679 બ્રાન્ડ્સની દવાઓના ભાવમાં 50%થી વધુ ઘટાડો, મહત્તમ 96.45% સુધી કિંમત ઘટી
નવી દિલ્હી: કેન્સરની સારવાર લઈ રહેલા દર્દીઓ માટે રાહતના સમાચાર સામે આવ્યા છે. નેશનલ ફાર્માસ્યુટિકલ્સ પ્રાઇસિંગ ઓથોરિટી (NPPA) દ્વારા 1,364 કેન્સર વિરોધી દવાઓના સુધારેલા મહત્તમ છૂટક ભાવ (MRP)નો આજથી એટલે કે 9 નવેમ્બર, 2026થી અમલ થયો છે. દવાઓના ભાવમાં ઘટાડાને કારણે ગ્રાહકોને વાર્ષિક અંદાજે ₹3,540.38 કરોડની બચત થવાની સંભાવના છે.
કેમિકલ્સ અને ફર્ટિલાઇઝર્સ મંત્રાલયના ફાર્માસ્યુટિકલ્સ વિભાગ હેઠળ કાર્યરત NPPAએ સ્વાસ્થ્ય અને પરિવાર કલ્યાણ મંત્રાલયના ડાયરેક્ટોરેટ જનરલ ઓફ હેલ્થ સર્વિસિસ (DGHS) દ્વારા 17 ઓક્ટોબર, 2026ના રોજ રચાયેલી નિષ્ણાત સમિતિની ભલામણોના આધારે 137 એન્ટિ-કેન્સર દવાઓના MRP પર વેપાર માર્જિનની મર્યાદા નક્કી કરી છે.
8 નવેમ્બર, 2026 સુધીમાં 85 ફાર્માસ્યુટિકલ કંપનીઓએ 121 દવાઓને આવરી લેતા 1,364 એન્ટિ-કેન્સર ફોર્મ્યુલેશન્સના સુધારેલા MRPની જાણ કરી છે. જેમાં 679 બ્રાન્ડ્સે 50 ટકાથી વધુ ભાવ ઘટાડો નોંધાવ્યો છે. જ્યારે દવાઓના MRPમાં સૌથી વધુ 96.45 ટકા સુધીનો ઘટાડો નોંધાયો છે.
આ ભાવ ઘટાડાના પરિણામે ગ્રાહકોને વાર્ષિક અંદાજે ₹3,540.38 કરોડની બચત થવાની ધારણા છે. આ નિર્ણય કેન્સરની સારવારના ખર્ચમાં ઘટાડો કરવામાં મહત્વપૂર્ણ સાબિત થઈ શકે છે.
ગ્રાહકો દવાઓના નવા ભાવ કેવી રીતે જાણી શકશે?
ગ્રાહકો દવાના પેકેજ પર છપાયેલા સુધારેલા MRP દ્વારા નવા ભાવ જાણી શકશે. આ ઉપરાંત ‘ફાર્મા સહી દામ’ મોબાઇલ એપ્લિકેશન અને NPPAની સત્તાવાર વેબસાઇટ nppa.gov.in પર પણ દવાઓની કિંમતો ચકાસી શકાશે.
નવા નિયમ મુજબ કોઈપણ કેમિસ્ટ કે હોસ્પિટલ ફાર્મસી સુધારેલા MRP કરતાં વધુ કિંમત વસૂલ કરી શકશે નહીં.
જો ગ્રાહકો પાસેથી દવાના વધુ ભાવ વસૂલવામાં આવે અથવા કિંમત સંબંધિત અન્ય કોઈ ફરિયાદ હોય, તો તેઓ ફાર્મા જન સમાધાન પોર્ટલ પર ફરિયાદ નોંધાવી શકશે. આ ઉપરાંત NPPAની હેલ્પલાઇન નંબર 1800-111-255 પર સંપર્ક કરીને પણ ફરિયાદ કરી શકાશે.
કેન્સર વિરોધી દવાઓના ભાવમાં થયેલો આ ઘટાડો દર્દીઓ અને તેમના પરિવારોને આર્થિક રાહત આપશે તેવી આશા વ્યક્ત કરવામાં આવી રહી છે.
