અમદાવાદ: ગુજરાત સ્ટેટ બાસ્કેટબોલ એસોસિએશન અને ગુજરાત સ્પોર્ટ્સ ઓથોરિટી ઓફ ગુજરાતના સહયોગથી વીર સાવરકર ઈન્ડોર સ્ટેડિયમ ખાતે બાસ્કેટબોલ ફેડરેશન ઓફ ઈન્ડિયા 13 થી 23 ઓગસ્ટ 2026 દરમિયાન FIBA 18 વર્ષથી ઓછી વયજૂથના એશિયા કપનું આયોજન કરવામાં આવ્યું છે. આ ટુર્નામેન્ટમાં એશિયાના 16 દેશોની ટીમો ભાગ લેશે. આ સ્પર્ધા 2027માં યોજનારા 19 વર્ષથી ઓછી વયજૂથના વિશ્વકપ માટે પસંદગી સ્પર્ધા તરીકે કામ કરશે.
સ્પર્ધામાં ભાગ લેનારી તમામ 16 ટીમોને 4 અલગ અલગ ગ્રૂપમાં વહેંચવામાં આવી છે. યજમાન ભારતનો ગ્રૂપ D માં સમાવેશ થયો છે, આ ગ્રુપમાં તેની સાથે કોરિયા, જાપાન અને કઝાકિસ્તાન જેવી ટીમનો સમાવેશ થાય છે.
આ ટુર્નામેન્ટમાં 13 થી 18 ઓગસ્ટ દરમિયાન ગ્રૂપ મેચો રમાશે. ત્યારબાદ 20 ઓગસ્ટે ક્વોલિફાઈંગ મેચ, 21 ઓગસ્ટે ક્વાર્ટર ફાઈનલ, 22 ઓગસ્ટે સેમિફાઈનલ મેચ અને 23 ઓગસ્ટે ફાઈનલ મેચ રમાશે.
