હાલ રાજ્યમાં કાળઝાળ ગરમીથી લોકો પરેશાન છે, ત્યારે દેશની હવામાન પેટર્ન હાલમાં બે ભાગમાં વહેંચાયેલી દેખાઈ રહી છે. એક બાજુ ભારે ગરમીના કારણે લોકો પરેશાન થઈ રહ્યા છે. તો બીજી તરફ, હવામાનમાં અચાનક ફેરફારથી થોડી રાહતની આશા જાગી રહી છે. દિલ્હીથી બિહાર સુધીના વિસ્તારોમાં વાદળછાયું વાતાવરણ અને વાવાઝોડા અને વરસાદના સંકેતો જોવા મળી રહ્યા છે, ત્યારે અન્ય ઘણા રાજ્યોમાં તાપમાન સતત વધી રહ્યું છે. જોકે, ગુજરાતમાં આગામી દિવસોમાં વાતાવરણ બદલાવવાની આગાહી હવામાન વિભાગે કરી છે.
ભારતીય હવામાન વિભાગના (IMD) લેટેસ્ટ અપડેટ્સે આ પરિસ્થિતિને વધુ સ્પષ્ટ કરી છે. આગામી થોડા દિવસો નિર્ણાયક રહેવાની ધારણા છે, દરેક પ્રદેશમાં અલગ અલગ હવામાન અસરોનો અનુભવ થશે – કેટલાક વિસ્તારોમાં ભારે પવન સાથે વરસાદ પડી શકે છે, જ્યારે અન્ય વિસ્તારોમાં તીવ્ર ગરમીની સ્થિતિ વધુ તીવ્ર બની શકે છે. હવામાન વિભાગના જણાવ્યા અનુસાર, પશ્ચિમી વિક્ષેપ સક્રિય થવાથી પર્વતીય પ્રદેશોમાં હવામાનમાં ઝડપી ફેરફાર થવાની ધારણા છે, જ્યારે મેદાની વિસ્તારોમાં આંશિક રાહત છતાં ગરમીનો અનુભવ ચાલુ રહેશે. ઘણા સ્થળોએ, વાદળોની ગતિવિધિને કારણે તાપમાનમાં થોડો ઘટાડો થઈ શકે છે; જોકે, આ રાહત લાંબા સમય સુધી ટકી રહેવાની શક્યતા નથી.
હવામાન વિભાગે આપેલી માહિતી પ્રમાણે, આગામી ત્રણ દિવસ દરમિયાન ગુજરાતમાં મહત્તમ તાપમાનમાં કોઈ નોંધપાત્ર ફેરફાર થવાની અપેક્ષા નથી; ત્યારબાદ, 2-3°C નો ઘટાડો થવાની સંભાવના છે. આગામી 3 દિવસમાં સૌરાષ્ટ્ર-કચ્છ સહિત ગુજરાતના અલગ-અલગ ભાગોમાં મહત્તમ તાપમાન 40°C ને વટાવી જવાની સંભાવના છે.
હવામાન વિભાગના વેધર રિપોર્ટ પ્રમાણે, 19મી તારીખે સૌરાષ્ટ્રના અમરેલી અને ભાવનગરમાં તથા અરવલ્લી, દાહોદ, મહીસાગરમાં છૂટાછવાયા સ્થળો પર ગાજવીજ સાથે હળવાથી મધ્યમ વરસાદની આગાહી છે. 20મી તારીખે સૌરાષ્ટ્રના અમરેલી અને ભાવનગરમાં તથા દક્ષિણ ગુજરાતના તાપી અને ડાંગમાં છૂટાછવાયા સ્થળો પર ગાજવીજ સાથે હળવાથી મધ્યમ વરસાદની આગાહી છે.
હવામાન નિષ્ણાત અંબાલાલ પટેલે પોતાની આગાહીમાં જણાવ્યુ છે કે, તારીખ 20 એપ્રિલ સુધીમાં ગરમી વધારે રહેવાની શક્યતા છે, પરંતુ 17-18 તારીખ આસપાસ વાદળો આવવાની સંભાવના રહેશે. હમણા ઉત્તર ગુજરાતના ભાગોમાં તાપમાન 41-42 ડિગ્રી રહી શકે છે. મધ્ય ગુજરાતના ભાગોમાં પણ 42 ડિગ્રીથી વધુ તાપમાન રહેવાની શક્યતા રહે. પશ્ચિમ સૌરાષ્ટ્રમાં અકળામણ રહી શકે છે. દક્ષિણ ગુજરાતમાં ભેજવાળા વાતાવરણને લીધે અકળામણ રહેશે.
તારીખ 20 આસપાસ પ્રિ-મોન્સૂન એક્ટિવિટીનો વરસાદ પડવાની સંભાવના છે. જેમાં અરવલ્લી, સાબરકાંઠાના ભાગો, દક્ષિણ ગુજરાતના ભાગોને અસર થવાની સંભાવના છે. ગાજવીજ સાથે વરસાદ થઇ શકે છે. જ્યારે અમુક ભાગોમાં પવનની ગતિ 40થી 50 કિલોમીટર પ્રતિ કલાકની રહેવાની સંભાવના છે. મે મહિનાની શરૂઆતમાં અરબ સગારમાં હલચલ જોવા મળશે. મે મહિનાના અંત અથવા જૂનની શરૂઆતમાં બંગાળની ખાડીમાં સિવિયર વાવાઝોડું સર્જાઇ શકે છે. મે-જૂનમાં અરબ સાગરમાં પણ વાવાઝોડું સર્જાવવાની શક્યતા રહેશે.