ગાંધીનગર: ગુજરાત માટે એક ઐતિહાસિક અને ગૌરવપૂર્ણ ક્ષણ આકાર લેવા જઈ રહી છે. ભારતના પ્રતિષ્ઠિત 72મા રાષ્ટ્રીય ફિલ્મ એવોર્ડ સમારોહનું આયોજન પ્રથમ વખત નવી દિલ્હી બહાર ગુજરાતના સ્ટેચ્યુ ઓફ યુનિટી ખાતે કરવામાં આવશે. રાષ્ટ્રપતિ શ્રીમતી દ્રૌપદી મુર્મુ આગામી 21 સપ્ટેમ્બરથી ત્રણ દિવસ ગુજરાતની મુલાકાતે આવશે અને 22 સપ્ટેમ્બરે સ્ટેચ્યુ ઓફ યુનિટી ખાતે યોજાનાર 72મા રાષ્ટ્રીય ફિલ્મ એવોર્ડ સમારોહની અધ્યક્ષતા કરશે.
પ્રવક્તા મંત્રી શ્રી જીતુભાઈ વાઘાણીએ જણાવ્યું હતું કે આ ઐતિહાસિક સમારોહમાં ગુજરાતના મુખ્યમંત્રી શ્રી ભૂપેન્દ્રભાઈ પટેલ પણ વિશેષ ઉપસ્થિત રહેશે. આ ઉપરાંત ભારતીય ફિલ્મ જગતના જાણીતા કલાકારો, દિગ્દર્શકો, નિર્માતાઓ, ટેકનિશિયનો સહિત વિવિધ કલા-કસબીઓ પણ સમારોહમાં સહભાગી થશે.
રાષ્ટ્રપતિશ્રી રાષ્ટ્રીય ફિલ્મ એવોર્ડ સમારોહમાં હાજરી આપવા ઉપરાંત ગુજરાતના અન્ય મહત્વપૂર્ણ કાર્યક્રમોમાં પણ ભાગ લેશે. મુખ્યમંત્રી શ્રી ભૂપેન્દ્રભાઈ પટેલને કેબિનેટ બેઠક દરમિયાન રાષ્ટ્રપતિશ્રીની મુલાકાત તથા વિવિધ કાર્યક્રમોની તૈયારીઓ અંગે વિગતવાર માહિતી આપવામાં આવી હતી. રાજ્ય સરકાર દ્વારા આ રાષ્ટ્રીય અને વૈશ્વિક સ્તરના કાર્યક્રમને યાદગાર બનાવવા માટે જરૂરી વહીવટી તથા આયોજનબદ્ધ તૈયારીઓ હાથ ધરવામાં આવી છે. સ્ટેચ્યુ ઓફ યુનિટી જેવા ઐતિહાસિક અને વૈશ્વિક પ્રવાસન સ્થળે રાષ્ટ્રીય ફિલ્મ એવોર્ડનું આયોજન ગુજરાત માટે ગૌરવની સાથે ભારતીય સિનેમા અને ગુજરાતના સાંસ્કૃતિક વારસાને વૈશ્વિક મંચ પર ઉજાગર કરતી મહત્વપૂર્ણ ઘટના બની રહેશે.
