ગાંધીનગરમાં મુખ્યમંત્રી ભૂપેન્દ્ર પટેલ અને સ્કોટલેન્ડના ફર્સ્ટ મિનિસ્ટર જોન સ્વિનીની ઉપસ્થિતિમાં સમજૂતી કરાર; વેપાર, રોકાણ, શિક્ષણ, રમતગમત અને સંશોધન ક્ષેત્રે નવી તકો ઊભી થશે.
Gandhinagar : ગુજરાત અને સ્કોટલેન્ડ વચ્ચે દ્વિપક્ષીય સંબંધોને વધુ મજબૂત બનાવવા માટે ગાંધીનગરમાં મહત્વપૂર્ણ સમજૂતી કરાર (MoU) કરવામાં આવ્યા છે. મુખ્યમંત્રી ભૂપેન્દ્ર પટેલ અને સ્કોટલેન્ડના ફર્સ્ટ મિનિસ્ટર જોન સ્વિનીની ઉપસ્થિતિમાં થયેલા આ કરારનો હેતુ બંને વચ્ચે આર્થિક સંબંધો, વેપાર, રોકાણ, નવીનતા અને ટકાઉ વિકાસને પ્રોત્સાહન આપવાનો છે.
આ સમજૂતી અંતર્ગત ગુજરાત અને સ્કોટલેન્ડ વચ્ચે રમતગમત, રિન્યુએબલ એનર્જી, શિક્ષણ, કૌશલ્ય વિકાસ, સંશોધન, સાંસ્કૃતિક આદાન-પ્રદાન અને લાઇફ સાયન્સિસ સહિતના ક્ષેત્રોમાં સહયોગની સંભાવનાઓ વિકસાવવામાં આવશે. બંને પક્ષો વચ્ચે જ્ઞાન, અનુભવો અને શ્રેષ્ઠ પદ્ધતિઓનું આદાન-પ્રદાન વધારવા પર પણ ભાર મૂકવામાં આવ્યો છે.
રિન્યુએબલ એનર્જી ક્ષેત્રે સહયોગ પર ભાર
CM ભૂપેન્દ્ર પટેલે જણાવ્યું હતું કે ગુજરાત રિન્યુએબલ એનર્જીના ક્ષેત્રમાં દેશનાં અગ્રણી રાજ્યોમાં સામેલ છે. રાજ્યનો વિશાળ દરિયાકિનારો ઓફશોર એનર્જી ક્ષેત્રે પણ નોંધપાત્ર સંભાવનાઓ ધરાવે છે.
સ્કોટલેન્ડ ઓફશોર એનર્જી ક્ષેત્રે વૈશ્વિક અનુભવ અને નિષ્ણાતતા ધરાવે છે. આ અનુભવનો લાભ મેળવવા માટે ગુજરાતનું એક પ્રતિનિધિમંડળ સ્કોટલેન્ડની મુલાકાત લે અને ત્યાંની ટેક્નોલોજી તથા કાર્યપદ્ધતિઓનો અભ્યાસ કરે તેવો પ્રસ્તાવ મુખ્યમંત્રીએ રજૂ કર્યો હતો. આ સહયોગથી ગુજરાતમાં સ્વચ્છ ઊર્જા ક્ષેત્રના વિકાસને વેગ મળવાની આશા છે.
રમતગમત અને શિક્ષણ ક્ષેત્રે નવી તકો
ગુજરાત વર્ષ 2030માં કોમનવેલ્થ ગેમ્સની યજમાની કરવાની તૈયારી કરી રહ્યું છે. આ સંદર્ભમાં ગ્લાસગોમાં 2026ની કોમનવેલ્થ ગેમ્સના આયોજન સાથે સંકળાયેલા સ્કોટલેન્ડના અનુભવો ગુજરાત માટે ઉપયોગી બની શકે છે.
વર્લ્ડ ક્લાસ રમતગમતના માળખાનું નિર્માણ, ફિટનેસ કલ્ચરને પ્રોત્સાહન અને રમતગમત સંબંધિત સુવિધાઓના વિકાસમાં બંને વચ્ચે સહયોગની શક્યતાઓ પર ધ્યાન કેન્દ્રિત કરવામાં આવશે.
શિક્ષણ અને સંશોધન ક્ષેત્રે ગુજરાત તથા સ્કોટલેન્ડની યુનિવર્સિટીઓ, કોલેજો અને અન્ય શૈક્ષણિક સંસ્થાઓ વચ્ચે જોડાણ મજબૂત બનાવવામાં આવશે. વિદ્યાર્થીઓ, સંશોધકો અને શિક્ષકો માટે જ્ઞાન તથા કૌશલ્યના આદાન-પ્રદાનની તકો વિકસાવવાનો પણ ઉદ્દેશ છે.
વેપાર, રોકાણ અને સાંસ્કૃતિક આદાન-પ્રદાનને વેગ
આ સમજૂતી દ્વારા બંને પ્રદેશો વચ્ચે વ્યવસાયિક જોડાણો વધારવા, વેપાર અને રોકાણની નવી તકો ઓળખવા તથા ઉદ્યોગસાહસિકતા અને નવીનતાને પ્રોત્સાહન આપવાની દિશામાં પ્રયાસો કરવામાં આવશે.
સ્કોટલેન્ડના ફર્સ્ટ મિનિસ્ટર જોન સ્વિનીએ જણાવ્યું હતું કે ગુજરાત અને સ્કોટલેન્ડ વચ્ચે થયેલી આ સમજૂતી સંસ્કૃતિ, રમતગમત, ઊર્જા અને લાઇફ સાયન્સિસ જેવા ક્ષેત્રોમાં નવી તકો ખોલી શકે છે. તેમણે ઓફશોર એનર્જી ક્ષેત્રે સ્કોટલેન્ડની નિષ્ણાતતાનો લાભ ગુજરાત સાથે વહેંચવાની તૈયારી પણ દર્શાવી હતી.
ગુજરાતના મુખ્ય સચિવ એમ.કે. દાસે જણાવ્યું હતું કે આ ભાગીદારી ટકાઉ અર્થતંત્રના વિકાસ માટે વ્યવસાયો, સંસ્થાઓ અને નિષ્ણાતો વચ્ચેના સંબંધોને મજબૂત બનાવવામાં મદદરૂપ થશે. ઉદ્યોગ વિભાગના કાર્યકારી અધિક મુખ્ય સચિવ રાજીવ ટોપનોએ પણ આ સમજૂતીથી શિક્ષણ, કૌશલ્ય વિકાસ, રમતગમત અને ઊર્જા ક્ષેત્રે અર્થપૂર્ણ ભાગીદારી વિકસવાની આશા વ્યક્ત કરી હતી.
ગુજરાત અને સ્કોટલેન્ડ વચ્ચે થયેલા આ સમજૂતી કરારો બંને વચ્ચે આર્થિક, શૈક્ષણિક, સાંસ્કૃતિક અને ટેક્નોલોજીકલ સહયોગને વિસ્તૃત કરવાની દિશામાં મહત્વપૂર્ણ પગલું માનવામાં આવે છે.
