કેરળના એર્નાકુલમ જિલ્લામાં પૂરઝડપે આવતી મિની કૂપર કારએ એક સ્કૂટરને ટક્કર મારતાં સ્કૂટર પર સવાર ત્રણ વિદ્યાર્થીઓનાં ઘટનાસ્થળે જ મોત નીપજ્યાં હતાં. આ અકસ્માત કોચીન એરપોર્ટ નજીક નેડુમ્બસ્સેરી વિસ્તારમાં થયો હતો. અકસ્માત બાદ 19 વર્ષીય કારચાલક સુહૈલ સજીવને કસ્ટડીમાં લેવામાં આવ્યો છે.
‘ઇન્ડિયા ટુડે’ સાથે સંકળાયેલાં શિબીમોલ કે.જી.ના અહેવાલ મુજબ, આ ઘટના રાત્રે આશરે 2 વાગ્યે બની હતી. ત્રણેય વિદ્યાર્થીઓ નજીકની એક દુકાનમાં ચા પીધા બાદ ઘરે પરત ફરી રહ્યાં હતાં. મૃતકોની ઓળખ વાયનાડની રહેવાસી દેવિકા, પલક્કડની રહેવાસી ગોપિકા અને કર્ણાટકના રહેવાસી એજાઝ તરીકે થઈ છે. આ ત્રણેય વિદ્યાર્થીઓ થ્રિક્કાકારા વિસ્તારમાં કામ કરવાની સાથે ત્યાંની એક કૉલેજમાં અભ્યાસ પણ કરતાં હતાં.
અહેવાલ મુજબ, પોલીસે જણાવ્યું હતું કે પૂરઝડપે આવતી કારે સ્કૂટરને ટક્કર મારી હતી, જેના કારણે તેના પર સવાર ત્રણેય લોકો ગંભીર રીતે ઘાયલ થયા હતા. સ્થાનિક લોકો તેમને હોસ્પિટલ લઈ ગયા હતા, પરંતુ ત્યાં સુધીમાં તેમનાં મોત થઈ ચૂક્યાં હતાં. પોલીસે જણાવ્યું કે અકસ્માત બાદ આરોપી સુહૈલને તબીબી તપાસ માટે લઈ જવામાં આવ્યો હતો. તેણે કથિત રીતે સ્વીકાર્યું હતું કે અકસ્માત પહેલાં તેણે દારૂ પીધો હતો. હવે તેણે દારૂ પીધો હતો કે અન્ય કોઈ નશીલા પદાર્થનું સેવન કર્યું હતું, તે જાણવા માટે તેના લોહી સહિતનાં નમૂનાઓ લેવામાં આવ્યા છે.
એર્નાકુલમ ગ્રામ્યના પોલીસ અધિક્ષક કે.એસ. સુદર્શનના જણાવ્યા અનુસાર, કારની ફોરેન્સિક તપાસ પણ કરવામાં આવી રહી છે. પોલીસનું કહેવું છે કે પ્રાથમિક તપાસમાં અકસ્માત સમયે કારચાલક નશાની હાલતમાં હોવાની શક્યતા જણાઈ રહી છે. જોકે, તેની પુષ્ટિ બ્લડ ટેસ્ટના રિપોર્ટ બાદ જ થઈ શકશે.
પોલીસના જણાવ્યા અનુસાર, કાર સુહૈલના પિતાના નામે રજિસ્ટર્ડ છે. તેની પાસે માન્ય ડ્રાઇવિંગ લાઇસન્સ પણ છે. ‘ધ ઇન્ડિયન એક્સપ્રેસ’ના અહેવાલ મુજબ, અકસ્માત સમયે કારની ઝડપ 125 કિલોમીટર પ્રતિ કલાક હતી.
અકસાન બાદ આરોપી અને સ્થાનિક લોકો વચ્ચે વિવાદ થયો હોવાની વાત પણ સામે આવી છે. કહેવાય છે કે કેટલાક લોકોએ કારનો દરવાજો ખોલવાનો પ્રયાસ કર્યો ત્યારે સુહૈલે તેમની સાથે દલીલ કરી હતી. આ દરમિયાન તેણે કથિત રીતે એવું પણ કહ્યું હતું કે તેના ‘પિતા બધું સંભાળી લેશે.’
પોલીસે સુહૈલ સજીવ વિરુદ્ધ ભારતીય ન્યાય સંહિતા (BNS)ની કલમ 105 હેઠળ બિનઇરાદાપૂર્વક હત્યાનો ગુનો નોંધ્યો છે. હાલ પોલીસ આ કેસના દરેક પાસાની તપાસ કરી રહી છે.
