Mumbai : ભારતના પ્રકાશના પર્વ દિવાળીની ઉજવણી વિયેતનામની એરલાઇન વિયેટજેટ (Vietjet) દ્વારા અનોખી રીતે કરવામાં આવી છે. એરલાઇને પોતાની બેંગલુરુથી હો ચી મિન્હ સિટી વચ્ચેની ફ્લાઈટમાં દિવાળીનો ઉત્સાહ અને રંગત ફેલાવી મુસાફરોને ખાસ ઉત્સવનો અનુભવ કરાવ્યો હતો.
આ ખાસ ઉજવણી દરમિયાન મુસાફરોનું પરંપરાગત ભારતીય મીઠાઈઓ સાથે સ્વાગત કરવામાં આવ્યું હતું. ભારતીય પરંપરાગત પોશાકમાં સજ્જ કેબિન ક્રૂએ મુસાફરોને દિવાળીના ખાસ સંભારણાં અને શુભેચ્છાઓ આપી હતી. સાથે જ મુસાફરોને પોતાના પરિવારજનો અને મિત્રો માટે દિવાળી શુભેચ્છા કાર્ડ લખવાની તક પણ આપવામાં આવી હતી.
વિયેટજેટે માત્ર ફ્લાઈટમાં જ નહીં, પરંતુ ભારતમાં આવેલા પોતાના એરપોર્ટ સ્ટેશનો પર પણ દિવાળીની ઉજવણી કરી હતી. 5થી 9 નવેમ્બર દરમિયાન એરપોર્ટ પર દિવાળી થીમ આધારિત ફોટો સ્પોટ્સ, ઉત્સવના સ્ટેન્ડી અને ગિફ્ટ સ્ટેશનો તૈયાર કરવામાં આવ્યા હતા. જ્યાં મુસાફરોને શુભેચ્છા કાર્ડ્સ, ઉત્સવના સ્ટીકર્સ અને ઈ-વાઉચર્સ આપવામાં આવ્યા હતા.
ઉલ્લેખનીય છે કે, વિયેટજેટનું ભારત-વિયેતનામ નેટવર્ક મુંબઈ, નવી દિલ્હી, અમદાવાદ, હૈદરાબાદ અને બેંગલુરુને હનોઈ તથા હો ચી મિન્હ સિટી સાથે જોડે છે. આ સીધી ફ્લાઈટ્સ બંને દેશો વચ્ચે પ્રવાસન, વ્યવસાય અને સાંસ્કૃતિક આદાન-પ્રદાનને પ્રોત્સાહન આપે છે.
આ ઉજવણીના માધ્યમથી વિયેટજેટે મુસાફરીને માત્ર એક સ્થળેથી બીજા સ્થળે પહોંચવા પૂરતી મર્યાદિત ન રાખતા, તેમાં ભારતીય સંસ્કૃતિ, તહેવારો અને ખુશીઓનો રંગ ઉમેરવાનો પ્રયાસ કર્યો છે.
