કેન્દ્ર સરકારે સ્માર્ટફોન યુઝર્સ માટે એક મોટો નિર્ણય લીધો છે. સરકાર દ્વારા સ્માર્ટફોનની સુરક્ષા અને ગ્રાહકોના હિતને ધ્યાનમાં રાખીને આ નિર્ણય લેવામાં આવ્યો છે. ઇલેક્ટ્રોનિક્સ અને ઇન્ફોર્મેશન ટેક્નોલોજી મંત્રાલયે સ્માર્ટફોનના સ્ક્રીન પ્રોટેક્ટર એટલે કે ટેમ્પર્ડ ગ્લાસ અથવા સ્ક્રીન ગાર્ડને બ્યુરો ઓફ ઇન્ડિયન સ્ટાન્ડર્ડ્સ (BIS)ના દાયરામાં સામેલ કર્યા છે. આ પગલાથી બજારમાં વેચાતા નબળી ગુણવત્તાવાળા સ્ક્રીન ગાર્ડ પર અંકુશ આવશે અને ભારતીય મેન્યુફેક્ચરિંગ કંપનીઓને પણ પ્રોત્સાહન મળશે.
સરકાર દ્વારા 21 સપ્ટેમ્બરે જાહેર કરવામાં આવેલા નોટિફિકેશન હેઠળ ‘ઇલેક્ટ્રોનિક્સ એન્ડ ઇન્ફોર્મેશન ટેક્નોલોજી ગુડ્સ ઓર્ડર, 2021’ની યાદીમાં સ્માર્ટફોન સ્ક્રીન પ્રોટેક્ટરને સામેલ કરવામાં આવ્યું છે. સ્ક્રીન ગાર્ડ આ નિયમ હેઠળ નોટિફાઇ કરવામાં આવનાર 66મું ઉત્પાદન બની ગયું છે. આ પહેલાં સ્માર્ટફોન, લેપટોપ, ચાર્જર, LED ટીવી અને પ્રિન્ટર જેવી વસ્તુઓને પણ BISના ધોરણોના દાયરામાં લાવવામાં આવી ચૂકી છે.
ક્યારથી લાગુ થશે નવા નિયમો?
આ નવા નિયમો 1 એપ્રિલ 2027થી ફરજિયાત રીતે લાગુ કરવામાં આવશે. આ સમયમર્યાદાનો હેતુ ઉત્પાદકો અને આયાતકારોને ગુણવત્તાના ધોરણો અનુસાર પોતાની પ્રોડક્ટ તૈયાર કરવા માટે પૂરતો સમય આપવાનો છે. હાલમાં ગ્રાહકો પહેલાની જેમ સ્ક્રીન ગાર્ડ ખરીદી શકશે. જોકે, નિયમો લાગુ થયા બાદ ગ્રાહકો માટે એ જાણવું વધુ સરળ બનશે કે કોઈ સ્ક્રીન ગાર્ડ ગુણવત્તાના નિર્ધારિત ધોરણોને પૂર્ણ કરે છે કે નહીં.
શું છે નવી ગાઇડલાઇન્સ?
નવા નિયમો હેઠળ મેન્યુફેક્ચરર્સે એ સુનિશ્ચિત કરવું પડશે કે ફોન પડી જાય ત્યારે સ્ક્રીન ગાર્ડનો કાચ આંચકો અને અસર સહન કરી શકે. આ ઉપરાંત, કાચ તૂટી જાય ત્યારે તેના ટુકડા અલગ-અલગ થઈને ફેલાઈ ન જાય અને યુઝરને ઈજા ન પહોંચાડે તે બાબતનું પણ ધ્યાન રાખવું પડશે. તૂટ્યા બાદ કાચના ટુકડા એકસાથે ચોંટેલા રહે તે માટે પણ ચોક્કસ માપદંડ નક્કી કરવામાં આવશે.
ફિંગરપ્રિન્ટ-રેઝિસ્ટન્ટ કોટિંગ, એન્ટી-ગ્લેર ફિનિશ અને બ્લૂ-લાઇટ ફિલ્ટર જેવી સુવિધાઓને પણ નિયમનના દાયરામાં લાવવામાં આવશે. પેકેટ પર બ્રાન્ડનું નામ, બેચ નંબર, ઉત્પાદનની તારીખ, ગ્લાસની ચોક્કસ જાડાઈ અને BIS માર્ક સ્પષ્ટ રીતે પ્રિન્ટ કરવું ફરજિયાત રહેશે.
ઉદ્યોગ સંગઠન ICEAના ચેરમેન પંકજ મહિન્દ્રુએ જણાવ્યું હતું કે BIS સર્ટિફિકેશનથી નબળી ગુણવત્તાવાળા વિદેશી અને લોકલ ઉત્પાદનો પર અંકુશ આવશે. આ ઉપરાંત ભારતીય ઉત્પાદકો અને વૈશ્વિક કંપનીઓ માટે સમાન તકનું વાતાવરણ ઊભું થશે.
