સંબંધોના અનોખા ગૂંચવાડાનો એક ચોંકાવનારો કિસ્સો સામે આવ્યો છે. અહીં એક મહિલા ખોળામાં બાળક અને સાથે પતિને લઈને ‘મુખ્યમંત્રી સામૂહિક લગ્ન યોજના’ હેઠળ પોતાના જ દિયર સાથે લગ્ન કરવા પહોંચી હતી. જ્યારે અધિકારીઓએ તપાસ દરમિયાન કાયદેસર છૂટાછેડાના દસ્તાવેજો માગ્યા, ત્યારે મહિલાએ સાદા કાગળ પર લખેલો પંચાયતનો નિર્ણય રજૂ કર્યો હતો. સાથે જ સ્પષ્ટ કહી દીધું હતું કે, “મને પતિ પસંદ નથી, તેથી હું તો દિયર સાથે જ લગ્ન કરીશ.”
મુખ્યમંત્રી સામૂહિક લગ્ન યોજના માટે કુલ 220 ઓનલાઇન અરજીઓ મળી હતી. તેમાંથી 149 યુગલો પાત્ર જણાતાં 25 ઓક્ટોબરે તેમનાં લગ્ન કરાવવામાં આવ્યાં હતાં. કેટલીક અરજીઓ રદ કરવામાં આવી હતી. રદ થયેલી અરજીઓની તપાસ દરમિયાન જ આ ચોંકાવનારો કિસ્સો સામે આવ્યો હતો. તપાસ દરમિયાન અધિકારીઓએ મહિલાને બોલાવીને છૂટાછેડાના કાયદેસરના દસ્તાવેજો માગ્યા હતા. ત્યારે મહિલાએ કહ્યું હતું કે, “આ મારા પતિ છે, પરંતુ મને તેઓ પસંદ નથી. તેથી મારે મારા દિયર સાથે લગ્ન કરવા છે.”
પતિએ પણ પત્નીની વાતને સમર્થન આપ્યું
મહિલા સાથે આવેલા પતિએ પણ સાક્ષી આપતાં કહ્યું હતું કે, “આ સાચું કહી રહી છે. તેને હું નહીં, પરંતુ મારો નાનો ભાઈ પસંદ છે. થોડા દિવસ પહેલાં જ પંચોએ બેસીને અમારા છૂટાછેડા કરાવ્યા હતા.”
બંનેએ સાદા કાગળ પર લખેલું છૂટાછેડાનું લખાણ અધિકારીઓ સમક્ષ રજૂ કર્યું હતું. જોકે, અરજીની તપાસ કરી રહેલા અધિકારીએ તેને માન્ય ગણવાનો ઇનકાર કર્યો હતો. અધિકારીએ સ્પષ્ટ કર્યું હતું કે લગ્ન માટે કાયદેસર રીતે મેળવેલા છૂટાછેડાના દસ્તાવેજો જ માન્ય ગણાશે.
કાયદેસરના દસ્તાવેજો ન હોવાથી અરજીઓ રદ
જિલ્લા સમાજ કલ્યાણ અધિકારી નીલમ સિંહ ચૌહાણે જણાવ્યું હતું કે છૂટાછેડાના કાયદેસરના દસ્તાવેજો રજૂ ન કરવાને કારણે ચારથી પાંચ અરજીઓ રદ કરવામાં આવી હતી. આ અરજીઓમાં એક કિસ્સો એવો પણ હતો, જેમાં મહિલા પતિ પાસેથી કાયદેસર છૂટાછેડા લીધા વિના પોતાના દિયર સાથે લગ્ન કરવા માગતી હતી.
