દેશની સૌથી મોટી ખાનગી પેટ્રોલ પંપ કંપની નાયરાએ ગુરુવારે પેટ્રોલના ભાવમાં પ્રતિ લિટર ₹5 અને ડીઝલમાં ₹3 સુધીનો વધારો કર્યો છે. જોકે, અલગ-અલગ રાજ્યોમાં VAT અને અન્ય ટેક્સને કારણે આ વધારો ₹5.30 પ્રતિ લિટર સુધી પહોંચી શકે છે. આંતરરાષ્ટ્રીય બજારમાં કાચા તેલના ભાવમાં તેજી આવતાં કંપનીએ આ નિર્ણય લીધો છે.
મિડલ ઈસ્ટ તણાવનો પ્રભાવ
મિડલ ઈસ્ટમાં વધતા તણાવ અને યુદ્ધ જેવી સ્થિતિને કારણે વૈશ્વિક બજારમાં ક્રૂડ ઓઈલના ભાવમાં ભારે ઉછાળો આવ્યો છે. અમેરિકા અને ઈઝરાયેલ દ્વારા ઈરાન પર 28 ફેબ્રુઆરીએ હુમલા શરૂ થયા બાદ કાચા તેલના ભાવ લગભગ 50% સુધી વધી ગયા છે. જેના કારણે ફ્યૂલ કંપનીઓ પર દબાણ વધ્યું છે.
ખાનગી કંપનીઓએ લીધો નિર્ણય
રિપોર્ટ મુજબ, વધતી કિંમતનો બોજ હવે ગ્રાહકો પર મૂકવાનો નિર્ણય લેવામાં આવ્યો છે. નાયરા એનર્જી પાસે દેશના કુલ 1,02,075 પેટ્રોલ પંપમાંથી 6,967 પંપ છે. કંપનીએ હજી સુધી આ અંગે સત્તાવાર ટિપ્પણી કરી નથી.
સરકારી કંપનીઓએ રાખી સ્થિરતા
દેશની સરકારી તેલ કંપનીઓ ઇન્ડિયન ઓઈલ કોર્પોરેશન, હિન્દુસ્તાન પેટ્રોલિયમ કોર્પોરેશન અને ભારત પેટ્રોલિયમ કોર્પોરેશન—એ હજુ સુધી સામાન્ય પેટ્રોલ અને ડીઝલના ભાવમાં વધારો કર્યો નથી. દેશના લગભગ 90% ફ્યૂલ માર્કેટ પર આ કંપનીઓનો કબજો છે.
કિંમતોમાં તફાવત
હાલમાં દિલ્હીમાં નોર્મલ પેટ્રોલનો ભાવ ₹94.77 પ્રતિ લિટર છે, જ્યારે ડીઝલ ₹87.67 પ્રતિ લિટર મળે છે. જોકે, પ્રીમિયમ પેટ્રોલ (95 ઓક્ટેન)નો ભાવ ₹99.89થી વધારી ₹101.89 કરવામાં આવ્યો છે. ઇન્ડસ્ટ્રીયલ ડીઝલની કિંમત પણ ₹87.67થી વધારી ₹109.59 પ્રતિ લિટર થઈ છે.
ઓક્ટેન રેટિંગ શું છે?
* નોર્મલ પેટ્રોલ: 91-92 ઓક્ટેન (દૈનિક ઉપયોગ માટે યોગ્ય)
* પ્રીમિયમ પેટ્રોલ: 95-98 ઓક્ટેન (હાઈ-પરફોર્મન્સ એન્જિન માટે યોગ્ય)
આયાત પર નિર્ભરતા
ભારત તેની ક્રૂડ ઓઈલની જરૂરિયાતનો આશરે 88% અને નેચરલ ગેસનો અડધો ભાગ આયાત કરે છે. આ સપ્લાય મોટાભાગે સ્ટ્રેલ ઓફ હોર્મુઝ મારફતે આવે છે. હાલ ઈરાન દ્વારા આ માર્ગ પર નજર રાખવામાં આવી રહી છે, જેના કારણે વૈશ્વિક સપ્લાય પર અસર પડી રહી છે.
