રાજધાની દિલ્હીમાં કાયદો અને વ્યવસ્થાને પડકારતી એક અત્યંત ચોંકાવનારી ઘટના સામે આવી છે. પ્રખ્યાત પંજાબી ગાયક ગુરુ રંધાવાની માલિકીના જિમની બહાર અજાણ્યા હુમલાખોરોએ તાબડતોબ ફાયરિંગ કર્યું હોવાનો મામલો પ્રકાશમાં આવ્યો છે. આ ઘટનાના પગલે સમગ્ર વિસ્તારમાં ભયનો માહોલ ફેલાઈ ગયો છે અને સુરક્ષા વ્યવસ્થા વધુ કડક બનાવવામાં આવી છે.
આ સનસનીખેજ હુમલાની જવાબદારી કુખ્યાત લોરેન્સ બિશ્નોઈ ગેંગે લીધી હોવાનો દાવો કરવામાં આવી રહ્યો છે. સોશિયલ મીડિયા પર વાયરલ થયેલી એક કથિત પોસ્ટ અને ઓડિયો ક્લિપ દ્વારા ગેંગે ફાયરિંગની જવાબદારી સ્વીકારી હોવાનો દાવો થયો છે.
વાયરલ ઓડિયોમાં કથિત રીતે ગેંગનો એક સભ્ય એવું કહેતો સંભળાય છે કે ગુરુ રંધાવાના અભિનેતા સલમાન ખા સાથે નજીકના સંબંધો છે, તેથી તેમને નિશાન બનાવવામાં આવ્યા છે. ઓડિયોમાં આ હુમલાને માત્ર એક ‘ટ્રેલર’ ગણાવવામાં આવ્યો હોવાનું પણ કહેવામાં આવી રહ્યું છે.
ઘટનાની જાણ થતાં જ દિલ્હી પોલીસની ટીમો તાત્કાલિક ઘટનાસ્થળે પહોંચી ગઈ હતી અને જિમની બહારના દ્રશ્યો તેમજ CCTV ફૂટેજ કબજે કર્યા છે. પોલીસ આ બાબતની ઊંડાણપૂર્વક તપાસ કરી રહી છે કે આ ઘટના ખરેખર ગેંગ દ્વારા જ કરવામાં આવી છે કે પછી કોઈએ ભય ફેલાવવા માટે તેમના નામનો ઉપયોગ કર્યો છે.
દિલ્હી પોલીસના જણાવ્યા મુજબ, વાયરલ થઈ રહેલા ઓડિયો અને સોશિયલ મીડિયા પોસ્ટની પ્રામાણિકતાની તપાસ ચાલી રહી છે. તપાસ પૂર્ણ થયા બાદ જ સમગ્ર હકીકત સ્પષ્ટ થઈ શકશે.
દિલ્હી પોલીસે પોતાના નિવેદનમાં જણાવ્યું હતું કે, “11 જૂન 2026ની વહેલી સવારે પશ્ચિમ વિહાર ઈસ્ટ પોલીસ સ્ટેશન વિસ્તારમાં આવેલા ‘24 આવર્સ ફિટનેસ’ જિમ, પુષ્કર એન્ક્લેવ, પશ્ચિમ વિહાર, દિલ્હીમાં ફાયરિંગની ઘટનાને લઈને PCR કોલ પ્રાપ્ત થયો હતો. પ્રાથમિક તપાસમાં જાણવા મળ્યું છે કે ચહેરા કપડાંથી ઢાંકેલા બે અજાણ્યા બાઈકસવારોએ જિમના કાચ પર કેટલાક રાઉન્ડ ફાયરિંગ કર્યું હતું.
આ ઘટનામાં કોઈપણ વ્યક્તિને ઈજા પહોંચી નથી. સ્થાનિક પોલીસ અને જિલ્લા પોલીસ દ્વારા તાત્કાલિક કાર્યવાહી શરૂ કરવામાં આવી છે અને કેસમાં જરૂરી કાનૂની પ્રક્રિયા હાથ ધરવામાં આવી રહી છે. આરોપીઓની ઓળખ, તેમની શોધખોળ અને ઝડપથી ધરપકડ કરવા માટે અનેક ટીમો બનાવવામાં આવી છે.”
