સી.એમ.ડી. શાહ હાઈસ્કૂલ, અજોલ, માણસા, ગાંધીનગર ખાતે એક વિશાળ સ્વરક્ષણ તાલીમ સેમિનારનું આયોજન કરવામાં આવ્યું હતું, જેમાં શાળા અને નર્સિંગ કૉલેજના 500થી વધુ વિદ્યાર્થીઓએ ઉત્સાહપૂર્વક ભાગ લીધો હતો.
કાર્યક્રમમાં આંતરરાષ્ટ્રીય ખેલાડી અને જાણીતા સ્વરક્ષણ નિષ્ણાત કોચ અમનદીપસિંહ ગોત્રાના માર્ગદર્શન હેઠળ સહભાગીઓને વિવિધ સ્વરક્ષણ તકનીકો, હુમલાથી બચવાની વ્યૂહરચનાઓ તથા વિપરીત પરિસ્થિતિઓમાં પોતાને સુરક્ષિત રાખવાની વ્યવહારુ તાલીમ આપવામાં આવી હતી. તાલીમ દરમિયાન સારો સ્પર્શ-ખરાબ સ્પર્શ, જાતીય સતામણી, અપહરણ જેવી પરિસ્થિતિઓથી બચાવ, આત્મવિશ્વાસ નિર્માણ અને આત્મનિર્ભર બનવા જેવા મહત્વપૂર્ણ વિષયો પર પણ માર્ગદર્શન આપવામાં આવ્યું હતું.
કાર્યક્રમના મુખ્ય અતિથિ માણસા વિધાનસભા મતવિસ્તારના માનનીય ધારાસભ્ય જે.એસ. પટેલ રહ્યા હતા. આ પ્રસંગે શાળા અને કૉલેજના ટ્રસ્ટીઓ, અધ્યક્ષશ્રીઓ તથા અન્ય મહાનુભાવોની ગૌરવપૂર્ણ ઉપસ્થિતિ રહી હતી.
સેમિનારમાં 181 મહિલા હેલ્પલાઇન ટીમ, 1098 ચાઇલ્ડ હેલ્પલાઇન ટીમ તથા માણસા પોલીસની SHE ટીમે પણ સહભાગી બની વિદ્યાર્થીઓને સુરક્ષા, સહાય અને જાગૃતિ સંબંધિત મહત્વપૂર્ણ માહિતી આપી હતી.
આ પહેલનો મુખ્ય હેતુ વિદ્યાર્થીઓમાં સ્વરક્ષણ સાથે આત્મવિશ્વાસ, જાગૃતિ, હિંમત અને આત્મનિર્ભરતાનો વિકાસ કરવાનો હતો, જેથી તેઓ કોઈપણ પડકારજનક પરિસ્થિતિમાં શાંત રહી યોગ્ય નિર્ણય લઈ શકે અને પોતાની સુરક્ષા જાતે સુનિશ્ચિત કરી શકે.
500થી વધુ વિદ્યાર્થીઓને સ્વરક્ષણની તાલીમ આપીને આ સેમિનાર મહિલા અને બાળ સુરક્ષા તથા સશક્ત સમાજના નિર્માણની દિશામાં એક મહત્વપૂર્ણ પગલું સાબિત થયો હતો.
