ગોધરા : પંચમહાલ જિલ્લામાં સ્થાનિક સ્વરાજ્યની સંસ્થાઓની સામાન્ય ચૂંટણી-૨૦૨૬ અન્વયે રવિવારના રોજ લોકશાહીના પર્વનો પ્રારંભ ખૂબ જ ઉત્સાહવર્ધક વાતાવરણમાં થયો હતો. જિલ્લાની સાત તાલુકા પંચાયતો, બે નગરપાલિકા અને જિલ્લા પંચાયતની ચૂંટણી માટે સવારથી જ મતદારોએ મતદાન મથકો પર લાંબી કતારો લગાવી હતી. સમગ્ર જિલ્લામાં મતદાન પ્રક્રિયા કોઈ પણ અનિચ્છનીય બનાવ વગર શાંતિપૂર્ણ રીતે સંપન્ન થતા વહીવટી તંત્ર અને પોલીસ વિભાગે હાશકારો લીધો હતો. સવારથી 7 વાગેથી શરૂ થયેલું મતદાન સાંજે ૬ વાગ્યે પૂર્ણ થયું હતું, જેની સાથે જ ઉમેદવારોના ભાવિ ઈવીએમ મશીનમાં સીલ થઈ ગયા હતા.
જિલ્લા ચૂંટણી અધિકારી અને કલેક્ટર અજય દહિયાની સીધી દેખરેખ હેઠળ સમગ્ર મતદાન પ્રક્રિયા સુચારુ રીતે હાથ ધરવામાં આવી હતી. તંત્ર દ્વારા દિવ્યાંગ અને વૃદ્ધ મતદારો માટે વ્હીલચેર તથા અન્ય પાયાની સુવિધાઓ ઊભી કરવામાં આવી હતી, જેથી તેઓ અડચણ વગર મતાધિકારનો ઉપયોગ કરી શકે. સુરક્ષાની દ્રષ્ટિએ જિલ્લા પોલીસ વડા ડો. હરેશ દુધાત અને નાયબ પોલીસ વડા બ્રિન્દાબેન જાડેજાએ વિવિધ મથકોની મુલાકાત લઈ કાયદો અને વ્યવસ્થાની સ્થિતિ પર ચાંપતી નજર રાખી હતી. સંવેદનશીલ મથકો પર સીસીટીવી કેમેરા દ્વારા સતત મોનિટરિંગ કરવામાં આવ્યું હતું.
આ ચૂંટણીમાં મતદારોમાં અનેરો ઉત્સાહ જોવા મળ્યો હતો. ગોધરા વોર્ડ નં-૩ના રહેવાસી કમલેશ કુમાર બારિયાએ પ્રભુતામાં પગલાં પાડતા પહેલા મતદાન મથકે પહોંચી મતાધિકારનો ઉપયોગ કરી નાગરિક ધર્મ નિભાવ્યો હતો. તેવી જ રીતે કાલોલ તાલુકાના કાતોલ ગામના ૧૧૨ વર્ષીય લક્ષ્મીબેન અને શહેરાના ૯૨ વર્ષીય વૃદ્ધાએ પણ મતદાન કરી યુવા પેઢી માટે પ્રેરણા પૂરી પાડી હતી. બપોરના સમયે ગરમીને કારણે મતદાન ધીમું રહ્યું હતું, પરંતુ સાંજ પડતા ફરી એકવાર મતદારોની ભારે ભીડ જોવા મળી હતી.રાજયસભાના સાંસદ ડો જસવંતસિહ પરમારે પણ પોતાના પરિવાર સાથે મતદાન કર્યુ હતુ. હાલોલના ધારાસભ્ય જયદ્રથસિંહ પરમારે પણ પોતાના પરિવાર સાથે મતદાન કર્યુ હતુ.
સાંજે મતદાન પૂર્ણ થતા જાહેર થયેલા આંકડા મુજબ, જિલ્લા પંચાયતમાં ૬૯.૦૦ ટકા મતદાન નોંધાયું છે. તાલુકા પંચાયતોની વાત કરીએ તો જાંબુઘોડામાં સૌથી વધુ ૮૩.૩૨ ટકા, હાલોલમાં ૭૨.૬૧ ટકા, ઘોઘંબામાં ૭૧.૦૦ ટકા, મોરવા હડફમાં ૬૫.૨૪ ટકા, કાલોલમાં ૬૪.૬૧ ટકા, ગોધરામાં ૬૧.૫૬ ટકા અને શહેરામાં ૫૯.૭૬ ટકા મતદાન થયું છે. જ્યારે નગરપાલિકાઓમાં શહેરામાં ૭૪.૬૮ ટકા અને ગોધરામાં ૬૧.૫૬ ટકા મતદાન નોંધાયું છે. મતદાન પૂર્ણ થતા જ પોલિંગ સ્ટાફ ઈવીએમ મશીનો સીલ કરી ચુસ્ત બંદોબસ્ત વચ્ચે સ્ટ્રોંગ રૂમ તરફ રવાના થયો હતો. હવે તમામની ઉમેદવારોની નજર આગામી પરિણામના દિવસ પર ટકેલી છે.
