બેંગલુરુ: કર્ણાટકની રાજધાની બેંગલુરુમાં આડાસંબંધોને કારણે હત્યાનો ચોંકાવનારો કિસ્સો સામે આવ્યો છે. અહીં એક મહિલાએ પોતાના પ્રેમી સાથે મળીને પતિની હત્યા કરી નાખી હતી. હત્યા કર્યા બાદ મહિલાએ એવી કહાની ઘડી હતી કે શરૂઆતમાં કોઈને તેના પર શંકા પણ ગઈ નહોતી. મહિલાએ પરિવારજનોને જણાવ્યું હતું કે તેના પતિનું મોત હાર્ટ એટેકથી થયું છે. એટલું જ નહીં, તે પતિના મૃતદેહ સામે બેસીને રડવાનો ઢોંગ પણ કરતી રહી હતી.
જોકે, પોસ્ટમોર્ટમ રિપોર્ટે તેની સમગ્ર સજિશનો પર્દાફાશ કરી દીધો હતો. પોલીસે આ કેસમાં પત્ની અનિતા અને તેના પ્રેમી મધુસૂદનની ધરપકડ કરી છે. ઇલેક્ટ્રોનિક સિટી પોલીસ આ મામલે તપાસ કરી રહી છે.પોલીસના જણાવ્યા અનુસાર, 12 ઓક્ટોબરની મધરાતે બેંગલુરુના ડોડ્ડાથોગુર વિસ્તારમાં ઉપેન્દ્ર (40)નું ઘરમાં મોત થયું હતું.
પતિના મોત બાદ પત્ની અનિતાએ પરિવારજનોને જણાવ્યું હતું કે ઉપેન્દ્ર લપસીને પડી ગયા હતા અને ત્યારબાદ હાર્ટ એટેક આવતાં તેમનું મોત થયું હતું. તેણે પરિવારના સભ્યો સામે વારંવાર આ જ વાતનું પુનરાવર્તન કર્યું હતું. એટલું જ નહીં, પતિના મૃતદેહ સામે બેસીને રડવાનો ઢોંગ પણ કરતી રહી હતી. શરૂઆતમાં આ ઘટના સામાન્ય મોત હોવાનું લાગી રહ્યું હતું. ત્યારબાદ ઇલેક્ટ્રોનિક સિટી પોલીસે અકુદરતી મોતનો કેસ નોંધીને તપાસ શરૂ કરી હતી.
પોસ્ટમોર્ટમ રિપોર્ટથી હત્યાનો ભેદ ઉકેલાયો
તપાસ દરમિયાન તાજેતરમાં આવેલી પોસ્ટમોર્ટમ રિપોર્ટમાં સામે આવ્યું કે ઉપેન્દ્રનું મોત ગૂંગળામણને કારણે થયું હતું. આ રિપોર્ટ સામે આવ્યા બાદ પોલીસને હત્યાની આશંકા ગઈ હતી અને તપાસ તેજ કરવામાં આવી હતી.
પોલીસને માહિતી મળી હતી કે ઘટનાની રાત્રે ઉપેન્દ્રના ઘરે એક અજાણી વ્યક્તિ આવી હતી. આ કડીના આધારે પોલીસે મધુસૂદનને કસ્ટડીમાં લઈને પૂછપરછ શરૂ કરી હતી. ત્યારબાદ અનિતાની પણ પૂછપરછ કરવામાં આવી હતી. બંનેની પૂછપરછ દરમિયાન હત્યાનું સમગ્ર કાવતરું સામે આવ્યું હતું.
ઘણા વર્ષોથી ચાલી રહ્યો હતો પ્રેમસંબંધ
પોલીસની તપાસમાં સામે આવ્યું કે અનિતા અને મધુસૂદન વચ્ચે ઘણાં વર્ષોથી પ્રેમસંબંધ હતો. ઉપેન્દ્રને પત્નીના આ સંબંધ વિશે જાણ થઈ ગઈ હતી. આ જ મુદ્દાને લઈને પતિ-પત્ની વચ્ચે અવારનવાર ઝઘડા થતા હતા.
11 ઓક્ટોબરની રાત્રે પણ આ જ મુદ્દે બંને વચ્ચે વિવાદ થયો હતો. આરોપ છે કે આ દરમિયાન અનિતાએ પોતાના પ્રેમી મધુસૂદનને ફોન કરીને ઘરે બોલાવ્યો હતો. તેણે પ્રેમીને જણાવ્યું હતું કે તેનો પતિ તેની સાથે ઝઘડો કરી રહ્યો છે અને તેને ખતમ કરવા માટે ઘરે આવવા કહ્યું હતું.
પતિ ઊંઘતો હતો ત્યારે કર્યો હુમલો
પોલીસના જણાવ્યા અનુસાર, અનિતાના બોલાવવા પર મધુસૂદન મધરાતે તેના ઘરે પહોંચ્યો હતો. તે સમયે ઉપેન્દ્ર બેડરૂમમાં સૂઈ રહ્યા હતા. મધુસૂદને તેમના પર હુમલો કર્યો હતો. આ દરમિયાન અનિતાએ પણ પ્રેમીનો સાથ આપ્યો હતો અને પતિનું મોં તથા નાક દબાવી દીધાં હતાં. ત્યારબાદ મધુસૂદને ઉપેન્દ્રનું ગળું દબાવી દીધું હતું, જેના કારણે તેમનું મોત થયું હતું.
હત્યા કર્યા બાદ મધુસૂદન ત્યાંથી જતો રહ્યો હતો. બીજી તરફ, અનિતાએ પરિવારજનો સામે પતિનું મોત હાર્ટ એટેકથી થયું હોવાનું જણાવી પોતાને નિર્દોષ સાબિત કરવાનો પ્રયાસ કર્યો હતો. જોકે, પોસ્ટમોર્ટમ રિપોર્ટ અને પોલીસની તપાસમાં તેની સજિશનો પર્દાફાશ થયો હતો.
હાલમાં પોલીસે બંને આરોપીઓની ધરપકડ કરી લીધી છે અને આ મામલે વધુ તપાસ હાથ ધરી છે.
