અમદાવાદ: દિલ્હી પબ્લિક સ્કૂલ-બોપલ, અમદાવાદની ધોરણ-૩ની વિદ્યાર્થીની ઈશિતા જોશીએ રાજ્ય કક્ષાની ટેબલ ટેનિસ સ્પર્ધામાં શાનદાર પ્રદર્શન કરીને શાળાનું ગૌરવ વધાર્યું છે. ઈશિતાએ 31 જુલાઈથી 2 ઓગસ્ટ 2026 દરમિયાન જામનગર ખાતે યોજાયેલી ‘3જી ગુજરાત સ્ટેટ રેન્કિંગ ટેબલ ટેનિસ ટૂર્નામેન્ટ-2026’ માં અંડર-9 બાળકી કેટેગરીમાં ત્રીજું સ્થાન પ્રાપ્ત કર્યું હતું.
રાજ્યના વિવિધ વિસ્તારોમાંથી આવેલા પ્રતિભાશાળી ખેલાડીઓ વચ્ચે યોજાયેલી આ સ્પર્ધામાં ઈશિતાએ પોતાની રમતની કુશળતા, આત્મવિશ્વાસ અને ખેલદિલીનું ઉત્તમ પ્રદર્શન કર્યું હતું. નાની વયે રાજ્ય કક્ષાની સ્પર્ધામાં સ્થાન મેળવી ઈશિતાએ રમત પ્રત્યેની પોતાની મહેનત, શિસ્ત અને પ્રતિબદ્ધતાનું ઉત્તમ ઉદાહરણ પૂરું પાડ્યું છે.
ઈશિતાની આ સિદ્ધિ બદલ દિલ્હી પબ્લિક સ્કૂલ-બોપાલ દ્વારા તેને હાર્દિક અભિનંદન પાઠવવામાં આવ્યા હતા. શાળા પરિવાર દ્વારા તેની મહેનત અને રમતગમત ક્ષેત્રે દર્શાવેલી પ્રતિભાની પ્રશંસા કરવામાં આવી હતી તેમજ ભવિષ્યની સ્પર્ધાઓમાં પણ તે વધુ સફળતા પ્રાપ્ત કરે તેવી શુભેચ્છા પાઠવવામાં આવી હતી.
શૈક્ષણિક વિકાસની સાથે વિદ્યાર્થીઓને રમતગમત સહિત વિવિધ ક્ષેત્રોમાં પોતાની પ્રતિભા વિકસાવવા માટે પ્રોત્સાહિત કરવાની દિશામાં ઈશિતાની આ સિદ્ધિ નોંધપાત્ર છે. રાજ્ય કક્ષાની ટેબલ ટેનિસ સ્પર્ધામાં ત્રીજું સ્થાન મેળવી ઈશિતાએ પોતાની પ્રતિભા સાબિત કરવાની સાથે ડીપીએસ -બોપલ, અમદાવાદનું નામ પણ ગૌરવપૂર્ણ રીતે રોશન કર્યું છે.
