ગાંધીનગર: દિલ્હી પબ્લિક સ્કૂલ (DPS) ગાંધીનગરના ધોરણ 3માં અભ્યાસ કરતા 8 વર્ષીય અદ્વૈત ગોયંકાએ બાસ્કેટબોલ ક્ષેત્રે નોંધપાત્ર સિદ્ધિ હાંસલ કરી છે. અદ્વૈતે CBSE ક્લસ્ટર XIII બાસ્કેટબોલ ટુર્નામેન્ટની અંડર-14 કેટેગરીમાં ભાગ લઈને આ ક્લસ્ટરના ઇતિહાસમાં સૌથી નાની ઉંમરના ખેલાડી તરીકે સ્થાન મેળવ્યું છે.
CBSE ગેમ્સ 2026-27 અંતર્ગત આ ટુર્નામેન્ટનું આયોજન 14થી 18 ઑગસ્ટ, 2026 દરમિયાન વડોદરાના અટલાદરા રેલવે ક્રોસિંગ પાસે આવેલી ગુજરાત પબ્લિક સ્કૂલ ખાતે કરવામાં આવ્યું હતું. આ સ્પર્ધામાં અદ્વૈતે પોતાના કરતાં વધુ ઉંમરના ખેલાડીઓ સાથે મેદાનમાં ઉતરીને પોતાની રમત, આત્મવિશ્વાસ અને ખેલદિલીનું પ્રદર્શન કર્યું હતું.
ટીમને સિલ્વર મેડલ અપાવવામાં આપ્યો ફાળો
અદ્વૈત ગોયંકાના યોગદાનથી DPS ગાંધીનગરની બાસ્કેટબોલ ટીમે સ્પર્ધામાં બીજું સ્થાન મેળવીને સિલ્વર મેડલ જીત્યો હતો. આ સિદ્ધિ બદલ અદ્વૈતને મેરિટ સર્ટિફિકેટ – ક્લસ્ટર એનાયત કરવામાં આવ્યું હતું. આ ઉપરાંત, સેન્ટ્રલ બોર્ડ ઑફ સેકન્ડરી એજ્યુકેશન (CBSE) દ્વારા તેને પાર્ટિસિપેશન સર્ટિફિકેટ પણ આપવામાં આવ્યું હતું.
શાળાની પ્રેસ નોટ મુજબ, બંને પ્રમાણપત્રો ભારત સરકારના યુવા બાબતો અને રમતગમત મંત્રાલયની માન્યતા હેઠળ જારી કરવામાં આવ્યાં છે. તેના પર CBSEના એડિશનલ ડિરેક્ટર (સ્પોર્ટ્સ) ડૉ. મનજીત સિંહ અને પ્રોફેસર તથા ડિરેક્ટર (એકેડેમિક્સ) ડૉ. પ્રજ્ઞા એમ. સિંહની સહી છે.
શાળા પરિવાર દ્વારા અભિનંદન
અદ્વૈતની આ સિદ્ધિ બદલ DPS ગાંધીનગરના સંચાલન મંડળ, આચાર્ય, શિક્ષકો અને સમગ્ર શાળા પરિવારે તેને, તેના કોચ તથા પરિવારને અભિનંદન પાઠવ્યાં હતાં.
શાળાના આચાર્યએ જણાવ્યું હતું કે, “અદ્વૈતની સિદ્ધિ સમર્પણ, શિસ્ત અને નિર્ભયતાથી ભાગ લેવાની ભાવનાનું ઉત્તમ ઉદાહરણ છે, જેને DPS ગાંધીનગર પ્રોત્સાહન આપે છે. ક્લસ્ટરના ઇતિહાસમાં સૌથી નાની ઉંમરના ખેલાડી તરીકે સ્થાન મેળવવું એ વિશિષ્ટ સિદ્ધિ છે. અમને વિશ્વાસ છે કે આ તેની ઉજ્જવળ રમતગમતની સફરની માત્ર શરૂઆત છે.”
સર્વાંગી વિકાસ માટે શાળા પ્રતિબદ્ધ
ભોલારામ એજ્યુકેશન સોસાયટીના નેજા હેઠળ કાર્યરત દિલ્હી પબ્લિક સ્કૂલ ગાંધીનગર શૈક્ષણિક ક્ષેત્રની સાથે રમતગમત અને સહઅભ્યાસિક પ્રવૃત્તિઓમાં પણ શ્રેષ્ઠતા હાંસલ કરવા માટે પ્રતિબદ્ધ છે. શાળાનું સૂત્ર “સેવા બિફોર સેલ્ફ” છે.
અદ્વૈત ગોયંકાની આ સિદ્ધિ નાની ઉંમરથી જ બાળકોને રમતગમતની તક અને યોગ્ય માર્ગદર્શન મળે તો તેઓ પોતાની પ્રતિભા દ્વારા વિશિષ્ટ સ્થાન મેળવી શકે છે તેનું ઉદાહરણ પૂરું પાડે છે.
