બિહારના ભાગલપુરના રહેવાસી રાહુલ યાદવ કામ કરવા માટે રશિયા ગયો હતો. જોકે, ત્યાં તેની મુલાકાત જ્યુલી નામની રશિયન યુવતી સાથે થઈ અને બંને એકબીજાના પ્રેમમાં પડી ગયાં. બંને તરફથી પ્રેમનો એકરાર થયો. ક્યાં ગોરી-ચિટ્ટી વિદેશી યુવતી અને ક્યાં બિહારનો યુવક, પરંતુ પ્રેમમાં દેશ અને સંસ્કૃતિની સરહદો પણ નડતી નથી. બંને વચ્ચે પ્રેમ થયો અને હવે જ્યુલી બે દિવસ પહેલાં ભાગલપુર આવી પહોંચી છે. નવેમ્બર મહિનામાં બંનેનાં લગ્ન થવાની શક્યતા છે. રાહુલનું ઘર ઝૂંપડી જેવું છે, છતાં જ્યુલીને તેનાથી કોઈ ફરક પડતો નથી. તે તેની સાથે ઝૂંપડીમાં રહેવા માટે પણ તૈયાર છે.
બિહારના ભાગલપુર જિલ્લાના રહેવાસી રાહુલ યાદવ અને રશિયાની જ્યુલીની પ્રેમકહાની હાલ સમગ્ર વિસ્તારમાં ચર્ચાનો વિષય બની છે. સાત સમંદર પારનું અંતર અને અલગ-અલગ સંસ્કૃતિઓની સીમાઓ પાર કરીને આગળ વધેલી આ અનોખી પ્રેમકહાની હવે નવા પડાવ પર પહોંચી છે.
ભાગલપુરના રાહુલ યાદવ કામના અર્થે રશિયા ગયો હતો. ત્યાં તેની મુલાકાત જ્યુલી સાથે થઈ હતી. ધીમે-ધીમે બંને વચ્ચે નિકટતા વધી, વાતચીતનો સિલસિલો પ્રેમમાં બદલાયો અને બંનેએ જીવનભર એકબીજાનો સાથ નિભાવવાનો નિર્ણય લીધો.
આ દરમિયાન રાહુલને પોતાના ઘરે પાછા આવવું પડ્યું હતું. પરંતુ જ્યુલી તેના વગર એક મિનિટ પણ રહી શકતી નહોતી. પોતાના સંબંધને લગ્ન સુધી પહોંચાડવા માટે જ્યુલી પોતાના પરિવાર સાથે ભાગલપુર આવી પહોંચી છે.
જ્યુલીના આગમનથી સ્થાનિક લોકોમાં પણ ભારે ઉત્સાહ અને ઉત્સુકતા જોવા મળી રહી છે. આ દરમિયાન જ્યુલીના પરિવારજનોએ રાહુલના પરિવાર સાથે મુલાકાત કરી હતી. બંને પરિવારો વચ્ચે લગ્નના સંબંધ અંગે સહમતી બની હોવાનું કહેવાય છે.
આ વર્ષે નવેમ્બર મહિનામાં બંને લગ્નના બંધનમાં બંધાય તેવી શક્યતા છે. પરિવારની સંમતિ અને સ્થાનિક રીતરિવાજો અનુસાર થનારા આ લગ્નની તૈયારીઓ પણ શરૂ થઈ ગઈ હોવાનું જણાવવામાં આવી રહ્યું છે.
આ દરમિયાન જ્યુલી જ્યારે રાહુલના ઘરે પહોંચી ત્યારે રાહુલે તેને પોતાના ઘરની પરિસ્થિતિ વિશે જણાવ્યું હતું. રાહુલે કહ્યું કે તેની પાસે કોઈ મોટો બંગલો નથી અને અહીં રહેવા માટે માત્ર ઝૂંપડી જ છે. આવી સ્થિતિમાં જ્યુલી અહીં કેવી રીતે રહી શકશે, તેવો સવાલ પણ રાહુલે કર્યો હતો.
પરંતુ જ્યુલીએ રાહુલને જણાવ્યું કે તે તેના પ્રેમ માટે બંગલો છોડીને ઝૂંપડીમાં રહેવા માટે પણ તૈયાર છે. જ્યુલીના આ નિર્ણયની ચર્ચા હાલ સમગ્ર વિસ્તારમાં થઈ રહી છે. બંનેની આ પ્રેમકહાની હવે લગ્નમાં પરિણમે છે કે નહીં, તેના પર સૌની નજર છે.
