રમાયેલા સુપર-8ની બીજી મેચમાં ભારતે ઝિમ્બાબ્વેને 72 રને હરાવ્યું. આ મોટી જીત સાથે ભારતે પોતાની નેટ રન રેટ સુધારી અને સેમિફાઈનલની રેસમાં મજબૂત સ્થિતિ બનાવી રાખી છે. આ મેચ પહેલાં ભારત પર સેમિફાઈનલની રેસમાંથી બહાર થવાનો ખતરો હતો. પરંતુ હવે રવિવારે રમાનારી ભારત અને વેસ્ટ ઇન્ડીઝ વચ્ચેની મેચ વર્ચ્યુઅલ ક્વાર્ટર ફાઇનલ બની ગઈ છે. રવિવારે ભારત અને વેસ્ટ ઇન્ડીઝમાંથી જે ટીમ જીતશે તે ગ્રુપ-વનમાંથી દક્ષિણ આફ્રિકા પછી સેમિફાઈનલમાં પહોંચનાર બીજી ટીમ બનશે. દક્ષિણ આફ્રિકા સામે 76 રનની હાર પછી ભારતે ઘણી ભૂલો સુધારી છે, છતાં હજી પણ કેટલાક પ્રશ્નોના જવાબ મળવાના બાકી છે.
ઓપનિંગ જોડીમાં ફેરફાર
મેચ પછી હોટસ્ટારના શોમાં ક્રિકેટ નિષ્ણાત ઈરફાન અને સંજય બાંગરે ટીમ ઈન્ડિયાની નવી રણનીતિના વખાણ કર્યા. ઇરફાને કહ્યું કે તેઓ ઈચ્છતા નહોતા કે ઈશાન કિશન નંબર ત્રણ પર રમે. ઑફ સ્પિનરો સામે ભારતને ટૂર્નામેન્ટમાં મુશ્કેલી પડી રહી હતી. ઈશાનની જગ્યાએ સંજૂ સેમસનને ઓપન કરાવવાનો દાવ સફળ રહ્યો. ઝિમ્બાબ્વેના કેપ્ટન સિકંદર રઝા આ નિર્ણયથી ચોંકી ગયા, તેથી શરૂઆતમાં ઑફ સ્પિનર અજમાવ્યો નહીં.
સંજય બાંગડે કહ્યું કે ટીમ ઈન્ડિયા ફરી એ જ જગ્યાએ પહોંચી છે જ્યાં ગૌતમ ગંભીરે ટી-20 ટીમના કોચ બન્યા પછી શરૂઆત કરી હતી. ત્યાંથી સંજૂ સેમસન અને અભિષેક શર્માને ઓપનિંગની જવાબદારી આપવામાં આવી હતી. બાદના ફેરફારો સફળ રહ્યા નહોતા, પરંતુ હવે ટીમે પોતાની ભૂલ સુધારી છે. ઇરફાન પઠાને આશા વ્યક્ત કરી કે હવે વર્લ્ડ કપમાં ભારત આ કોમ્બિનેશનમાં ફેરફાર નહીં કરે અને આગળ પણ અભિષેક શર્મા સાથે સંજૂ સેમસન જ ઓપનિંગ કરશે. ઝિમ્બાબ્વે સામે સંજૂ સેમસને 24 રન બનાવીને મજબૂત શરૂઆત કરી. અભિષેક શર્માએ 30 બોલમાં 55 રનની શાનદાર ઇનિંગ રમીને ફોર્મમાં વાપસી કરી.
સ્પિન સામે સુધારો
ટૂર્નામેન્ટમાં અત્યાર સુધી ભારત માટે સૌથી મોટી સમસ્યા સ્પિન સામે રમવાની હતી. અગાઉના મેચોમાં વિરોધી ટીમના સ્પિનરોએ ભારતના 19 બેટ્સમેનને આઉટ કર્યા હતા, જેમાંથી 12 વિકેટ ઑફ સ્પિનરોના ખાતામાં હતી. પરંતુ ઝિમ્બાબ્વે સામે ભારતીય બેટ્સમેનોએ આ કમજોરી સુધારી. ચાર વિકેટમાંથી ફક્ત એક જ સ્પિનરને મળી.
કેપ્ટન સૂર્યકુમાર યાદવે કહ્યું કે ટીમે જૂની ભૂલો પાછળ મૂકી અને વીડિયો એનાલિસ્ટની મદદથી પોતાની કામગીરીનું વિશ્લેષણ કર્યું, જેના કારણે આત્મવિશ્વાસ મળ્યો. ટોપ ઓર્ડરથી લઈને નંબર છ સુધી તમામ બેટ્સમેનોએ યોગદાન આપ્યું. આ મેચમાં ભારતના ટોપ છ બેટ્સમેનોએ 150થી વધુ સ્ટ્રાઈક રેટથી રન બનાવ્યા. ટી20 વર્લ્ડ કપના ઇતિહાસમાં પહેલી વાર એવું બન્યું કે કોઈ ટીમના ટોપ છ બેટ્સમેનોએ 150થી વધુ સ્ટ્રાઈક રેટ રાખ્યો હોય. ભારતે 20 ઓવરમાં 256 રન બનાવી વર્લ્ડ કપમાં પોતાનો સર્વોચ્ચ સ્કોર નોંધાવ્યો. ભારતીય બેટ્સમેનોએ 17 છગ્ગા ફટકાર્યા, જે ટી20 વર્લ્ડ કપમાં એક ઇનિંગમાં ભારત તરફથી સૌથી વધુ છે.
બોલિંગ પર પ્રશ્નાર્થ ચિહ્ન
શાનદાર જીત છતાં ભારતની બોલિંગ ચિંતાનો વિષય બની. ઝિમ્બાબ્વેએ 257 રનના લક્ષ્યનો પીછો કરતા 20 ઓવરમાં 186 રન બનાવ્યા. ઝિમ્બાબ્વેના ઓપનર બ્રાયન બેનેટ 97 રને નોટઆઉટ રહ્યા. ઝિમ્બાબ્વેના બેટ્સમેનોએ 11 છગ્ગા ફટકાર્યા. સ્પિનરો વરુણ ચક્રવર્તી અને અક્ષર પટેલે ચાર-ચાર ઓવરમાં 35-35 રન આપ્યા અને ફક્ત એક-એક વિકેટ મેળવી. છઠ્ઠા બોલર તરીકે અજમાવવામાં આવેલા શિવમ દુબેએ બે ઓવરમાં 46 રન આપી દીધા. જોકે અર્શદીપ સિંહે ચાર ઓવરમાં 25 રન આપી ત્રણ વિકેટ લઈને જીતમાં મહત્વની ભૂમિકા ભજવી. કેપ્ટન સુર્યકુમાર યાદવે સ્વીકાર્યું કે બોલિંગમાં વધુ સુધારાની જરૂર છે અને વેસ્ટ ઇન્ડીઝ સામે ઉતરતા પહેલાં ટીમ આ બાબતે ખાસ ધ્યાન આપશે.
