ગાંધીનગર: દિલ્હી પબ્લિક સ્કૂલ (DPS) ગાંધીનગર દ્વારા CBSE ક્લસ્ટર-13 ટેબલ ટેનિસ ટૂર્નામેન્ટ 2026-27નું 25થી 27 જુલાઈ દરમિયાન સફળ આયોજન કરવામાં આવ્યું હતું. ત્રણ દિવસ સુધી ચાલેલી આ ચેમ્પિયનશિપમાં ગુજરાતની 16 શાળાઓની 25 ટીમોના કુલ 103 ખેલાડીઓએ ઉત્સાહભેર ભાગ લીધો હતો.
આ ટૂર્નામેન્ટમાં અંડર-14, અંડર-17 અને અંડર-19 વયજૂથની છોકરાઓ અને છોકરીઓ માટે સિંગલ્સ તેમજ ડબલ્સ સ્પર્ધાઓ યોજાઈ હતી. સમગ્ર ટૂર્નામેન્ટ દરમિયાન ખેલાડીઓએ ઉત્કૃષ્ટ રમત, દૃઢ નિશ્ચય અને રમતગમતની ભાવનાનું સુંદર પ્રદર્શન કર્યું હતું. ચેમ્પિયનશિપની શરૂઆત ગુજરાતની સમૃદ્ધ સંસ્કૃતિ અને પરંપરાને દર્શાવતા રંગારંગ સાંસ્કૃતિક કાર્યક્રમથી કરવામાં આવી હતી, જેના કારણે ભાગ લેનાર શાળાઓ અને મહાનુભાવોનું ઉષ્માભર્યું સ્વાગત થયું હતું.
સ્પર્ધાનું આયોજન CBSEના ઓબ્ઝર્વર ડૉ. સદાત અલી ખાનના માર્ગદર્શન હેઠળ કરવામાં આવ્યું હતું. જ્યારે ચીફ રેફરી એમ. એમ. મોદન સહિત અનુભવી રેફરી અને અમ્પાયરોની ટીમે તમામ મેચોનું નિષ્પક્ષ અને પારદર્શક સંચાલન કર્યું હતું. ત્રણ દિવસની રોમાંચક સ્પર્ધા બાદ દિલ્હી પબ્લિક સ્કૂલ દુમાસ, સુરત ઓવરઓલ ચેમ્પિયન બની હતી. જ્યારે દિલ્હી પબ્લિક સ્કૂલ ગાંધીનગર પ્રથમ રનર-અપ અને અગ્રવાલ વિદ્યાવિહાર, સુરત બીજા રનર-અપ તરીકે રહ્યું હતું. વિજેતા ટીમો અને શ્રેષ્ઠ પ્રદર્શન કરનાર ખેલાડીઓને ટ્રોફી અને પ્રમાણપત્રો આપી સન્માનિત કરવામાં આવ્યા હતા.
આ પ્રસંગે DPS ગાંધીનગરના પ્રિન્સિપાલ અંજુ સિંહે તમામ ખેલાડીઓ અને વિજેતાઓને અભિનંદન પાઠવ્યા હતા. તેમણે વિદ્યાર્થીઓ દ્વારા દર્શાવવામાં આવેલા સમર્પણ, શિસ્ત અને રમતગમતની ભાવનાની પ્રશંસા કરી હતી તેમજ વિદ્યાર્થીઓને અભ્યાસની સાથે રમતગમતમાં પણ શ્રેષ્ઠતા હાંસલ કરવા પ્રોત્સાહિત કર્યા હતા. રાષ્ટ્રીય ગાન સાથે ચેમ્પિયનશિપનું સમાપન થયું હતું. આ ટૂર્નામેન્ટ માત્ર રમતગમત પૂરતી મર્યાદિત ન રહી, પરંતુ શિસ્ત, એકતા, ટીમવર્ક, નેતૃત્વ અને વ્યક્તિત્વ વિકાસ જેવા મૂલ્યોને પણ પ્રોત્સાહન આપતી સાબિત થઈ હતી.
DPS ગાંધીનગરે CBSE ક્લસ્ટર-13 ટેબલ ટેનિસ ચેમ્પિયનશિપના સફળ આયોજન દ્વારા ફરી એકવાર સાબિત કર્યું છે કે શાળા વિદ્યાર્થીઓના સર્વાંગી વિકાસ, નેતૃત્વ ક્ષમતા અને રમતગમતને પ્રોત્સાહન આપવા માટે સતત પ્રતિબદ્ધ છે.
