સોનાલી મોહંતી અને તેમની વોલન્ટિયર્સ ટીમ દ્વારા સતત સાતમા વર્ષે આયોજન; ગરબા શીખવવાથી લઈને બસ સેવા અને નાસ્તા સુધીની વ્યવસ્થા કરાઈ
અમદાવાદ: વિદ્યાભારતી ફાઉન્ડેશન દ્વારા આશરે 40 બાળકો માટે ગરબાના કાર્યક્રમનું આયોજન કરવામાં આવ્યું હતું. બાળકોમાં આનંદ, સંસ્કાર અને સામૂહિક સહભાગિતાની ભાવના વિકસે તેવા હેતુથી યોજાયેલા આ કાર્યક્રમમાં બાળકોએ ઉત્સાહપૂર્વક ભાગ લીધો હતો.
આ કાર્યક્રમનું વિશેષ આકર્ષણ એ રહ્યું કે બાળકોને ગરબા શીખવવાથી લઈને સમગ્ર આયોજન સુધીની વ્યવસ્થામાં વિશેષ કાળજી રાખવામાં આવી હતી. ઉમેશભાઈ અને સોનાલીબેને બાળકોને ગરબાનાં સ્ટેપ્સ શીખવ્યા હતા, જેથી બાળકો આત્મવિશ્વાસ સાથે ગરબાની મોજ માણી શકે.
ઉલ્લેખનીય છે કે સોનાલી મોહંતી અને તેમની વોલન્ટિયર્સ ટીમ દ્વારા છેલ્લા સાત વર્ષથી સતત બાળકો માટે ગરબાનું આયોજન કરવામાં આવે છે. આ પહેલ દ્વારા બાળકોને આનંદની સાથે નવી કળા શીખવાની અને યાદગાર પળો માણવાની તક મળે છે.
કાર્યક્રમને સફળ બનાવવા માટે સોનાલીબેન મોહંતી, ઉમેશભાઈ, સિદ્ધાર્થભાઈ, બ્રિજેશભાઈ અને રાજેશભાઈએ મહત્વપૂર્ણ યોગદાન આપ્યું હતું. બાળકોની અવરજવર માટે બસ સેવા, ગરબા માટેનું સ્થળ, નાસ્તો સહિતની તમામ વ્યવસ્થાઓમાં ખાસ ધ્યાન રાખવામાં આવ્યું હતું, જેથી બાળકો કોઈ અગવડ વિના કાર્યક્રમમાં ભાગ લઈ શકે.
વિદ્યાભારતી ફાઉન્ડેશન દ્વારા સોનાલી મોહંતી અને તેમની સમગ્ર વોલન્ટિયર્સ ટીમનો હૃદયપૂર્વક આભાર વ્યક્ત કરવામાં આવ્યો હતો. સતત સાત વર્ષથી બાળકો માટે સેવાભાવનાથી કરવામાં આવતી આ પહેલને બિરદાવવામાં આવી હતી.
આ કાર્યક્રમ માત્ર ગરબા પૂરતો મર્યાદિત ન રહેતાં બાળકોના ચહેરા પર ખુશી લાવવાનો અને સમાજમાં સંવેદનશીલતા, સહયોગ તથા માનવતાના મૂલ્યોને પ્રોત્સાહન આપવાનો સુંદર પ્રયાસ બની રહ્યો હતો.
