જયપુરમાં માતાની હત્યાના કેસમાં ધરપકડ કરાયેલી 24 વર્ષની આયુષીને લઈને રોજ નવા ખુલાસા સામે આવી રહ્યા છે. શરૂઆતમાં એવું માનવામાં આવતું હતું કે તેણે સરકારી નોકરી અને સંપત્તિ મેળવવા માટે પોતાની માતાની હત્યા કરાવી હતી, પરંતુ પોલીસ પૂછપરછ દરમિયાન સામે આવેલી માહિતી મુજબ મામલો માત્ર નોકરીનો નહીં પરંતુ વર્ષોથી માતા પ્રત્યે મનમાં રહેલી નફરતનો પણ હોઈ શકે છે. પોલીસ કસ્ટડીમાં આયુષીએ માતાની હત્યાનું કાવતરું ઘડ્યાની કબૂલાત કરી હોવાનું કહેવાય છે. જોકે તેણે દાવો કર્યો કે તેણે આ પગલું સંપત્તિ કે નોકરીના લોભમાં નહીં, પરંતુ માતાના વર્તન પ્રત્યેના ગુસ્સાને કારણે ભર્યું હતું.
મોબાઇલમાંથી મળ્યા ચોંકાવનારા વીડિયો
પોલીસે આયુષીના મોબાઇલની તપાસ કરતાં તેમાં કેટલાક વીડિયો મળ્યા હોવાનું જાણવા મળ્યું છે. આયુષીના જણાવ્યા અનુસાર, વીડિયોમાં તેની માતા નીરજ શર્મા પોતાના પતિ અને આયુષીના પિતા વિજય વશિષ્ઠ ઉર્ફે વિજય શર્મા સાથે મારપીટ કરતી જોવા મળે છે. આયુષીનો દાવો છે કે આવું એકાદ વખત નહીં પરંતુ વારંવાર બનતું હતું. આયુષીનું કહેવું છે કે માતાના વર્તનને કારણે તેના પિતાને ભારે માનસિક તણાવ થયો હતો, જેના કારણે તેમને બ્રેઇન હેમરેજ આવ્યો અને અંતે તેમનું મૃત્યુ થયું. તેણે એવો પણ દાવો કર્યો કે પિતાને માતાથી દૂર રાખવા માટે તેમને અન્ય સ્થળે લઈ જઈ સારવાર કરાવવામાં આવી હતી.
પિતાની સંપત્તિ માતાને ન મળે એવી ઇચ્છા
આયુષીએ પોલીસને જણાવ્યું કે તેને લાગતું હતું કે પિતાના મૃત્યુ માટે તેની માતા જવાબદાર હતી. તેથી પિતાની સરકારી નોકરી અને સંપત્તિનો કોઈ પણ હિસ્સો માતાને મળવો જોઈએ નહીં. પિતાના અવસાન બાદ માતા નીરજ શર્માએ અનુકંપાના ધોરણે સરકારી નોકરી મેળવી હતી. આયુષી તે નોકરી માતા પાસેથી છીનવી લેવા માગતી હતી. તેણે પૂછપરછમાં એવું પણ જણાવ્યું કે તે પોતાની માતા કરતાં દાદીની વધુ નજીક હતી અને પોતાના પિતરાઈ ભાઈ બલરામને પોતાનો સંરક્ષક માનતી હતી. તેના કહેવા મુજબ માતાના ખરાબ વર્તનને કારણે પરિવારના કેટલાક સભ્યો પણ હત્યાના કાવતરામાં સામેલ થયા હતા.
મામાનો ગંભીર આરોપ
આ દરમિયાન આયુષીના મામા રાકેશ કુમાર શર્માએ વધુ એક ચોંકાવનારો દાવો કર્યો છે. તેમનું કહેવું છે કે આયુષી અને તેનો પિતરાઈ ભાઈ બલરામ વચ્ચે માત્ર ભાઈ-બહેનનો નહીં પરંતુ પ્રેમ સંબંધ હતો. તેમણે એવો પણ આરોપ લગાવ્યો કે બલરામ પાસે આયુષીનો કોઈ વીડિયો હતો, જેના આધારે તે તેને બ્લેકમેઇલ કરતો હતો. આ દાવાની સત્તાવાર પુષ્ટિ થઈ નથી અને પોલીસ તેની તપાસ કરી રહી છે.
પિતાના મોત અંગે પણ તપાસની માંગ
મામાએ જયપુર પોલીસને લેખિત ફરિયાદ આપી છે કે આયુષીએ માતાની હત્યા પહેલાં પોતાના પિતા વિજય શર્માની પણ હત્યા કરી હતી. તેમણે સમગ્ર ઘટનાની ફરી તપાસ કરવાની માંગ કરી છે. વિજય શર્માનું 21 એપ્રિલ, 2025ના રોજ અવસાન થયું હતું. પરિવારના જણાવ્યા મુજબ, વર્ષ 2024માં તેમની તબિયત ખરાબ થતાં તેમને હોસ્પિટલમાં દાખલ કરવામાં આવ્યા હતા અને સારવાર બાદ ડિસેમ્બર 2024માં તેઓ ઘરે પરત આવ્યા હતા. આરોપ છે કે ત્યારબાદ આયુષી અને બલરામ તેમને વધુ સારી સારવારના બહાને અન્ય હોસ્પિટલમાં લઈ ગયા હતા. પરિવારને લાંબા સમય સુધી તેમની સ્થિતિ અંગે સ્પષ્ટ માહિતી આપવામાં આવી નહોતી.
મૃત્યુ પહેલાં હોસ્પિટલમાંથી ઘરે લાવવામાં આવ્યા
પરિવારના જણાવ્યા મુજબ, બાદમાં જાણવા મળ્યું કે વિજય શર્માના અનેક અંગોએ કામ કરવાનું બંધ કરી દીધું હતું. આરોપ છે કે ગંભીર હાલતમાં હોવા છતાં આયુષી તેમને હોસ્પિટલમાંથી ઘરે લઈ આવી હતી અને તે જ દિવસે તેમનું અવસાન થયું હતું. મૃત્યુ બાદ તેમનો પોસ્ટમોર્ટમ કરાવવામાં આવ્યો નહોતો અને તરત જ અંતિમ સંસ્કાર કરી દેવામાં આવ્યા હતા.
₹14 કરોડની સંપત્તિ પર નજર હોવાનો આરોપ
મામાનો દાવો છે કે પિતાના અવસાન બાદ આયુષીએ તરત જ અનુકંપાના ધોરણે સરકારી નોકરી માટે અરજી કરી હતી. જોકે બાદમાં માતાએ તે નોકરી મેળવી લીધી, જેના કારણે આયુષી નારાજ હતી. તેમણે એવો પણ આરોપ લગાવ્યો કે આયુષી જયપુરના બે મકાન અને પાંચ વીઘા જમીન સહિત લગભગ ₹14 કરોડની સંપત્તિ પોતાના નામે કરાવવા માટે માતા પર દબાણ કરતી હતી. મામાના જણાવ્યા મુજબ, માતાની હત્યાના બે દિવસ પહેલાં બંને વચ્ચે ઉગ્ર ઝઘડો થયો હતો અને આયુષીએ માતાને ધમકી આપી હતી કે જો તે પોતાના પિતાની હત્યા કરી શકે છે તો માતાને પણ મારી શકે છે.
માતાની હત્યા માટે ₹7 લાખની સોપારી
પોલીસ તપાસ મુજબ, 3 જુલાઈએ આયુષીએ પોતાની માતા નીરજ શર્માની હત્યા કરાવવા માટે આશરે ₹7 લાખની સોપારી આપી હતી. આ ઘટનાને માર્ગ અકસ્માત તરીકે દર્શાવવાનો પ્રયાસ કરવામાં આવ્યો હતો. હાલ આ કેસમાં આયુષીની ધરપકડ થઈ ચૂકી છે, જ્યારે તેનો પિતરાઈ ભાઈ બલરામ હજુ પણ ફરાર છે. પોલીસ તેની શોધખોળ કરી રહી છે.
નોંધ: આ સમગ્ર મામલામાં આયુષી, તેના મામા તથા અન્ય પરિવારજનો દ્વારા કરાયેલા અનેક દાવાઓ સામે આવ્યા છે. પિતાના મોત અંગેના આરોપોની હજુ પોલીસ દ્વારા તપાસ ચાલી રહી છે અને તેની સત્તાવાર પુષ્ટિ થઈ નથી.
