અમદાવાદ: ફાફગુલ્લા આર્ટિસ્ટ ગ્રૂપ દ્વારા દિવાળી સ્નેહ મિલન કાર્યક્રમના બે વર્ષ પૂર્ણ થવાના અવસરે અમદાવાદના મિષ્ટી સ્ટુડિયોઝ ખાતે એક યાદગાર સંગીતમય સ્નેહમિલનનું આયોજન કરવામાં આવ્યું હતું. આ વિશેષ કાર્યક્રમમાં અમદાવાદના જાણીતા કરાઓકે કલાકારો, ગાયક કલાકારો, ઓર્કેસ્ટ્રા કલાકારો, વિવિધ સંગીત ગ્રૂપના સંચાલકો તેમજ મીડિયા જગતના મિત્રોએ ઉત્સાહભેર ભાગ લીધો હતો.
ફાફગુલ્લા ગ્રૂપના સંચાલકો રોટરીયન સુભોજિત સેન અને રોટરીયન વિકિ અંબવાણીએ કાર્યક્રમમાં ઉપસ્થિત મહેમાનોનું ઉષ્માભર્યું સ્વાગત કર્યું હતું. આ પ્રસંગે વિશિષ્ટ અતિથિ તરીકે ઉપસ્થિત એન્જિનિયર શ્રી હીરાલાલ ઠક્કરજીનું વિશેષ સ્વાગત કરવામાં આવ્યું હતું. અમદાવાદ અને આસપાસના વિસ્તારોમાં અનેક કરાઓકે ગ્રૂપને સહયોગ આપવા તેમજ નવા અને પ્રતિભાશાળી કલાકારોને પ્રોત્સાહન આપવાના તેમના સતત પ્રયાસોની સરાહના કરવામાં આવી હતી.
કાર્યક્રમ દરમિયાન કલા, સંગીત અને સંસ્કૃતિના ક્ષેત્રે પોતાની પ્રતિભા અને યોગદાન દ્વારા વિશેષ ઓળખ ઊભી કરનાર જાણીતા કલાકારોનું સન્માન કરવામાં આવ્યું હતું. જેમાં ભાસ્કર ત્રિવેદી, કોમલ બારોટ, રાહી રાઠોડ, કશિશ રાઠોડ, અયુબ ખાન પઠાણ, તેજસ જોશી, લિયાકત અલી, દીપક પંચાલ, જુનિયર સની દેઓલ તરીકે જાણીતા હરીશ ભાસ્કર તેમજ મિથુન મિમિક્રી આર્ટિસ્ટ સલીમ શેખનો સમાવેશ થાય છે.
આ પ્રસંગે કલાકારોએ પોતાની સંગીતમય રજૂઆતો અને સુમધુર ગીતો દ્વારા સમગ્ર વાતાવરણને આનંદમય બનાવી દીધું હતું. મીડિયા જગતના મિત્રો માટે ખાસ તૈયાર કરવામાં આવેલા આ કાર્યક્રમમાં અંદાજે 40 જેટલા મીડિયા પ્રતિનિધિઓ અને કલાકાર મિત્રોએ ઉપસ્થિત રહી સંગીત અને સ્નેહભર્યા માહોલનો આનંદ માણ્યો હતો. તમામ આમંત્રિત મહેમાનોને યાદગીરીરૂપે ભેટ અર્પણ કરી સન્માનિત કરવામાં આવ્યા હતા.
આ પ્રસંગે રોટરીયન સુભોજિત સેન અને રોટરીયન વિકિ અંબવાણીએ જણાવ્યું હતું કે ફાફગુલ્લા માત્ર એક કલાકાર ગ્રૂપ નથી, પરંતુ સંગીતપ્રેમીઓ, કલાકારો અને મિત્રોને એક મંચ પર લાવી તેમની વચ્ચે મિત્રતા, પરસ્પર સહયોગ અને કલાના આદાનપ્રદાનને પ્રોત્સાહન આપતું એક પરિવાર છે. છેલ્લા બે વર્ષથી આયોજિત દિવાળી સ્નેહ મિલનનો મુખ્ય ઉદ્દેશ કલાકારોને પ્રોત્સાહિત કરવાની સાથે મીડિયા અને કલાકાર જગત વચ્ચેના સંબંધોને વધુ મજબૂત બનાવવાનો છે.
કાર્યક્રમના અંતે આયોજકોએ ઉપસ્થિત તમામ કલાકારો, મહેમાનો અને મીડિયા મિત્રોના સહયોગ બદલ આભાર વ્યક્ત કર્યો હતો. સંગીત, સન્માન, સ્નેહ અને મિત્રતાના સુંદર સંગમ સાથે ફાફગુલ્લા આર્ટિસ્ટ ગ્રૂપનું દ્વિતીય દિવાળી સ્નેહ મિલન યાદગાર બની રહ્યું હતું.

