જામનગરમાં વાયુસેનાની ‘સહાયતા સેતુ’ કવાયત, બહુરાષ્ટ્રીય આપત્તિ રાહત અભ્યાસમાં ભારતીય સંરક્ષણ દળો સાથે મિત્ર દેશોની ભાગીદારી

Kamlesh
2 Min Read

જામનગર એરફોર્સ સ્ટેશન ખાતે ભારતીય વાયુસેના દ્વારા ‘સહાયતા સેતુ’ નામની બહુરાષ્ટ્રીય માનવતાવાદી સહાય અને આપત્તિ રાહત (HADR) કવાયતનું આયોજન કરવામાં આવ્યું છે. 17થી 19 નવેમ્બર, 2026 દરમિયાન યોજાનારી આ કવાયતનો ઉદ્દેશ્ય કુદરતી આપત્તિ જેવી પરિસ્થિતિઓમાં વિવિધ એજન્સીઓ વચ્ચે સંકલન, ઝડપી પ્રતિસાદ અને સામૂહિક તૈયારીને વધુ મજબૂત બનાવવાનો છે.

હેડક્વાર્ટર્સ ઇન્ટિગ્રેટેડ ડિફેન્સ સ્ટાફ (HQ IDS) અને હેડક્વાર્ટર્સ સાઉથ વેસ્ટર્ન એર કમાન્ડ (HQ SWAC)ના માર્ગદર્શન હેઠળ યોજાઈ રહેલી આ કવાયતમાં ભારતીય સંરક્ષણ દળો, રાષ્ટ્રીય એજન્સીઓ અને મિત્ર વિદેશી દેશો ભાગ લઈ રહ્યા છે. આ કવાયત ભારત સરકારના નિર્દેશો અનુસાર સંકલિત માળખા હેઠળ હાથ ધરવામાં આવી રહી છે.

આ કવાયતનો મુખ્ય ઉદ્દેશ્ય આપત્તિ વ્યવસ્થાપન દરમિયાન વિવિધ એજન્સીઓની કામગીરીમાં સંકલન વધારવું, ટેક્નોલોજી આધારિત નવીનતા દ્વારા ઝડપી પ્રતિસાદ આપવો અને સામૂહિક તૈયારીને મજબૂત બનાવવાનો છે. આ ઉપરાંત, કવાયત દરમિયાન QUAD દેશો એટલે કે ઓસ્ટ્રેલિયા, ભારત, જાપાન અને અમેરિકા વચ્ચે QUAD HADR વર્કિંગ લેવલની બેઠક પણ યોજાઈ રહી છે.

કવાયતના ત્રીજા દિવસે એટલે કે 19 નવેમ્બરે જામનગર એરફોર્સ સ્ટેશન ખાતે મલ્ટી-એજન્સી કેપેબિલિટી ડેમોન્સ્ટ્રેશન (MACD), સ્ટેટિક ડિસ્પ્લે અને FICCI એક્ઝિબિશનનું આયોજન કરવામાં આવ્યું છે. આ પ્રદર્શન દ્વારા આપત્તિની પરિસ્થિતિમાં વિવિધ એજન્સીઓ કેવી રીતે સંકલિત રીતે કામગીરી કરે છે તેનું નિદર્શન કરવામાં આવશે.

આ નિદર્શન દરમિયાન ચક્રવાત અને પૂર જેવી આપત્તિની સ્થિતિનું સિમ્યુલેશન કરવામાં આવશે. ભારતીય વાયુસેનાના વિમાનો અને હેલિકોપ્ટર, ડ્રોન, ભારતીય સેના, નૌકાદળ, કોસ્ટ ગાર્ડ, NDRF અને SDRFની ટીમો દ્વારા બચાવ, તબીબી સહાય, રાહત અને સ્થળાંતરની કામગીરી રજૂ કરવામાં આવશે. આ સાથે બચાવ કામગીરીમાં આધુનિક ટેક્નોલોજી અને વિવિધ એજન્સીઓની ક્ષમતાઓનું પણ પ્રદર્શન થશે.

આ કવાયત માત્ર ઓપરેશનલ તૈયારી પૂરતી મર્યાદિત નથી, પરંતુ ભાગ લેનારા દેશો વચ્ચે આંતરરાષ્ટ્રીય મિત્રતા, સહયોગ અને માનવતાવાદી સેવા પ્રત્યેની સહિયારી પ્રતિબદ્ધતાને પણ મજબૂત બનાવશે.

Share This Article