અમદાવાદ: હિન્દી પખવાડિયા નિમિત્તે અમદાવાદની ગુજરાત વિદ્યાપીઠ ખાતે આવેલા અસ્મિતા સભા ખંડમાં ‘રાષ્ટ્રીય કાવ્ય સંગમ’ની ત્રીજી આવૃત્તિનું આયોજન કરવામાં આવ્યું હતું. સાહિત્ય વિકાસ પરિષદ, ચંદ્રિકા ફાઉન્ડેશન અને મેવાડ જનશક્તિ દળ (ઉદયપુર, રાજસ્થાન)ના સહયોગથી યોજાયેલા આ કાર્યક્રમમાં ગુજરાત સહિત રાજસ્થાન, મધ્ય પ્રદેશ અને ઉત્તર પ્રદેશના કવિઓએ ભાગ લીધો હતો.
હિન્દી ભાષાને પ્રોત્સાહન આપવાના હેતુથી યોજાયેલા કાર્યક્રમમાં અમદાવાદ, ગાંધીનગર અને ભરૂચ ઉપરાંત વિવિધ રાજ્યોમાંથી આવેલા કવિઓએ પોતાની રચનાઓ રજૂ કરી હતી. કાર્યક્રમ દરમિયાન અમદાવાદના કવિ નરેન્દ્ર સિંહ રાજપુરોહિત ‘આઉવા’ દ્વારા લખાયેલા કાવ્યસંગ્રહ ‘સૂર્યવંશી મેવાડ મહાકાવ્ય’ (બીજી આવૃત્તિ) તેમજ લેખિકા પૂજા ઉપાધ્યાયની અંગ્રેજી નવલકથા ‘બ્યુટીફુલ યુ હેન્ડસમ મી’નું વિમોચન કરવામાં આવ્યું હતું.
કાર્યક્રમમાં મુખ્ય અતિથિ તરીકે વરિષ્ઠ સાહિત્યકાર બસંત પરિહાર અને ડૉ. ઋષિપાલ ધીમાન ઉપસ્થિત રહ્યા હતા. તેમણે યુવા કવિઓને સાહિત્ય ક્ષેત્રે આગળ વધવા માટે માર્ગદર્શન પૂરું પાડ્યું હતું. બાપુનગરના ધારાસભ્ય દિનેશ સિંહ કુશવાહ અને ઉર્દૂ સાહિત્ય અકાદમીના સભ્ય ઝૈનુલ આબેદીન અંસારીએ હિન્દી ભાષાના મહત્વ અંગે પોતાના વિચારો રજૂ કર્યા હતા અને કાર્યક્રમના સફળ આયોજન બદલ સાહિત્ય વિકાસ પરિષદને શુભેચ્છા પાઠવી હતી.
કાર્યક્રમના સંયોજક મન કુમારે જણાવ્યું હતું કે વિશ્વના અનેક દેશોમાં હિન્દી ભાષા બોલાય છે. ભારતના વિવિધ રાજ્યોમાં અલગ-અલગ ભાષાઓ બોલાતી હોવા છતાં હિન્દી સંદેશવ્યવહારનું એક મહત્વપૂર્ણ માધ્યમ છે. તેમણે હિન્દી ભાષાના નામે વિવાદ ઊભો કરવાના પ્રયાસોને નિંદનીય ગણાવ્યા હતા.
‘રાષ્ટ્રીય કાવ્ય સંગમ’નું પ્રથમ સત્ર રાષ્ટ્રીય શાયર સ્વર્ગસ્થ ઝવેરચંદ મેઘાણીને અને બીજું સત્ર સ્વર્ગસ્થ હરિવંશરાય બચ્ચનને સમર્પિત કરવામાં આવ્યું હતું.
આ પ્રસંગે ચંદ્રિકા ફાઉન્ડેશનના સ્થાપક ચંદ્રિકા મકવાણા, કરણી સેનાના ગુજરાત રાજ્યના પ્રમુખ નરપત સિંહ રાઠોડ, મેવાડ જનશક્તિ દળ (ઉદયપુર)ના સાંસ્કૃતિક મંત્રી તરુણ ભટ્ટ, ગુજરાત મૌર્ય સમાજના ભૂતપૂર્વ પ્રમુખ જગદીશ મૌર્ય સહિત અનેક સાહિત્યપ્રેમીઓ ઉપસ્થિત રહ્યા હતા. ઉપસ્થિત મહેમાનોએ હિન્દી ભાષાના પ્રચાર-પ્રસાર માટે યોજાયેલા આ કાર્યક્રમની પ્રશંસા કરી હતી.
