સોશિયલ મીડિયા પર હાલ એક સમાચાર ઝડપથી વાયરલ થઈ રહ્યા છે કે 30 જૂન 2026 પછી ઇન્ડેન, HP ગેસ અને ભારત ગેસના LPG કનેક્શન બંધ કરી દેવામાં આવશે. મધ્ય પૂર્વમાં ચાલી રહેલા તણાવ અને દેશમાં પાઇપ્ડ નેચરલ ગેસ (PNG)ને પ્રોત્સાહન આપવાના સરકારના પ્રયાસો વચ્ચે ફેલાયેલી આ અફવાએ લાખો ગ્રાહકોને ચિંતામાં મૂકી દીધા છે. જોકે, કેન્દ્ર સરકાર દ્વારા આવો કોઈ આદેશ જારી કરવામાં આવ્યો નથી. સરકારે સ્પષ્ટતા કરી છે કે 30 જૂનની સમયમર્યાદા માત્ર PNG અપનાવવા માટે આપવામાં આવેલી અવધિનો એક ભાગ છે, LPG કનેક્શન બંધ કરવાની અંતિમ તારીખ નથી.
શું છે 30 જૂન 2026ની સમયમર્યાદા?
માર્ચ 2026માં કેન્દ્ર સરકારે એવા વિસ્તારો માટે 90 દિવસની ટ્રાન્ઝિશન (પરિવર્તન) અવધિ જાહેર કરી હતી, જ્યાં PNGની સુવિધા ઉપલબ્ધ છે. આ સમયગાળાનો હેતુ લોકોને ધીમે-ધીમે LPGમાંથી PNG તરફ સ્થળાંતર કરવા માટે પ્રોત્સાહિત કરવાનો હતો. આ 90 દિવસની અવધિ 30 જૂન 2026એ પૂર્ણ થઈ રહી છે. જોકે સરકારે ક્યાંય એવું કહ્યું નથી કે આ તારીખ પછી LPG કનેક્શન બંધ કરી દેવામાં આવશે. હાલમાં દેશભરમાં LPG કનેક્શન બંધ કરવા અંગે કોઈ સત્તાવાર સૂચના જાહેર કરવામાં આવી નથી.
LPG-PNG અંગે સરકારની નીતિ શું કહે છે?
સરકારનો હેતુ ઘરેલુ ગેસ ગ્રાહકોમાં PNGનો ઉપયોગ વધારવાનો છે. આ દિશામાં કેટલાક નિયમો બનાવવામાં આવ્યા છે જેથી એક જ ઘરમાં બે ગેસ કનેક્શન રાખવાની પ્રવૃત્તિ ઘટાડી શકાય. નીતિ અનુસાર, જે ઘરોમાં પહેલેથી PNGની સુવિધા ઉપલબ્ધ છે, તેમને નવા LPG કનેક્શન મેળવવામાં મુશ્કેલી પડી શકે છે. કેટલાક કિસ્સાઓમાં PNG કનેક્શન સક્રિય થયા બાદ ગ્રાહકોને LPG કનેક્શન સરેન્ડર (પરત) કરવા માટે પણ કહેવામાં આવી શકે છે. જો કે, આ પ્રક્રિયા વિસ્તાર અને સ્થાનિક નિયમોના આધારે લાગુ કરવામાં આવી શકે છે.
કેટલા ગ્રાહકો PNG સાથે જોડાયા?
પેટ્રોલિયમ મંત્રાલયના જણાવ્યા અનુસાર, માર્ચ 2026થી અત્યાર સુધીમાં લગભગ 10 લાખ PNG કનેક્શન સક્રિય કરવામાં આવ્યા છે. તે ઉપરાંત, 3.22 લાખ નવા કનેક્શન માટે જરૂરી ઈન્ફ્રાસ્ટ્રક્ચર (મૂળભૂત સુવિધાઓ) વિકસાવવામાં આવી રહ્યું છે. મંત્રાલયે વધુમાં જણાવ્યું કે PNGના નવા કનેક્શન માટે આશરે 9.94 લાખ અરજીઓ પ્રાપ્ત થઈ છે.
અફવાઓથી સાવચેત રહો
સરકારે સ્પષ્ટ કર્યું છે કે 30 જૂન 2026 પછી LPG કનેક્શન બંધ થઈ જશે એવી વાતો માત્ર અફવા છે. તેથી ગ્રાહકોએ સોશિયલ મીડિયા પર ફેલાતી ભ્રામક માહિતીથી સાવચેત રહેવું જોઈએ અને માત્ર સરકાર અથવા ગેસ કંપનીઓ દ્વારા જાહેર કરવામાં આવેલી સત્તાવાર માહિતી પર જ વિશ્વાસ કરવો જોઈએ.
