પહેલા કારથી કચડ્યો, પછી સળિયાથી ફટકારી જીગરજાન મિત્રની હત્યા કરી, આખી ઘટના જાણીને રૂંવાડા ઊભા થઈ જશે

છત્રપતિ સંભાજીનગર: મહારાષ્ટ્રના છત્રપતિ સંભાજીનગરમાં દિવસે એક સનસનાટીભરી ઘટના સામે આવી છે, જેમાં એક મિત્રએ જ પોતાના મિત્રની નિર્દયતાથી હત્યા કરી નાખી. જિમમાંથી પરત ફરી રહેલા યુવકનો પહેલાં કારથી પીછો કરવામાં આવ્યો હતો. ત્યારબાદ તેની ટૂ-વ્હીલરને કારથી ટક્કર મારીને તેને નીચે પાડી દેવામાં આવ્યો હતો અને પછી લોખંડના સળિયા વડે તેના પર વારંવાર હુમલો કરીને તેની હત્યા કરવામાં આવી હતી.

આ ભયાનક ઘટના બાદ વિસ્તારમાં ચકચાર મચી ગઈ હતી અને ઘટનાસ્થળે લોકોનાં ટોળાં એકત્ર થઈ ગયાં હતાં. હત્યા કર્યા બાદ આરોપી પોતે કાર ચલાવીને સિડકો પોલીસ સ્ટેશન પહોંચ્યો હતો અને આત્મસમર્પણ કર્યું હતું. હાલ પોલીસ સમગ્ર મામલાની ઊંડાણપૂર્વક તપાસ કરી રહી છે.

જિમમાંથી ઘરે પરત ફરી રહેલા યુવક પર હુમલો

પોલીસ પાસેથી મળેલી માહિતી અનુસાર, મૃતકની ઓળખ 36 વર્ષીય દેવેશ ઉર્ફે બંટિ દીક્ષિત તરીકે થઈ છે. ગુરુવારે દેવેશ જિમમાં કસરત કર્યા બાદ પોતાના ઘરે પરત ફરી રહ્યો હતો. આ દરમિયાન વાંખડેનગરમાં રહેતો 22 વર્ષીય પવન પરાશર કારથી તેનો પીછો કરવા લાગ્યો હતો. સિડકોના એન-7 વિસ્તારમાં મંગેશ ગેસ એજન્સી પાસે આ લોહિયાળ ઘટના બની હતી.

કારથી ટક્કર માર્યા બાદ લોખંડના સળિયાથી હુમલો

પોલીસના જણાવ્યા અનુસાર, આરોપી પવન પરાશરે પાછળથી દેવેશના ટૂ-વ્હીલરને જોરદાર ટક્કર મારી હતી. ટક્કર એટલી જોરદાર હતી કે દેવેશ દૂર ફંગોળાઈ ગયો હતો અને તેનું ટૂ-વ્હીલર આશરે 150 ફૂટ દૂર જઈને પડ્યું હતું. ત્યારબાદ આરોપીએ કારને યુ-ટર્ન મારીને ફરીથી ઘાયલ દેવેશ પાસે કાર લઈને આવ્યો હતો.

આ ઘટના અંગે સિડકો પોલીસ સ્ટેશનના ઇન્સ્પેક્ટર અતુલે જણાવ્યું હતું કે, ટક્કર માર્યા બાદ આરોપીએ યુ-ટર્ન લીધો હતો અને ઘાયલ યુવક પાસે પાછો આવ્યો હતો. ત્યારબાદ કારમાંથી નીચે ઊતરીને લાકડી અને લોખંડના સળિયા વડે તેના માથા પર વારંવાર હુમલો કર્યો હતો. આ હુમલામાં દેવેશનું ઘટનાસ્થળે જ મોત નીપજ્યું હતું.

મિત્રતા દુશ્મનીમાં ફેરવાઈ, હત્યા પાછળ જૂની અદાવતની આશંકા

દિવસે બનેલી આ ઘટનાને પગલે વિસ્તારમાં અફરાતફરી મચી ગઈ હતી. ઘટનાની જાણ થતાં જ ઝોન-2ના ડીસીપી રત્નાકર નવાલે સહિત અનેક વરિષ્ઠ પોલીસ અધિકારીઓ ઘટનાસ્થળે પહોંચી ગયા હતા. બીજી તરફ, આરોપી પવન પરાશર પોતે સિડકો પોલીસ સ્ટેશન પહોંચ્યો હતો અને આત્મસમર્પણ કર્યું હતું.

ડીસીપી નવાલેના જણાવ્યા અનુસાર, આત્મસમર્પણ કર્યા બાદ આરોપીએ પોલીસને જણાવ્યું હતું કે તે અને મૃતક બંને અલગ-અલગ બારમાં બાઉન્સર તરીકે કામ કરતા હતા. બંને વચ્ચે પહેલાં મિત્રતા હતી, પરંતુ ત્યારબાદ સંબંધોમાં ખટાશ આવી હતી અને પરસ્પર અદાવત ઊભી થઈ હતી. આ જ અદાવતને કારણે હત્યા કરવામાં આવી હોવાનું આરોપીએ જણાવ્યું હતું.

હાલ પોલીસ આરોપીએ આપેલી માહિતીની સત્યતા ચકાસી રહી છે અને હત્યા પાછળનું ચોક્કસ કારણ જાણવા માટે વધુ તપાસ કરી રહી છે.