વડાપ્રધાન નરેન્દ્ર મોદીએ 19 નવેમ્બરના રોજ ઉદ્યોગ જગતને દેશના આગામી વિકાસ માટે જરૂરી સુધારાઓ અંગે કોઈ પણ સંકોચ વિના સૂચનો આપવા અપીલ કરી હતી. ઉદ્યોગ સંગઠન ફિક્કી (ફેડરેશન ઓફ ઇન્ડિયન ચેમ્બર્સ ઓફ કોમર્સ એન્ડ ઇન્ડસ્ટ્રી)ની વાર્ષિક સામાન્ય સભા અને વાર્ષિક સંમેલનને સંબોધિત કરતાં વડાપ્રધાને કંપનીઓને ભારતને આત્મનિર્ભર બનાવવા પર ધ્યાન કેન્દ્રિત કરવા તેમજ કૃષિ અને તેની સાથે સંકળાયેલા ક્ષેત્રોમાં મોટા પાયે રોકાણ કરવા પણ અપીલ કરી હતી.
વડાપ્રધાન મોદીએ છેલ્લાં 12થી 13 વર્ષ દરમિયાન પોતાની સરકારની ઉપલબ્ધિઓનો ઉલ્લેખ કર્યો હતો અને સમાજના તમામ વર્ગોના પ્રયાસોની પ્રશંસા કરી હતી. તેમણે કહ્યું કે ભારતમાં વિકાસની ગતિ ખૂબ જ ઝડપી છે અને આ જ રીતે લોકો ગરીબીમાંથી બહાર આવવાની ગતિ પણ ઝડપી છે. વિશ્વ બેંકના તાજેતરના અહેવાલનો ઉલ્લેખ કરતાં મોદીએ કહ્યું કે માત્ર 12થી 13 વર્ષમાં 50 કરોડ લોકો ગરીબીમાંથી બહાર આવ્યા છે.
PM મોદીએ કહ્યું કે કોર્પોરેટ ટેક્સનો મૂળ દર 2014માં 30 ટકા હતો, જે ઘટાડીને 22 ટકા કરવામાં આવ્યો છે. આ ઉપરાંત, વાર્ષિક 12 લાખ રૂપિયા સુધીની વ્યક્તિગત આવકને પણ કરમુક્ત કરવામાં આવી છે. તેમણે સવાલ કર્યો કે સરકારે કોર્પોરેટ ટેક્સ ઘટાડ્યો છે, પરંતુ શું ઉદ્યોગ જગતે કર્મચારીઓની સંખ્યા અને તેમના પગારમાં વધારો કર્યો છે?
વડાપ્રધાને કહ્યું કે દેશ ખેડૂતો, નાના ઉદ્યોગસાહસિકો, ઉદ્યોગો, સંપત્તિનું સર્જન કરનારાઓ અને કરદાતાઓનું સન્માન કરવાથી આગળ વધે છે, તેમને દિવસ-રાત અપશબ્દો કહેવાથી નહીં. અગાઉની સરકારો પર કટાક્ષ કરતાં મોદીએ કહ્યું કે ઉદ્યોગ જગત સાથે અગાઉની સરકારોનો અનુભવ એટલો ખરાબ રહ્યો છે કે હવે તેની અસર તેમને પણ ભોગવવી પડી રહી છે.
વડાપ્રધાને કહ્યું, “આ જૂની સરકાર નથી. આ મિત્રોની સરકાર છે. આ સરકાર મિત્રતા નિભાવવાનું જાણે છે અને તમે મારા સાચા મિત્રો છો. તેથી કોઈ પણ પ્રકારના સંકોચ વિના મને ખુલ્લા દિલે લખીને જણાવો કે અત્યારે કઈ બાબતોમાં સુધારાની જરૂર છે.”
તેમણે ઉદ્યોગ જગતને આગામી 20 વર્ષ સુધી રોકાણ સંબંધિત દરેક લાંબા ગાળાના નિર્ણયનો આધાર ‘ઇન્ડિયા ફર્સ્ટ’ રાખવાની અપીલ કરી હતી. તેમણે કહ્યું કે તેનાથી દેશ આત્મનિર્ભર બનશે અને ઉદ્યોગોને પોતાનો વ્યવસાય આગળ વધારવાની નવી તકો પણ મળશે.

