્યમંત્રીએ ગુજરાતમાં થઈ રહેલા મેગા ડેવલપમેન્ટ પ્રોજેક્ટ્સ અંગે પણ વર્લ્ડ બેંકના અધિકારીઓ સાથે ચર્ચા કરી હતી. ખાસ કરીને આવા મોટા પ્રોજેક્ટ્સના ધિરાણ અને અમલીકરણ માટે વર્લ્ડ બેંક સાથે વ્યૂહાત્મક સહયોગ અને ભાગીદારીની સંભાવનાઓ અંગે વિચારોનું આદાન-પ્રદાન કરવામાં આવ્યું હતું.
મુખ્યમંત્રી ભૂપેન્દ્ર પટેલે વર્લ્ડ બેંકના પ્રતિનિધિઓને આગામી વાઈબ્રન્ટ ગુજરાત સમિટ 2027માં સહભાગી થવા માટે આમંત્રણ પણ પાઠવ્યું હતું. આ બેઠકને ગુજરાતના વિકાસ, વૈશ્વિક રોકાણ અને આંતરરાષ્ટ્રીય સંસ્થાઓ સાથેના સહયોગને વધુ મજબૂત કરવાની દિશામાં મહત્વપૂર્ણ ગણવામાં આવી રહી છે.
બેઠક દરમિયાન ગુજરાતના આર્થિક વિકાસ મોડલ, નાણાકીય વ્યવસ્થાપન, ટેક્નોલોજીના ઉપયોગ અને મોટા માળખાકીય વિકાસ પ્રોજેક્ટ્સ સહિતના વિવિધ મુદ્દાઓ પર ચર્ચા કરવામાં આવી હતી.
