પ્રયાસ પબ્લિક ચેરિટેબલ ટ્રસ્ટ ખાતે સ્વતંત્રતા દિવસની ઉત્સાહભેર ઉજવણી કરવામાં આવી હતી. આ પ્રસંગે ટ્રસ્ટ દ્વારા ખાસ ‘ફ્રીડમ ટુ સાયકલ’ અભિયાનનું આયોજન કરવામાં આવ્યું હતું. કાર્યક્રમ દરમિયાન સ્વતંત્રતા, શિક્ષણ, પ્રતિભા અને બાળકોના ઉજ્જવળ ભવિષ્યનો સંદેશ આપવામાં આવ્યો હતો.
આ પ્રસંગે પ્રયાસના તેજસ્વી, પ્રતિભાશાળી, નિયમિત અને મેરીટ ધરાવતા વિદ્યાર્થીઓને પ્રોત્સાહિત કરવા માટે 4 સાયકલ ઇનામ તરીકે ભેટ આપવામાં આવી હતી. સાયકલ મેળવી વિદ્યાર્થીઓમાં ખુશીની લાગણી જોવા મળી હતી. આ પહેલનો હેતુ વિદ્યાર્થીઓને અભ્યાસ પ્રત્યે પ્રોત્સાહિત કરવા ઉપરાંત તેમને પોતાના સપનાઓને સાકાર કરવા માટે સતત આગળ વધવાની પ્રેરણા આપવાનો હતો.
સ્વતંત્રતા દિવસની ઉજવણી દરમિયાન પ્રયાસના પ્રતિભાશાળી વિદ્યાર્થીઓ દ્વારા દેશભક્તિથી ભરપૂર નૃત્યની સુંદર રજૂઆત પણ કરવામાં આવી હતી. વિદ્યાર્થીઓની આ રજૂઆતે સમગ્ર કાર્યક્રમમાં દેશભક્તિ અને ઉત્સાહનો માહોલ સર્જ્યો હતો.
આ પ્રસંગે સ્વતંત્રતાના મૂલ્ય સાથે શિક્ષણ અને બાળકોના વિકાસના મહત્વ પર પણ ભાર મૂકાયો હતો. સમગ્ર કાર્યક્રમ બાળકો માટે આનંદ, ગૌરવ અને પ્રેરણાથી ભરપૂર રહ્યો હતો.
પ્રયાસ પબ્લિક ચેરિટેબલ ટ્રસ્ટની આ પહેલ દ્વારા ‘સ્વતંત્રતા માત્ર અધિકાર નથી, પરંતુ શીખવાની, વિકાસ કરવાની અને પોતાના સપનાઓને નવી ઊંચાઈઓ સુધી લઈ જવાની તક છે’ એવો સંદેશ આપવામાં આવ્યો હતો.
