Gold-Silver Price Today: સોના અને ચાંદીના ભાવમાં મોટો કડાકો, સોનું 4,715 રૂપિયા અને ચાંદી 8,269 રૂપિયા સસ્તું થયું

Rudra
3 Min Read

Gold-Silver Price Today: સોનું અને ચાંદી ખરીદવાની તૈયારી કરી રહેલા લોકો માટે મોટા સમાચાર છે. 20 નવેમ્બરના રોજ સોના અને ચાંદીના ભાવમાં ભારે ઘટાડો જોવા મળ્યો છે. મલ્ટી કોમોડિટી એક્સચેન્જ (MCX) પર સોનાનો ભાવ એક જ ઝટકામાં 4,700 રૂપિયાથી વધુ તૂટ્યો હતો, જ્યારે ચાંદીની કિંમતમાં પણ 8,000 રૂપિયાથી વધુનો ઘટાડો નોંધાયો હતો. આંતરરાષ્ટ્રીય બજારમાં પણ સોના-ચાંદીના ભાવ દબાણ હેઠળ છે. આવી સ્થિતિમાં જો તમે લગ્નપ્રસંગ કે રોકાણ માટે સોનું ખરીદવાનું આયોજન કરી રહ્યા છો, તો પહેલાં તમારા શહેરના તાજા ભાવ જાણી લેવા જરૂરી છે.

એક જ ઝટકામાં સોનું ₹4,715 અને ચાંદી ₹8,269 સસ્તુ થયું

20 નવેમ્બરની સવારે MCX પર સોનાનો ભાવ 4,715 રૂપિયા એટલે કે 3.70 ટકાના ઘટાડા સાથે ઘટીને 1,22,737 રૂપિયા પ્રતિ 10 ગ્રામ પર આવી ગયો હતો. બીજી તરફ, ચાંદીની કિંમતમાં 8,269 રૂપિયા એટલે કે 5.25 ટકાનો ઘટાડો નોંધાયો હતો અને તેનો ભાવ ઘટીને 1,49,213 રૂપિયા પ્રતિ કિલોગ્રામ થયો હતો. આ પહેલાં પણ સોનાના ભાવમાં સતત નબળાઈ જોવા મળી હતી. દિલ્હીના સરાફા બજારમાં સોનાના ભાવમાં સતત આઠમા દિવસે ઘટાડો નોંધાયો હતો. તેના એક દિવસ પહેલાં 99.9 ટકા શુદ્ધતાવાળા સોનાની કિંમતમાં 1,300 રૂપિયાનો ઘટાડો થયો હતો.

અમદાવાદમાં સોના ચાંદીનો કેટલો છે ભાવ?

બેઝનેસ વેબસાઇટ Good Returns અનુસાર અમદાવાદમાં સોનાના ભાવની વાત કરીએ તો 20 નવેમ્બર સવારે 24 કેરેટ સોનાની કિંમત ₹1,25,620 પ્રતિ 10 ગ્રામ અને 22 કેરેટ સોનાની કિંમત ₹1,15,150 પ્રતિ 10 ગ્રામ નોંધાઈ છે. જ્યારે ચાંદીના કિંમત 1,75,000 રૂપિયા પ્રતિ કિલો નોંધાઈ છે.

દિલ્હીમાં 24 કેરેટ સોનાનો ભાવ

રાજધાની દિલ્હીમાં 20 નવેમ્બરની સવારે 24 કેરેટ સોનાની કિંમત 1,25,720 રૂપિયા પ્રતિ 10 ગ્રામ નોંધાઈ હતી. જ્યારે 22 કેરેટ સોનાનો ભાવ 1,15,250 રૂપિયા પ્રતિ 10 ગ્રામ રહ્યો હતો. બીજી તરફ, 18 કેરેટ સોનાની કિંમત 94,330 રૂપિયા પ્રતિ 10 ગ્રામ હતી. મુંબઈમાં 24 કેરેટ સોનું 1,25,570 રૂપિયા અને 22 કેરેટ સોનું 1,15,100 રૂપિયા પ્રતિ 10 ગ્રામના ભાવે વેચાઈ રહ્યું હતું. જ્યારે 18 કેરેટ સોનાનો ભાવ 94,180 રૂપિયા પ્રતિ 10 ગ્રામ નોંધાયો હતો.

ચાંદીની કિંમતમાં પણ મોટો ઘટાડો

સોનાની સાથે ચાંદીના ભાવમાં પણ નબળાઈ યથાવત્ છે. 20 નવેમ્બરની સવારે ચાંદીનો છૂટક ભાવ 1,79,900 રૂપિયા પ્રતિ કિલોગ્રામ રહ્યો હતો. દિલ્હીના સરાફા બજારમાં તેના એક દિવસ પહેલાં ચાંદીની કિંમતમાં 2,500 રૂપિયાનો ઘટાડો થયો હતો. તમને જણાવી દઈએ કે આંતરરાષ્ટ્રીય બજારમાં હાજર સોનાનો ભાવ 3,614.59 ડોલર પ્રતિ ઔંસ અને ચાંદીનો ભાવ 42.86 ડોલર પ્રતિ ઔંસ હતો.

સોના-ચાંદીના ભાવમાં ઘટાડો શા માટે થઈ રહ્યો છે?

સોનાના ભાવમાં ઘટાડા પાછળ રૂપિયો મજબૂત થવો અને અમેરિકન ફેડરલ રિઝર્વની નાણાકીય નીતિ અંગે કડક વલણ અપનાવવાની આશંકાને મુખ્ય કારણ માનવામાં આવી રહી છે. બજારમાંથી મળી રહેલા આ સંકેતોને કારણે કિંમતી ધાતુઓના ભાવ પર દબાણ જોવા મળી રહ્યું છે.

Share This Article