બિહારના જમુઈ જિલ્લામાં રસ્તાની બાજુમાં એક યુવક અને યુવતી સાથે છેડતીના મામલામાં પોલીસે ત્રણ આરોપીઓની ધરપકડ કરી છે. પોલીસે જણાવ્યું છે કે ઘટનાથી સંબંધિત વીડિયો અને અન્ય પુરાવાના આધારે કુલ સાત આરોપીઓની ઓળખ કરવામાં આવી છે અને તેમની ધરપકડ માટે વિવિધ સ્થળોએ દરોડા પાડવામાં આવી રહ્યા છે. પોલીસના જણાવ્યા અનુસાર, આરોપીઓએ બંને પીડિતોને પરેશાન કરવાની અગાઉથી યોજના બનાવી હતી. જ્યારે યુવક-યુવતી મડવા પહાડ પર પહોંચ્યા ત્યારે આરોપીઓએ તેમને ઘેરી લીધા હતા અને તેમની સાથે અયોગ્ય વર્તન કર્યું હતું.
મળતી માહિતી મુજબ, આરોપીઓએ યુવક અને યુવતીને પરેશાન કરવાની યોજના તેઓ પહાડ પર પહોંચ્યા ત્યારથી જ બનાવી હતી. મડવા પહાડ પર આસપાસના લોકો ફરવા માટે આવતા હોય છે. આરોપીઓ પહેલેથી જ ત્યાં એકઠા થઈ ગયા હતા. જ્યારે બંને પહાડ પરથી નીચે આવ્યા ત્યારે આરોપીઓએ તેમને ઘેરી લીધા અને તેમની પૂછપરછ કરવા લાગ્યા. યુવતી રડતી રહી અને કહેતી રહી કે તેઓ બંને બાળકો છે, હવે ફરી અહીં નહીં આવે અને તેમને જવા દેવામાં આવે. જોકે, આરોપીઓએ તેની વાત સાંભળી નહોતી.
આરોપીઓએ યુવતી સાથે અયોગ્ય વર્તન કર્યું અને યુવક સાથે મારપીટ કરી. એક આરોપીએ યુવતીને ઉઠાવીને લઈ જવાનો પણ પ્રયાસ કર્યો હતો. આ સમગ્ર ઘટના આશરે 20 મિનિટ સુધી ચાલી હતી. આ દરમિયાન આસપાસથી અનેક લોકો પસાર થયા હતા અને અનેક વાહનો પણ ત્યાંથી પસાર થયા હતા, પરંતુ કોઈએ બંનેની મદદ કરી ન હતી.
સ્થાનિક લોકોના જણાવ્યા અનુસાર, પહાડની આસપાસ આ પ્રકારની ઘટના પહેલીવાર બની નથી. તેમનું કહેવું છે કે જ્યારે કોઈ યુવક-યુવતી અહીં આવે છે ત્યારે અગાઉ પણ કેટલાક અસામાજિક તત્વો તેમને પરેશાન કરતા રહ્યા છે. જોકે, લોકો ઘણીવાર ફરિયાદ કરતા ન હોવાથી આવા તત્વોને પ્રોત્સાહન મળતું રહ્યું હોવાનું સ્થાનિકોનું કહેવું છે.
પોલીસે શું કહ્યું?
જમુઈના એસપી વિશ્વજીત દયાલે જણાવ્યું હતું કે કથિત ઘટના 19 સપ્ટેમ્બરની સાંજે બની હતી. વાયરલ વીડિયોમાં દેખાતા વાહનના નંબરના આધારે પોલીસ પીડિત યુવક અને યુવતી સુધી પહોંચી હતી. તેમણે જણાવ્યું કે ઘટના બે દિવસ જૂની હોવા છતાં 21 સપ્ટેમ્બર સુધી પીડિત યુવક કે યુવતીએ પોલીસમાં કોઈ ફરિયાદ કરી નહોતી. વીડિયો સોશિયલ મીડિયા પર વાયરલ થયા બાદ પોલીસે બંનેનો સંપર્ક કર્યો હતો.
એસપીએ જણાવ્યું કે જમુઈ પોલીસ સ્ટેશનમાં નોંધાયેલી FIRમાં પીડિતોએ કોઈ આરોપીનું નામ આપ્યું નથી. જોકે, વીડિયો ફૂટેજની મદદથી આશરે સાત લોકોની ઓળખ કરવામાં આવી છે અને તેમની ટૂંક સમયમાં ધરપકડ કરવામાં આવશે. પોલીસના જણાવ્યા અનુસાર, આ કેસમાં ધરપકડ કરાયેલા ત્રણ આરોપીઓની પૂછપરછ ચાલી રહી છે. આ ઉપરાંત સોશિયલ મીડિયા પર વાયરલ થયેલા ઘટનાના વીડિયોને હટાવવાની પ્રક્રિયા પણ શરૂ કરવામાં આવી છે.
