ArMee ઇન્ફોટેકને મહારાષ્ટ્રમાં 135 મેગાવોટ સોલર પ્રોજેક્ટ મળ્યો, રૂ. 1,629 કરોડનો મોટો કરાર

Kamlesh
2 Min Read

Ahmedabad : ઇન્ફ્રાસ્ટ્રક્ચર સોલ્યુશન્સ ક્ષેત્રની કંપની ArMee ઇન્ફોટેક લિમિટેડે મહારાષ્ટ્રમાં 135 મેગાવોટના સોલર પાવર પ્રોજેક્ટ માટે મહારાષ્ટ્ર સ્ટેટ ઇલેક્ટ્રિસિટી ડિસ્ટ્રિબ્યુશન કંપની લિમિટેડ (MSEDCL) સાથે સમજૂતી કરાર (MoU) કર્યો છે. 17 નવેમ્બર, 2026ના રોજ થયેલા આ કરારની કુલ ઓર્ડર વેલ્યુ રૂ. 1,629.03 કરોડ છે.

આ પ્રોજેક્ટ ArMee MH ONE રિન્યૂએબલ એનર્જી પ્રાઇવેટ લિમિટેડ દ્વારા અમલમાં મૂકવામાં આવશે, જે ArMee ઇન્ફોટેકની સંપૂર્ણ માલિકીની પેટાકંપની છે. પ્રોજેક્ટ હેઠળ 135 મેગાવોટની સોલર પાવર ક્ષમતા સ્થાપિત કરવામાં આવશે અને MSEDCLને વીજળી પૂરી પાડવા માટે 25 વર્ષનો પાવર પરચેઝ એગ્રીમેન્ટ (PPA) કરવામાં આવશે.

આ સમજૂતી કરાર ArMee ઇન્ફોટેકના રિન્યૂએબલ એનર્જી બિઝનેસ માટે મહત્વપૂર્ણ સીમાચિહ્ન માનવામાં આવે છે. કંપની તેના સ્થાપિત IT ઇન્ફ્રાસ્ટ્રક્ચર અને મેનેજ્ડ સર્વિસિસ બિઝનેસની સાથે રિન્યૂએબલ એનર્જી ક્ષેત્રમાં પણ પોતાની હાજરી વિસ્તારી રહી છે. આ પ્રોજેક્ટ મહારાષ્ટ્રની સોલર વીજ ઉત્પાદન ક્ષમતામાં વધારો કરવાની સાથે રાજ્યના સ્વચ્છ ઊર્જા લક્ષ્યોને પણ વેગ આપશે.

આ અંગે ArMee ઇન્ફોટેક લિમિટેડના ચેરમેન અને મેનેજિંગ ડિરેક્ટર રિધિશ પટેલે જણાવ્યું હતું કે, MSEDCL સાથે થયેલો આ સમજૂતી કરાર કંપની માટે મહત્વપૂર્ણ ઉપલબ્ધિ છે. 135 મેગાવોટના પ્રોજેક્ટ માટે મળેલો સહયોગ મોટા પાયે રિન્યૂએબલ એનર્જી પ્રોજેક્ટ્સ અમલમાં મૂકવાની કંપનીની ક્ષમતા પરનો વિશ્વાસ દર્શાવે છે.

તેમણે વધુમાં જણાવ્યું કે, કંપની તેના બે દાયકાના ઇન્ફ્રાસ્ટ્રક્ચર ક્ષેત્રના અનુભવના આધારે પ્રોજેક્ટને સફળતાપૂર્વક પૂર્ણ કરવા પ્રતિબદ્ધ છે. આ પહેલથી કંપનીના રિન્યૂએબલ એનર્જી પોર્ટફોલિયોને મજબૂતી મળશે અને લાંબા ગાળે શેરધારકો તથા હિતધારકો માટે મૂલ્ય સર્જન કરવામાં મદદ મળશે.

Share This Article