પુણેના યુવા ઉદ્યોગપતિ કેતન અગ્રવાલના મૃત્યુ મામલે તપાસ આગળ વધતા અનેક ચોંકાવનારા ખુલાસાઓ સામે આવી રહ્યા છે. પોલીસના જણાવ્યા અનુસાર, આ કેસમાં ધરપકડ કરાયેલી સિયા ગોયલ અને તેના કથિત પ્રેમી ચેતન ચૌધરીએ સગાઈ તોડવા અથવા સાથે ભાગી જવાની જગ્યાએ એવો રસ્તો પસંદ કર્યો, જેના કારણે એક પરિવાર પોતાનો દીકરો હંમેશા માટે ગુમાવી બેઠો.
તપાસ સાથે જોડાયેલા અધિકારીઓના જણાવ્યા મુજબ, પૂછપરછ દરમિયાન ચેતન ચૌધરીને પૂછવામાં આવ્યું કે જ્યારે બંને એકબીજાની સાથે રહેવા માંગતા હતા, ત્યારે તેમણે પરિવારજનોને સત્ય કેમ ન જણાવ્યું અથવા ક્યાંક દૂર જઈને નવી જિંદગી શરૂ કરવાનો વિકલ્પ કેમ ન પસંદ કર્યો?
પોલીસ સૂત્રોના દાવા મુજબ, આ પ્રશ્નના જવાબમાં ચેતને જણાવ્યું કે સિયા સગાઈ તોડવાના પક્ષમાં નહોતી. તેને ડર હતો કે આવું કરવાથી પરિવારની સામાજિક પ્રતિષ્ઠાને નુકસાન પહોંચશે અને સંબંધીઓ તથા સમાજ સામે પરિવારને શરમજનક સ્થિતિનો સામનો કરવો પડશે.
18 જૂને પુણે નજીક આવેલા લોહાગઢ કિલ્લા પર ટ્રેકિંગ દરમિયાન કેતન અગ્રવાલ ખીણમાં પડી જતાં તેનું મૃત્યુ થયું હતું. શરૂઆતમાં આ ઘટનાને દુર્ઘટના માનવામાં આવી હતી. સિયાએ પણ પરિવારજનોને જણાવ્યું હતું કે ભારે પવન અને પગ લપસવાના કારણે કેતન નીચે પડી ગયો હતો. જોકે, તપાસ દરમિયાન મળેલા કેટલાક પુરાવાઓએ પોલીસને આ કેસને નવા દૃષ્ટિકોણથી તપાસવા પ્રેરિત કર્યાં.
તપાસ દરમિયાન જ્યારે પોલીસે ચેતનને પૂછ્યું કે સિયા પોતાના અથવા ચેતનના પરિવારજનોને કહી શકતી હતી કે તે કેતનને નહીં પરંતુ ચેતનને પ્રેમ કરે છે અને તેથી તેની લગ્ન કેતન સાથે ન કરાવવામાં આવે, તો કદાચ પરિવારજનો માન્યા હોત અને આટલી ભયાનક ઘટનાને અંજામ આપવાની જરૂર ન પડતી.
ચેતને જવાબ આપ્યો કે સિયા પરિવારની પ્રતિષ્ઠા અંગે ખૂબ જ ચિંતિત હતી. સમાજ શું કહેશે અને લોકો શું વિચારશે તે ડરના કારણે તેણે તેમના સંબંધ વિશે કોઈને જણાવ્યું નહીં અને શાંતિથી લગ્ન માટે તૈયાર થઈ ગઈ. ત્યારબાદ બંનેએ મળીને આ કાવતરું રચ્યું હોવાનું પોલીસનો દાવો છે.
પોલીસના જણાવ્યા અનુસાર, લોહાગઢ કિલ્લાના ટિકિટ કાઉન્ટર અને આસપાસ લાગેલા સીસીટીવી કેમેરાના ફૂટેજની તપાસ દરમિયાન એક શંકાસ્પદ વ્યક્તિ જોવા મળ્યો હતો. અધિકારીઓનો દાવો છે કે આ વ્યક્તિ સતત કેતન અને સિયાનો પીછો કરતો દેખાયો હતો.
આ વ્યક્તિએ શોર્ટ્સ અને હુડી પહેરી હતી. હુડીનો આગળનો ભાગ એટલો નીચે ખેંચેલો હતો કે તેનો ચહેરો સ્પષ્ટ દેખાતો નહોતો. તેના માથે હેડસેટ પણ હતું. અન્ય એક ફૂટેજમાં જોવા મળ્યું કે જેમ જ સિયા પાછળ વળીને જુએ છે, તેમ જ આ વ્યક્તિ અચાનક બેસી જાય છે. આ ઘટનાએ તપાસકર્તાઓની શંકા વધુ મજબૂત બનાવી.
એક પોલીસ અધિકારીએ જણાવ્યું કે તપાસ દરમિયાન 18 જૂનના હવામાનના આંકડાઓની પણ તપાસ કરવામાં આવી હતી. તે દિવસે તાપમાન લગભગ 33 ડિગ્રી સેલ્સિયસ હતું. આવી ગરમીમાં કોઈ વ્યક્તિ આખું શરીર હુડીથી ઢાંકી રાખે તે અસામાન્ય લાગતાં પોલીસે તેની ઓળખ શોધવાની પ્રક્રિયા તેજ કરી હતી. પોલીસનો દાવો છે કે સીસીટીવી ફૂટેજ અને અન્ય ટેક્નિકલ પુરાવાઓના આધારે હુડી પહેરેલી વ્યક્તિની ઓળખ ચેતન ચૌધરી તરીકે થઈ હતી.
તપાસ એજન્સીઓનો આરોપ છે કે સિયા ગોયલ અને ચેતન ચૌધરીએ મળીને કેતન અગ્રવાલની હત્યાનું કાવતરું રચ્યું હતું. હાલ બંને આરોપીઓને અદાલતે 29 જૂન સુધી પોલીસ કસ્ટડીમાં મોકલી દીધા છે. મામલાની તપાસ હજુ ચાલુ છે અને પોલીસ વિવિધ પાસાઓની તપાસ કરી રહી છે. અદાલતમાં આરોપ સાબિત ન થાય ત્યાં સુધી બંને આરોપીઓને કાયદાકીય રીતે નિર્દોષ માનવામાં આવશે.
